Matthew 7
7
Haela ae heheavaki mai
1E haela ka heheavavahaelue, haela ero heheavavahaeaki ave. 2E heheavaki la mai ero aire heheavakilai, e kavale leiki la mai hovea ero aireaki kavale leikilai. 3A kora harava apoheari ve ovohae ureve eavaki, ehovealeve ave ovohae ureve la kora hakaea a va au eavaila ha? 4A apoheari leari maeaki, Aupava, ara ave ovohae ureve la kora harava la hauavi, la hoa, kahara ave ovohae ureve la kora hakaea le aeave ha? 5Opore haela e, oropa ave ovohae ureve la kora hakaea hauavi, aire a apoheari ve ovohae ureve la kora harava hauavi auhohi eavakilai.
6Hehe eharu avita va aikararue, aitave hae kara ilaita oropa ka koavarue, ere loa haeaki ave, aeka ere aho ea avi ero vuvuraeaki ave.
Ivaiva kiva leiki mai
7Apevelavela leila, ero aireaki aiarakilai, haropaki, aireaki koarakilai, okiape va kokoeaila, okiape e v'ila hapakilai. 8Apevelavela leivahaeaki la haela oaria eharu aeakilai: haropaki la haela oaria, eharu koarakilai, okiape kokoeaki la haela oaria okiape ere v'ila le hapakilai. 9Maria, leita haela akoremari eapai ve mamaila, are have la avarakilai ha? 10Aeka ekaka ve mamaila, are ekaroa ve avarakilai ha? 11E va haela heaha akoremari meru veveke aiaraki ore la leivahaeakilava, eve kaia ve Oa iele havahu eharu mekaka arero apevelavela leivahaeaki la haela aiara va ka ha?
Pupu ve ipi iele
12Laelave, e va ikivere haela ero leivahaeaki la mai, e kara erero leivahaeaki. Pupu peroveta ila ve oharo ve iele ma.
Okiharo orahokaila
13Okiape koko hekai ve arahavaki, ehovea apihaeaki ukai ve la okiape huraha iele, okiharo kara hurahapo iele, haela perehekai oaria leia ve arahavalula. 14Ehovea ovokake ve la okiape koko hekai, okiharo kara kere hekai, la okiharo haela uku hiki koarailula.
O iele i Opore ila
15E va opore peroveta haela kiva leiki, ere ero kai ekeki mamoe iilu pura ila, aka ereve ureve viva aeha iele hovea. 16E ereve hae ve erero ore leivahaeakilai. Haela vine hae mamareke kora ve ikaealula ha? Aeka suke hae hohe mamareke ve ha? 17Kaire, kora veveke areve hae kara veveke: kora heaha areve hae kara heaha. 18Hae heaha kora veveke ve horeravahaea va ka. Hae veveke kora heaha ve kara horeravahaea va ka. 19Hae mekaka horeavaki aue la kora oaria ere hahaeapui a ve huavakilai. 20Laelave, e va ereve hae ve erero ore leivahaeakilai.
Oharo i horova ila
21Araro Amua e, Amua e, oharo maeaeaki la haela oaria hareho kaia ve basileia arahava va ka. Arave kaia ve Oa ve ikivere mai leivahaeaki la haela hiki. 22Aireaki la hare haela oaria araro mari kimaeakilai — Amua e, Amua e, ela ave rare ve peroveta oharo au avahaila ha? Ela ave rare ve ove heaha va au haruapaila ha? Ela ave rare ve horova veveke oaria au leivahaeaila ha? 23Ara va la haela mari maeaeakilai — ara ero ore au leivahaeaila, e mai heaha leilula haela, ita lahua auila.
Ipi orahokaila
24Laelave — arave ma oharo iapai leiki la haela are uvi have akea ve kupe la ikiore haela hovea. 25Lai ihaupe, ita haa hape, mea eapapo kivikape, uvi avilaeape, uvi au hilauila, ehovea are have akea ve kupe. 26Arave ma oharo iapai leiki aue la haela, are uvi miri horo ve kupe la ikihaveva haela hovea. 27Lai ihaupe, ita haa hape, mea eapapo kivikape, la uvi avilaeape, uvi la marurape, kopararapai heaha iele.
28Iesu ma oharo kari keipe la hoa, haela oaria areve iroro oharo ve ikihorahora leivahaeape. 29Ehovea are erero kileavahaeape la oharo aheke iele, pupu haealula haela ve la oharo hovea ka.
Currently Selected:
Matthew 7: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
