Pethakeshüu 8
8
Kediu Die Zelie mu U Nei di Lhoulie
1Supuonie mhakesiu mhie ga?
Supuonie mhaca vatshakeshü silieya ga?
Mhasi-e mia puo zie bu ziekruoi tuoya,
tsiu puo dzükezei zieu chü pekreiwatuo.
2Kediu diekhakeshü zelie#8:2 Ibri Ae zelie., no phrakeshü mhie di, 3Michieta hie, puo mhodzünu tuolie, mha huo puotou moketa ki, n ketheta hie, kekreilamonyü puoe puo thuo puo nei puo medo chüya. 4Kediu die kebara sünu kekuo baya; mu supuonie puo ki, “No kedipuo chüya ga?” isilie vi mu. 5Themia kehoupuorei diekhakeshüko chüüzeyakezhamia mha kesuo ngulie lho; tsiu mhakesimia noue puo tei tsiu puocapuola silieya. 6Themia mezhie-e puo gei kra zo ürei, mhakehoupuo la rei puo thuo puo tei puo mu puo zho puo nyi phre. 7Kekreilamonyü puoe hasie kiütuo shi siya mo, supuonie puo ki süu kedikechükipuo tuo shi pushülie vi ga? 8Miapuorei puo keha#8:8 Moro puo thesü. se balieketuo puo kekuo ba mo; morei kesia teisozha mho puo kekuo ba mo; terhükegeikecü nu talie kenjü morei mha kesuoe kesuomia kelashülie lho. 9Mha hako pete ae ngushü, sidi niaki khro mhatho peteko nu a nou khashü; mia puoe kekreimia puo mho kekhakecü ki süu bu kemezhiekelie tei nyi.
Ukepenuopfü Zhokoe Sou
10Süsie ae kerüzhümia khrukewa ngu, ukoe kemesachü nu pra mu le tuoya, tsiu ukoe mha sü kemhiekecü chükeshü nadiu nu thetshepfüya; hau rei kemethuo zo. 11Mhatho kesuo la die pepikeshüu chü mhailie kemo la, süla themia nuonuo noue mha kesuo chütuoü dojüse bataya. 12Kephoumamia mha kesuo va thekrie-e chü zorei puoe rhei pechalieya, sirei Ukepenuopfü preiyakezhamia vilieketuo ae si, kekreilamonyü ukoe puo khrüpreilie; 13derei kerüzhümiae vilie lho, morei puo teisozhako mha khrü puo tuoi ba chalie lho, kekreilamonyü ukoe Ukepenuopfü khrüprei di lhou mo.
14Kijüu nu mha kemethuo zokecü puo chüya, kemiathomia pie kerüzhümia rhi kemhie di u gei keshü, tsiu kerüzhümia pie kemiathomia rhi kemhie di u gei keshü; hau rei kemethuo zokecü a puya. 15Süla ae u menguko chükelie üse vi üya, niaki khro cü mu krie di u nei keba ha mha kekrei pete ki vikuo, kekreilamonyü Ukepenuopfü pie uko ketsü niakiu khro u mezhie teiko zorei hau u ze tuolietuo.
16Ae a nou se mhasi silietuoü, tsiu kijüu gei mereiko mehotuoü sie, umhi-e khinhie morei theva keze nguya mo zo. 17Süsie ae Ukepenuopfü mhatho peteko ngushü, süusü miapuorei niaki khro mhatho chükeshüko pfhü hulie kenjü, sizomonyü mia puoe süu silietuoü pfhü sie zorei, puoe pfhülie kenjü, mhakesimia puo süu silietuoü le zo rei, puoe süu pfhülie kenjü.
Currently Selected:
Pethakeshüu 8: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More