Pethakeshüu 9
9
Mhakehoupuo Phir rei Lhoukelie
1Mha hako pete a nou nu medo di thapie pekieshütuoü sie, süusü kemiathomia tsiu mhakesimia, mu uko mhathoko Ukepenuopfü dzie nu ba zocü, süusü kekhrie shierei morei ngukemecü rei miapuorei süu si mo. Mha sünie mhodzünu keba pete 2kemethuo zo,#9:2 Syr pie Gk mejüshülie: Ibri Uko ze keperhieyakecükoe mha pete zo. kekreilamonyü pete gei süu vorya, kemiathomia gei rei, tsiu kerüzhüu; kevimia mu kesuomia, kemesamia siro mesa kemomia, ruosuo kechüu tsiu ruosuo chü kemo-u gei rei vorya, themia keviu tuoi, kephoumau rei kemhie zo; mu rüsekecümia gei rei rüse preikecümia rei kemhie zo. 3Mha puoe pete gei voryakecü hau niaki khro mhachüyakezha peteko donu mha kesuo puo, süsie rei themia meloue mha kesuo thuo tshupfü tuo zo, tsiu uko kerhei ki rei kenya thuo u melou nu tuo, mu süsie uko tuo kesia ki votaya. 4Derei kerheimia pete ze di tuoketamia la we kemerü baluo; kekreilamonyü tefü rhei kebaue losha siaketau ki vikuo zo. 5Kerheimia ue siaketuo si baya; derei kesiamiae mhapuorei siya mo, tsiu uko zhakhra rei ba mo; uko rükra motayacü la. 6Siro uko kekhrie tsiu ngumecükecü, mu mia ngu u rokecü jüte, siro niaki khro mhathomhachü kehoupuorei kechachie uko ya tuo mote.
7Volie, n nei di n niekhrüda cülie, tsiu n noumvü di n zu krielie; kekreilamonyü Kepenuopfüe thiedzüthonu n mhatho lieliete.
8N pfhenei bu krapoui sei balie; tsiu n tsü gei tier bu jüta hie.
9Niakiu khro n kelhou teisozha kemethuocü pete nu puoe khapie n ketsü n kimia no puo khrieyakezhapfü ze n neilie, kekreilamonyü kelhou hau nu, tsiu no niakiu khro mhachümhaliekecü nu süu n ya zo. 10N dzie-e mhakehoupuorei chüketuo ngulie ro, süu n kekuo üse chüliecie, kekreilamonyü no vokezhü Sheol nu, mhatho morei mharhükecü morei kesikele morei mhasi ba mo.
11Ae ngukecü niakiu khro takewhuokecü kemephrümia vie morei terhüe kekuomia vie, morei niekhrüdae mhakesimia la morei kinyi-e kemeciemia la, morei u neikecüe mhachü kesimia la imo; derei puoteiu mu chülie keviu uko pete gei vor phreya. 12Miapuorei kepeka vorketuo tei pulie kenjü. Khuoe uzho kesuo jal nunu bolieyakezha tuoi, mu perae ciephrie nunu malieyakezha tuoi, themia rei ketsopfhü u gei mhai vorketuo tei siya mo.
Mhasi-e Mhalekemo ki Vikuo
13Niakiu khro mha thakie hau rei ae ngu, mu süu a mhodzüki mha kezha puo. 14Thiedzü rüna kecü yopuo ba, siro sünu themia huoyo ba; tsiu kedi kezha puo sier süu petsou di süu houlie, sidi kegeituoü dahou kezha pfhepie süu houlie. 15Tsiu sünu mhakejü mhakesimia puo ngulie, mu puo mhasi se rünau kelashü. Sizorei miapuorei mhakejü süu rükra mota. 16Sitse ae sie, “Mhasi-e kekuo ki vikuo, derei kejümia mhasi we rütseta tsiu puo dieko we rükra motaya”.
17Mhalekemomia donu mhakekhakezhau melie kemerie chü kebau ki rei,
mhakesimia kemekrie ba di pukeshüe rünyü zhükuo.
18Mhasi-e terhünyieko ki rei vikuo,
derei kephoumamia puoe mha kevi kekra pekawaya.
Currently Selected:
Pethakeshüu 9: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More