Matthew 6
6
Muruhari meru mai
1Kiva leila, eve meru haela oaria oropa ve hihika aikararue, e va laria la leikilava, e va kaia ve Oa ve kavale veveke aireaki aea va ka.
2Laelave, a va meru avaraki la hoa, puva ave oropa kahohoalue, opore haela synagogue ureve, karikara hihi ve leilula hovea, ehovea haela erero momorapukive. O iele, ara ero maeaeaive, ereve kavale ere mave avaro. 3A va meru avaraki la hoa, ave mai keva ukai ave mai ore ukai ve horova kakilealue. 4Ave meru oaria muruhari hiki la apeakive, ave muruhari aeavila la Oa aro kavale hihika leikilai.
Muruhari ivaiva
5A va ivaiva leiki la hoa, ava hehepo leilula haela hovea kalailue, ehovea ere ikivere eapapo synagogue ureve, karikara hihi ve ila ivaiva leikive, haela erero ovohae eavakive. O iele ara ero maeaeaive — ereve kavale ere mave avaro. 6Kahara — a havahu ave ivaiva leiki hoa, ave lalava ureve araeakive, okiape kokaukakive, ave muruhari Oa ivaiva leikive: ave muruhari ovohae eavavila la Oa aro kavale hihika leikilai.
7E va ivaiva leiki la hoa, aeka oharo kailue, kai aireaki kailue, ita lahua haela ve mai hovea, ehovea ereve ikikekela Aualari, ehovea ereve oharo oaria, ereve la oharo iapakilai. 8E oaria erero hoveahovea kalaivahaealue, ehovea eve Oa eve ikivere eharu ore overa leipe.
Amua ve Ivaiva
9E va ivaiva mari leikive:
Elave Oa kaia akea,
Ave rare hehe iele leikive.
10Ave basileia ekekive,
Ave ikivere mai
Meahaiapo ka kaia ila hoveahovea leikive,
11Ma hare elave eapai elaro aikiarakive.
12Ela havahu haela ve ape karava hapururukaki hovea,
Elare kara laria hapururukakive.
13Amuraeharae ita elaro kari kaulue:
Elaro mai heaha ve lei makukurikive:
Ehovea basileia ave,
Aheke ave, Morapaea va ave,
Aiai kari lei va ka, Amene.
14E va haela ve mai heaha halapurukakilava, eve kaia ve Oa eve mai heaha kara hapururukakilai. 15E va haela ve mai heaha ka hapururukakue la leikilava, eve Oa kara eve mai heaha hapururuka va ka.
Ere erereaki mai
16Aeka oharo mae — e va eapai ere ereavakilava, e va hehepo leilula haela ve oropape ikihuru hovea kalailue. Ehovea ere oropape here‐maea leilula, ereve ere ereavaki mai haela ve oropaki hihika leikive. O iele ara ero maeaeaive — ereve kavale ere mave avaro. 17A havahu ave ere erereaki hoa haro la‐apu paeaki, oropape ka huhelaki: 18Ave ere erereaki mai haela oropa ve hihika leiki ave: ka ave muruhari Oa ve oropa hiki, ave muruhari eavaki la Oa aro kavale hihika avarakilai.
Erohoho iele
19Erohoho eharu meahaiapo ve kakorukaialue, leia ihoko i apu ila erero poae leikilai, korea haela kara kovaelai korea leikilai. 20E ve erohoho kaia ve korukaiakive, leia ihoko i apu ila eharu lei poae lei va ka, korea haela kara kovaelai korea lei va ka. 21Eve erohoho apeaki la ita e va leia hiki kekelakilai.
Ovava i mea muru ila
22Maea ve ovava ovohae — ave ovohae ehoe la leikilava, ave maea oaria hareho ovava leikilai. 23Ave ovohae heaha la leikilava, ave maea oaria hareho muru le leikilai. E va ureve aeaki la ovava muru la leikilava, la muru muru apo havahu.
24Haela haroapo amua orahokaila ve horova leiki hovea ka. Are haroapo haure leikilai, haroapo ikiheroe leikilai, aeka are haroapo ikivere leikilai, ae va haroapo hakurepakilai. E va Aualari mamona ila ve horova hoa haroapo leikive hovea ka.
Iki heraho: Aualari ve ikikekela
25Laelave, ara ero maeaeaive: eve ovokake iki mari ka kekelarue — e va le eapai larilai, ae ka le ma larilai, ae ka eve maea ve kara, iki mari kakekelarue, e va le pura oreaukilai. Ovokake are eapai oropa ve ka ha? Maea are pura oropa ve ka ha? 26Ori merava ovohae eavaila — ere eapai apoporau va ka, aeka hae ikaea va ka, eapai ere uvi kara korukaia va ka. Kahara, eve kaia ve Oa ereve eapai erero aiaravila. E va erero akea va ka ha? 27Leita haela ve ikikekela areve maea ve heaikiapo are havahu perehekai koperereakilai ha? 28E va pura ve ikihorahora ehovealeve ha? E va kora mere titaeka ikikelavaila, ere va learia aheaulula ha? Ere va horova lei va ka, pura kara he va ka. 29Kahara, ara ero maeaeaive, Solomon havahu, areve maupa eapapo, ma kora mere ve maupa hoveahovea au leila. 30Laelave — Aulari huakara ve la hohe ve maupa la leikilava, hare ae kemo ureve paraeaki la hohe, are ero pura ra aiarava ka ha, e iapaki aue haela e! 31Ehoveala, iki mari ka kelavarue — ela va le eapai larilai, ela va le ma larilai ha? Ela va pura leari le aeakilai ha? 32(Ehovea ita lahua haela ma eharu oaria haropalula hiki.) Eve kaia ve Oa ore overa leipe e va ma eharu oaria ikivere. 33E va oropa Aualari ve basileia haropaki, areve mai ehoe kara: aeka eharu oaria are ero aireaki aiarakilai.
34Laelave — opoa ve ikihorahora kalailue. Ehovea opoa hare are havahu ve eharu ikikekelakilai. Hare haroapo areve heaha la hare hoveahovea.
Currently Selected:
Matthew 6: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
