Matayo 23

Ukwiyangalila na vawulanidzi va milagililwe

(Maluko 12:38-40; Luka 11:37-52; 20:45-47)

1Neke uYesu alilongelage ililugu lya vaanu na vanyigendwa vaakwe atigilage, 2“Avawulanidzi va milagililwe na Vafwalisayo vali nu wutawulilwe wa kuvaganulila avaanu imilagililwe gya Mose. 3Lino mwinatilage nu kugagendela amadzwi gonda ge vakuvawulanidza. Neke kangi mutanage ukwiga amalimo gaawo, pakuva aveene vasiilima nu kugendela dze viiwulanidza. 4Aveene viiwopa ifitegulo ifisiikwinulika#23:4 Ifitegulo ifisiikwinulika Avawulanidzi va milagililwe na Vafwalisayo voongeledzaga imivedzehedze gya vakuhwawo pamwinga ni milagililwe, lwe lwene avaanu vaabaabaga ifitegulo ifisiikwinulika. nu kuvapagidza avaanu mu mavega, neke kangi vaveene vasiigolosa nambe kyala kya liwoko, ukuta vatange ukunyamula. 5Aveene viilima amalimo gonda ago, ukuta viiwoneese pa miiho ga vaanu. Kangi viifwala ku miiho na mu mawoko utubogolo twa ngʼingo utukomi#23:5 Utubogolo twa ngʼingo utukomi AVayahudi avamwadaada pe viifuunyaga, vaafwalaga utubogolo uto ku miiho na mu mawoko, mwe vaaviikile fikelo fya Wusimbe uWiimike ukuviiwusa imilagililwe gya Nguluvi, Lwiwuko 6:8. ukulutila avangi, ni midzivo#23:5 Midzivo AVayahudi avamwadaada pe viifuunyaga, vaafwalaga imyenda iginya midzivo gyoloofu, nagula mudzivo gwaviiwusaga ululagililwe lumwinga lwa Nguluvi, Mbalilo 15:37-41. gya myenda gyawo mitaali giilembela ukulutila avangi. 6Kangi viikeela ukwikala apoono pa wutambule mu ngʼeelanilo nu kwikala mu fideego ifya wutambule mu nyolanilo. 7Kangi viikeela ukuhungilwa nu luginiyo, pe viigenda mu magulilo nu kukemeelwa muwulanidzi.

8“Neke kangi unyeenye mutanage ukwiginiya ngana vakuvakemeela viitigila, ‘Ve muwulanidzaave,’ pakuva muli nu Muwulanidzi yumwinga swe na yuunye nyivonda muli vanyigendwa. 9Kangi mutanage ukumukemeela umuunu ye avedzaga ukutigila, ‘Ve daada,’ mu nyi umu! Pakuva muli nu Dadiinyo yumwinga swe ye ali kukyanya. 10Kangi mutanage ukwiginiya ngana avaanu vakuvakemeela unyeenye viitigila, ‘Ve mulongodzaave,’ pakuva muli nu Mulongodzi yumwinga swe ye Mesiya. 11Umuunu ye avedzaga ye iisaka ukuvedza mukomi veenyo, avedzage mulimila-vangi va vangi. 12Pakuva umuunu ye avedzaga ye akwiyinula, uNguluvi akumwisa. Neke kangi umuunu ye avedzaga ye akwiyisa, uNguluvi akumwinula.

13“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Wiimila wa mbulanidzo dzeenyo mukuvatanidza avaanu ukwingila ku wutwa wa kukyanya. Unyeenye musiliingila umo, kangi musikuvatawula avaanu avangi aviisaka ukwingila.

[14“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Mukuvadzanga avafwile na vagoosi wugendela wa kunyamula imaale dzaawo, nu kulapangila indapangilo naali hiilo, ukuta muwoneke muli vagolofu ku vaanu. Wiimila wa idzo, uNguluvi alavapeela uluhigo lukali hiilo.]#23:14 Amadzwi aga simoogali mu wusimbe uwungi uwa kataali.

15“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Pakuva mwipilima mu nyi ngʼafu nu kulowoka inyandza, ukuta mumuhambuse umuunu ye asili Muyahudi avaniniilage mu mivedzehedze gyenyo. Neke kangi, wone mumupituse umuunu uyo, mukumuhambusa avedze mulima-ndzanangifu ukuvalutila unyeenye.

16“Muli nu lukali unyeenye valongodzi vabofuanye! Pakuva mukuvawulanidza avaanu mwitigila, ‘Ngana umuunu iiyiigila itembeli, asiiwopwa nu luyiigo lwakwe. Neke kangi, ngana iiyiigila isahabu iyigenda mu tembeli, umuunu uyo iisakulwa alimage ngita kye áyiigiye.’ 17Unyeenye muli vabofu kangi vapufi! Kiinu kiki ikikomi ukulutila ikingi? Ongo, ye sahabu iyo iyigenda mu tembeli, enewuli itembeli iyiihulila isahabu ukuvedza ndzimike? 18Kangi mukuvawulanidza avaanu mwitigila, ‘Ngana umuunu iiyiigila ilitaawa lya kiteekelelo kya mu tembeli, iyo si nongwa. Neke kangi, ngana iiyiigila uwusembe uwuli pa kiteekelelo, umuunu uyo iisakulwa alimage ngita kye áyiigiye.’ 19Unyeenye muli vabofu! Kiinu kiki ikikomi ukulutila ikingi? Ongo, we wusembe uwo enewuli ikiteekelelo ikyo, ikiihulila uwusembe wuvedzage wiimike? 20Lwe lwene, ngana umuunu iiyiigila ikiteekelelo ikya pa tembeli, iiyiigila ikiteekelelo pamwinga ni fiinu fyonda ifigenda pakyanya apaakwe. 21Kangi ye avedzaga ye iiyiigila itembeli, iiyiigila nu kwa Nguluvi ye akwikala umo. 22Nave umuunu ye iiyiigila ikyanya, iiyiigila ni kideego kya Nguluvi pamwinga nu Nguluvi ye akwikala apo.

23“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Pakuva mwikwinatila ukutawula uwusembe kwa Nguluvi ilifungu limwinga mu mafungu likyumi limwinga (1/10) nambe lya fihato ifidebedebe ngita imbwiga ni nyungu. Neke kangi mwibedalila amadzwi amakomi ga milagililwe, kwe kutigila uwugolofu, ulupyana nu kuvedza vanya kuhuuvilwa kwa Nguluvi nu kwa vaanu avangi. Lino mwisakulwa ukulima ingʼaani idzo, kingaya kuleka ukutawula uwusembe uwo. 24Muli valongodzi vabofu! Pakuva mwihuudza utuhaadzi mu finyuwo fyenyo, neke kangi mwimila ingamila!#23:24 Mwihuudza utuhaadzi mu finyuwo fyenyo Kwe kutigila, vaakomandzaga hiilo amadzwi amadebedebe ga milagililwe. Neke kangi mwimila ingamila Kwe kutigila, vaalemwaga ukulufika ulwa madzwi amakomi ga milagililwe.

25“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Unyeenye muli ngita ikinywelo ni fitonga fye mwivaladza mwivala hela, neke kangi mugati mu numbula dzeenyo, múmemile ikyoyo nu wuliya hiilo. 26Unyeenye Vafwalisayo vabofuanye! Muvaladze tandi mugati mu kinywelo ni kitonga, ukuta mwivala namo fivedze fyelu.

27“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Pakuva muli ngita mombwe dze viihiliva ingeesi, kye dziiwoneka nofu mwivala, neke kangi mugati dzímemile amadzege ga vaanu avaafuwe nu waafu uwuli poloofu. 28Luli ewo, na yuunye mwiwoneka mwivala ku vaanu ukutigila vagolofu, neke kangi mugati mu numbula dzeenyo, múmemile wukedusi nu wuhosi.

29“Muli nu lukali unyeenye vawulanidzi va milagililwe na yuunye Vafwalisayo, vakedusaanye! Pakuva mwidzengela imombwe dza vavidzi va Nguluvi nu kupomba wunofu imombwe dza vagolofu. 30Kangi mwilonga mwitigila, ‘Ngana uneefwe twali tuvedzage apo mu misika gya vakuhwesu pe vaali vuumi, ngali tusihangiine navo ukuvakoma avavidzi va Nguluvi.’ 31Pa kulonga ewo, mwiwoneesa ukutigila, na yuunye muli vahosi ngita avakuhwenyo vala avavakomile avavidzi va Nguluvi! 32Lino mukwilidzage uwuhosi wula we vaavangisiidze avakuhwenyo!

33“Unyeenye ye muli ngita ndzoka, na yuunye va kivegalo kya ndzokaanye! Muhadza mwikuluka wuli uluhigo lwa Nguluvi ulwa kuvatoodza mu mooto ugusiidzima mbeepali? 34Wiimila wa ulo, ndikuvatuma ukwenyo avavidzi va Nguluvi, avaanu avanya luhalawukagudzi na vawulanidzi va milagililwe. Neke kangi avangi mu vaanu avo, muhadza mukuvakoma nu kuvatovelelela pa kipindulihidzo. Avangi muhadza mukuvatova ni mikopodzi mu nyolanilo dzeenyo, na vangi muhadza mukuvadaga ukuhuma uwudzenge ukufikila uwudzenge uwungi nu kuvapumusa. 35Ndeeni, uNguluvi alavahiga unyeenye wiimila wa vagolofu vonda avo ve mwavakomile mu nyi, ukuvangila uKayini pe amukomile uHebeli, ye asaali ni nongwa yiyivedzaga,#Wutalilo 4:8 ukufikila uSakalya umuswamuve va Balakya, ye aakomiilwe pagatinagati pa Piimike ni kiteekelelo mu tembeli.#2 Misika 24:20-22 36Ndakyene ndikuvalongela ndiitigila, uNguluvi alavahiga avaanu va kivegalo iki wiimila wa dzonda idzo.”

UYesu akuwuvembela uwudzenge wa Yelusalemu

(Luka 13:34-35)

37Neke uYesu atigilage, “Yelusalemu, Yelusalemuave! Uveeve ye ukuvakoma avavidzi na vangi avaatumiilwe ukwako, ukuvatova na maganga. Ndikaasakiige ndivalundase avaanu vaako nyakoloofu, ngita ngʼuku kye yaayilundasa ifyana fyakwe mu mapiko gaakwe, neke kangi musaasakile. 38Lolage! UNguluvi akuvaleka unyeenye ni nyumba yeenyo! 39Ndakyene ndikuvalongela ndiitigila, musilaambona kangi ukufikila umusika pe mulaatigila, ‘Áfuunyiliilwe ye iikwadzila mu litaawa lya Mutwa Nguluvi!’#Ndzimbililo 118:26 ”

Currently Selected:

Matayo 23: BEZ

Highlight

Copy