Matthew 8

Leper haela lei makuripe

1Are kela ve kihoaupe la hoa haela oaria arero airekai auvahaeape. 2Iapaki. Leper haela haroapo arero kai iki areve oropa ve ekaopape: are mari maeape, Amua e, a ikivere la leikilava, a va araro veveke leikive ore. 3Iesu mai avihorapai arero mai kohari mari maeape, Ara ikivere, a veveke leiki. Areve leper maea elavelave veveke leipe. 4Iesu arero mari maeape, A haela ae kavaealue: aula, ave maea oharo haela amoeakive, Mose ereve ihova ve maeape la meru kara avarakive.

Centurion ve horova haela lei veveke leipe

5Iesu Capernaum ve hoaupe la hoa, maora hevehe ve captain haela iki arero velavela leipe maria: 6Amua e, arave horova haela uvi le aeave, epe apo heheva la maea leive, maea heaha iele. 7Iesu arero mari maeape, Ara v'aukilai arero lei makurikive. 8Captain haela kavale maeape: Amua, ara va hovea ka a arave uvi ureve pekakive, a oharo hiki maela, arave horova haela lei makurikilai. 9Ehovea ara kara oharo aheke haela, ara va maora hevehe haela oaria akea ve. Ara haroapo mai, Aula, are aukilai; ara haela ae mai, Ekela, are ekekilai; ara horova haela mai, Leila, are leikilai. 10Iesu la oharo iapai ikihorahora eapapo leipe. Are areve aireaki auvahaeape la haela maeaeape, O iele, ara ero maeaeaive, ara haela ve ikikekela maria va au koaraila Israel ve hoa. 11Ara ero maeaeaive Kauri ukaki haela, hurava ukaki haela oaria aireaki ekevahaeakilai, ere Abraham, Jacob, Isaac ila Kaia ve basileia ureve hareho korukaiavahaeakilai. 12Ere basileia ve akoremari mahokaea ve la murumuru ve huikapai haeakilai — leia ere va hivavara i kao heheava, haeakilai. 13Iesu maora hevehe captain maeape, Ave ita aula, a iki la kekelaila hovea, a ve laria leikilai. Areve horova haela la hoa havahu veveke leipe.

Simon ve uva ve lou: haela oaria kara

14Iesu Peter ve uvi pekape la hoa are areve uva ve lou maea ila eaeavila eavape. 15Are areve mai koharape, areve maea heaha le havoavape, are urai erero kiva leivahaeape. 16Hailaea hoa ere ovehahu ila la haela oaria areve leia kari auvahaeape. Ovehahu areve oharo iapai le titavape, maea haela oaria kara are lei makukuri mekaka le leivaheape. 17Ehovea Isaiah peroveta haela maeaeape la oharo iele leikive maria, Are havahu elave kakare oraiavape, elave heaha oaria kara avape.

Kilea haela ve okiharo iele

18Iesu haela oaria arero elari hupakai la eavi ukai elahukakive maeaeape. 19Pupu haeavila haela aea iki arero mari maeape, Haelapo e, ave la okiharo oaria ara aro koarai veakilai. 20Iesu arero kavale maeape, Viva ka ura ila, ori ka loro ila, kahara, haela ve Akore areve haro koraki aihari karia. 21Kileaki haela ae arero maeape, Amua e, ave iki lehae, ara oropa arave oa la iha. 22Iesu arero maeape, Araro airekai ekela: apihaea haela ere havahu ve apihaea haela ihahakilai.

Ahea ma here leipe

23Are vevaea horeai, areve kilea haela kara arero koarai horeape. 24Iapai, ahea ma ve, avara hareavi ekepe: ehoveala ma loru ehoaha vevaea le havuopape. Kahara, are avuku. 25Areve kilea haela iki arero hurapape, ere arero mari maeape, Amua e, elaro lei ovokake leikive, ela ma ihahaki ave. 26Are erero maeaeape, E va leve oaoka ra leiro? Eve iapa hekai iele. Kahara are urai mea i ma ila oharo maeaeape, ere here le leipe. 27La haela ikihorahora eapapo leivahaeai mari ape: Ma le haela? Mea i ma ila va areve oharo le iapai.

Gerasene ovehahu ila haela

28Are ukai poe Gerasene haela ve la ita pekape, la hoa ovehahu ila haela orahokaila arero koarape, erealila va kapu ita ve kihoreavape, aeha eapapo, ehoveala haela oaria la oki aukive oaoka hiki. 29Iapai: erealila āra hai itavape maria, Elalila aro learia leikilai, Aualari ve Akore e? A va maia lakilaila ehovea elaro haruapakive ha? Elave hoa are. 30Erero perehekai apehai ve ilaita oaria ita haroapo eapai lalavahaeape. 31Laelave, ovehahu arero apevelavela leipe maria, A elaro ra haruapakilava, elaro la ilaita ureve paparaehakive. 32Are erealilaro mari maeaeape, Auila. Ere hoahukape, ilaita ve ureve le arahavape. Iapai, ilaita oaria hareho kela ita ve hahapa harava le hukai hoahukape, ma haru ve le ihahape. 33Ereve kiva haela oaoka lai le hukaupe, karikara ureve la oharo oaria hihika kileavahaeape, la ovehahu ila haela leipe la eharu oaria. 34Iapai: Karikara haela oaria hareho Iesu kai kihoreavape, ere arero ovohae eavape la hoa ere arero ahilape maria — ereve la ita elavelave harepai aukive.

Currently Selected:

Matthew 8: ORO

Highlight

Copy