Pethakeshüu 6
6
U Kemenguko U Nou Bie Kehoukeruo Chüwaya
1Ae niaki khro mha kesuo puo ngu, mu süu themianuo pie kemesi puo; 2Kepenuopfüe kinyi, mhanya tsiu therhu pie mia puo tsüshüya, sikecü la puoe puo menguko puorei tso moketa jü, sishierei Kepenuopfüe puo bu süu se puo neikelie kekuo pie puo tsü mota, derei sikemomia bu süu se u neilieya. Hauha kemethuo zo, süue mha kesuo se puo. 3Mhanuü mia puoe nuo krie puo penuolie, sidi teicie kekra lhoulie, süla puo teicieko teisozha kekrata, derei puoe puo kelhou nu mha keviko se puo neilie mota, tsiu puo kekhrunyie rei kese moliro; a kepue hau, nuo sia di penuokelieue süu ki vikuo. 4Kekreilamonyü puoe kemethuo nu vor tsiu zeibouikecü nu la votaya mu kezeiu nunu thezau keviewaya. 5Sizomoü puoe niaki rei ngu mo, morei mhapuorei si mo; hau we kekreiu ki kerülei bakuo. 6Puoe teicie nyie puopuocü va kenie de lhoulie zoürei, mha kevi puorei ngulie mo; uko peteko rei thechü puo nu vo phreya mo üme?
7Themia mhathomhachüko pete rei puo me la zo, sishierei puo me kelheu tshulieya mo. 8Kekreilamonyü mhakesimiae mhalekemomia ki kedipuo ba kra ga? Mu kerheimia mhodzü tuo voketuo si se keba kejümia la kedipuo ba ga? 9Mha mehoumengu di mha pete le kebau ki n mhi kenguko vikuo; hau rei kemethuo zo tsiu teikhrie whuo ketuo puo zo.#6:9 Moro teikhrie pie u ca kechü tuoi Hos 12:1 meholie.
10Mhakehoupuorei tuoketako za thoshüwate, tsiu themiae kedipuo shikecü rei si ba, morei puoe puo ki zhakuokecüu ze keperhielie kenjükecü rei. 11Die krakuo mu kemethuo rei krakuo, siro mia puoe kedipuo nu vikuo ga? 12Themia ha teisozha huoyo lhoukecü, mhakhrü puo kemhie puoe votayakezha kelhou kedipuo vi shikecü supuonie si ba ta? Supuonie mia puo ki hasie niaki khro kedipuo kemhietuo shikecü pushülie vi ta?
Currently Selected:
Pethakeshüu 6: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
