Lukas 13

Kein tumen ta ka zivin

1Isto ande gua vreme llele nesave llene te dikhen e Jesuse, ta phende leke kai o Pilato bichaldaia te mundaren bute llenen kai sea katar phuv katar e Galilea. Gava mundaripe avilape kana von dena o kurbano e Devleke. 2O Jesus phenda lenge:

¿Tumen mislin kai gala llene galileura von mule soke sea mai bilache neko ogola llene katar lengo foro? 3phenav tumenge kai iok, a i tumen te na irisailen kai o Del, i tumen ka meren. 4¿A so mislin kai gola desojto kai mule kana o cher katar o Siloe pelotar upral pe lende sea mai dosale neko ogola kai zivina ando Jerusalem? 5phenav tumenge kai iok, a i tumen te na irisailen kai o Del, i tumen ka meren.

E paramichi katar o kas simochinengo kai ni dia simochine

6O Jesus phenda lenge gaia paramichi:#Is 5.1-7; Jer 2.21; 8.13.

Iek lleno saia le iek kas simochinengo kote kai bariarela e drakha, ta llelo te dikhel dal sea simochine po kas, a ni malada ni iek. 7Ta phenda e lleneke kai arakhela e drakha:

Cheren trin burs kai me avav kai gava kas pala e simochine, a nikada ni maladem ni iek. Chinle, soke samo gia si thodo ande phuv. 8A o lleno kai arakhela e phuv phenda leke: Gazda, mukle gava burs, ka mukliarav e chik kai si truial letar ta ka thovav gosnia ande phuv. 9Golea sai del simochine. A te na dia, ondaka chin le.

O Jesus ando llive sabado sastarel iekhe diskinia nasuali

10Iek llive sabado o Jesus sikavela ande iek khanlliri e judionengi, 11ta kote saia iek diskinia kai saia nasuali desojto burs. Iek duo bilacho muklaia lake zea bange, ta nasti ortolape. 12Kana o Jesus dikhla la, ikharda la ta phenda lake:

Chei, ia san sasti katar cho nasualipe.

13Thoda pe va upral pe la, ta isto kote e diskinia ortosaili ta thoda te blagosil e Devle. 14A o gazda katar e khanlliri e judionengi jolailo, soke o Jesus sastarda la ando llive sabado, ta phenda e llenenge:#Ek 20.9-10; Dt 5.13-14.

Si sou llive te radi. Aven ande gola llivesa te aven sastarde, a na ando llive sabado.

15O Gazda phenda leke:

Kojamnalen, ¿vareko tumendar ni putarel pe guruve ta pe magarche ando llive o sabado, te inllarel le te piel pai? 16Gaia diskinia kai si katar e vicha e Abraameki ta kai o Satanas phanglaia la gale nasualimaia cherel desojto burs, ¿saia te na sastardol makar avela ando llive sabado?

17Kana o Jesus dia goia orba leke dusmanura achile ando lallao, a sa e llene veselinape kana dikhena e bare ezgode kai vou cherela.

E paramichi katar e simicha mostasaki

18O Jesus phenda:

¿Pe so mizil e charoina e Devleki ta prema so sai phene kai si? 19E charoina e milosoki si sargo e simicha katar e mostasa kai iek manus lia la ta thoda la ande chik katar pi umal, ta cherdol sargo iek kas, gia baro kai e chiriklia cheren pe kuibura pe leke krangura.

E paramichi katar e levadura

Mt 13.33

20O Jesus phenda:

¿Pe so mizil e charoina e Devleki? 21E charoina e Devleki si sargo e levadura kai lia iek diskinia ta thoda la ande iek umpa arina ta sa goia arina phukhili.

O udar tanguno

Mt 7.13-14,21-23

22Kana o Jesus llala karing o Jerusalem, sikavela ande forura ta ande forichura katar vou nakhela. 23Iek lleno puchla le:

Gazda, ¿cherricha si e llene kai ka braduin pe?

Vou phenda:

24Cheren te den katar o udar o tanguno, soke phenav tumenge kai but llene ka mangen te den, ta nasti ka cheren le. 25Kana o gazda e chereko ka ustel ta ka phandel o udar, tumen, gola kai sen avri, ka maren po udar ta ka phenen: Gazda, putar amenge. A vou ka phenel tumenge. Ni llanav katar sen tumen. 26Ondaka tumen ka phenen:

Jalam ta pilam tuia, ta tu sikadan pe droma amare foroke. 27A vou ka phenel:#Sal 6.8.

Ni llanav katar sen tumen. ¡Durion mandar, bilache llene! 28Ondaka kote ka avel o roipe ta e bari dar, soke ka dikhen e Abraame, e Isaake ta e Jakobo ta sa e profetanen ande charoina e Devleki, ta ka dikhen sar sen chudine avri.#Mt 22.13; 25.30. 29Soke ka aven llene katar suako rig, te besen te jan ande charoina e Devleki.#Mt 8.11-12. 30Ondaka nesave llene kai akana si palune ka aven e purve, ta nesave llene kai akana si e purve ka aven e palune.#Mt 19.30; 20.16; Mk 10.31.

O Jesus rovel cheres o Jerusalem

Mt 23.37-39

31Ta i avile nesave fariseura, ta phende e Jesuseke:

Llatar katar, soke o Erodes mangel te mundarel tut. 32Vou phenda lenge:

Llan ta phenen gole lisichake kai allive ta thiara ka tradau e llavolonen ta ka sastarav e nasualen, ta kai aver thiara ka getosarav. 33A allive si te phirav, ta thiara ta i aver thiara, soke inai sukar te merel iek profeta avri katar o Jerusalem.

34¡Jerusalem, Jerusalem, kai mundare e profetanen ta chalave e barrenchar e llenen kai o Del bichalel chuke! ¡Pe gachin droma manglem te chidau che chaurren, gia sar e khañi chidel pe pilichonen telal tala pe pakha, a tumen ni kamlen! 35Asunen, tumaro cher ka achel pusto, ta phenav tumenge kai ni ka dikhen man pale lligo ni ka avel o vreme kai ka phenen tumen:#Sal 118.26.

¡Blagosime gua kai avel ando anav e Devleko!

Currently Selected:

Lukas 13: BACHRO

Highlight

Copy