Lukas 14

O Jesus sastarel iekhe llene kai suvliola leki esnaga

1Iek llive sabado o Jesus llelo te jal ando cher katar iek gazda e fariseonengo, ta aver fariseura dikhena po chorial. 2Ta i kote angla le saia iek lleno kai suvliola leki esnaga. 3O Jesus dikhla pe kovacha e zakonoke ta pe fariseura, ta puchla len:

¿Sai sastardol iekhe nasuale ando llive sabado, o nasti?

4A von ni phende niso. Ondaka vou lia e nasuale, sastarda le ta phenda leke te llaltar. 5¿Ko tumendar te perel leko chaurro o leko guruv ande iek bunari ni ka ikanel le oma, makar avela ando llive sabado?#Mt 12.11.

6A von nasti phende leke niso.

7Kana o Jesus dikhla sar e llene kai sea ikharde esvirina e estoliche mai glamne pe sinia, phenda lenge:

8Kana vareko ka ikharel tut te ja pe iek biau, na bes po than o mai angluno soke sai avel aver lleno kai si mai glamno neko tu. 9Ta o lleno kai ikharda e duien sai avel te phenel chuke:

De cho than kai gava lleno. Ondaka lallaimaia morabi te bese po than kai si mai dur. 10A so morabi te chere si gava:

Kana ka ikharen tut, bes po than kai si mai dur, ta kana ka avel o lleno kai ikharda tut, ka phenel chuke:

Amala, bes pe iek than mai glamno. Gia ka ave glamno maskar e llene kai besen tuia pe sinia. 11Soke gua kai bariarel vou pe, ka avel thodino ando lallao, a o lleno kai cherel vou pe minono, ka avel bariardo.#Pr 29.23; Mt 23.12; Lk 18.14.

12Ta i phenda e lleneke kai ikharda le:

Kana ka chere iek jape na ikhar che amalen, ni che phlale, ni che familia ni e barvale llene kai zivin pasa tu, soke i von ka ikharen tut ta gia ka pochinen chuke. 13Mai sukar si kana ka chere iek jape, ikhar golen kai inai len love, e llenen kai inai len porrne kai si korre, 14ta ka ave veselo. Soke von nasti pochinen chuke, a chuke ka pochindol o llive kana e llene lache ka usten katar o meripe:

E paramichi katar o baro jape

Mt 22.1-10

15Kana asunda gaia orba iek lleno kai besela pe sinia, phenda e Jesuseke:

¡Blagosime o lleno kai ka besel pe sinia katar e charoina e Devleki!

16O Jesus phenda:

Iek lleno cherda iek baro jape, ta bichalda te ikharen bute llenen. 17Kana avilo o vreme te jan bichalda pe sluga te phenel e llenenge kai ikharda:

Aven, soke o jape si thodo pe sinia. 18A sa e llene phende te prostil len soke nasti ka llan. O purvo phenda:

Akana chindem iek umal, ta si te llau te dikhav la. Mangav tutar te prosti man. 19Aver lleno phenda:

Chindem des guruva ta llau te zumavav len. Mangav tutar te prosti man. 20Ta aver phenda:

Akana zinisailem, ta nasti llau. 21O sluga irisailo ta phenda sa pe gazdake. Ondaka o gazda jolailo, ta phenda e slugake:

Lla oma pe droma ta pe dromorra e foroke, ta an kate e llenen kai inai len love, ta e bangen ta e korren. 22Kana o sluga irisailo, phenda. Gazda cherdem so phendan mange, ta achen thana pe sinia. 23Ondaka o gazda phenda e slugake:

Lla pe droma ta pe dromorra, ta an pe zor avere llenen te den, te pherdol mo cher. 24Phenav tumenge kai ni iek katar e purve llene kai ikhardem ni ka jan mo jape.

Gia trudno si te lla pala o Jesus

Mt 10.37-38

25But llene llana pala o Jesus, vou dikhla pe lende ta phenda lenge: 26Te avela vareko mande ta ni volil man mai but neko pe dade, pe da, pe rromia, pe chaurren, pe phlalen ta pe phiorren, ta neko isto vou pe, nasti avel mo disipulo.#Mt 10.37. 27Ta ko ni lel isto piro krusto ta ni llal pala ma, nasti avel mo disipulo.#Mt 10.38; 16.24; Mk 8.34; Lk 9.23; Jn 12.24. 28Vareko tumendar te mangel te cherel iek cher, ¿ni ka besel mai anglal ta ka llinel pe gachin love ka del, te dikhel dal si le soia te getol le? 29Te na cherda gia, ta te thoda e barra kai llan ande phuv ta mapalal nasti getol le, kogo ka dikhel le ka marel letar espurnia, 30ta ka phenen gia: Gava lleno thoda te vazdel po cher, ta nasti getosarda le. 31O varesavo charo te si te llal te marelpe avere charoia, ¿ni ka besel mai anglal te dikhel dal leke des milie boñikura sai ka marenpe ogolenchar kai si bis milie boñikura? 32A te nasti marelpe lenchar, kana o gua charo ka avel dur, ka bichalel llenen te phenen leke kai ni kamel te marelpe. 33Goleke, vareko tumendar te na mukela sa so si le, nasti avel mo disipulo.

Kana o lon ka jasarel po londipe

Mt 5.13; Mk 9.50

34O lon si lacho, a te jasarel po londipe, ¿sar ka avel pale londo? 35Ni trubul ni e phuviake ni e gosnienge kai si pe umpa. Samo si te chudiniaol ando llubri. Golen kai si len kan, te asunen.

Currently Selected:

Lukas 14: BACHRO

Highlight

Copy