Matayo 22
22
Ulukeelanilo lukomi
(Luka 14:15-24)
1UYesu iiginaga ukuvawulanidza avateekedzi avakomi na Vafwalisayo mu fihwananidzo ifingi iitigilaga, 2“Uwutwa wa kukyanya wiihwananidzwa nu mutwa yumwinga, ye aagelaniidze ulukeelanilo lwa noolane ya muswamuve. 3Umutwa uyo iitumaga avalimila-vangi vaakwe vakavakemeele avalaalikwa ukutigila vaadze ku lukeelanilo, neke kangi aveene vakaanage ukwadza.
4“Akuvatumaga kangi avalimila-vangi avangi, akuvalongelaga iitigilaga, ‘Muhelele mukavalongele avo ve ndikavalaaliike ukutigila, “Ndígelaniidze ifiinu fyonda ifya lukeelanilo lwa noolane. Ndíhindzile isenga ingʼambako ídziipaamiye hiilo. Mwadzage ku lukeelanilo!” ’ 5Neke kangi avo avaalaaliikwe vasaaweene kiinu. Viihelelaga ku malimo gaawo, yumwinga iihelelaga ku mugunda gwakwe, uyungi ku wudzuluusi waakwe. 6Avangi vakuviibataga avalimila-vangi avo, vakuvatovaga hiilo nu kuvakoma. 7Umutwa uyo pe aapuliike ídzilimiike ku valimila-vangi vaakwe, iiviipaga hiilo. Iitumaga avakolakyanda vaakwe vakavakome avawuladzi avo nu kunyaanya uwudzenge waawo.
8“Neke umutwa uyo avalongelage avalimila-vangi vaakwe atigilage, ‘Ifiinu fya lukeelanilo fígelaniidzwe, neke kangi avo ve ndikavalaaliike vasikaavagiye ukwadza. 9Lino muhelele mu finya malekano, mukavalongele vonda ve mwitaangʼana navo ukutigila, vaadze ku lukeelanilo.’ 10Avalimila-vangi avo viihelelaga mu finya malekano, viipilukaga na vaanu vonda ve vátaangʼiine navo, avahosi na vanofu. Neke nyumba ya lukeelanilo yimemage vagendzi.
11“Neke kangi umutwa uyo pe iingiye mu nyumba iyo, ukuta avawone avagendzi, akumuwonaga umo umuunu yumwinga ye asifwalile umwenda gwa lukeelanilo. 12Akumuwuudzaga iitigilaga, ‘Ve mudzeelaave! Uveeve wíingiye wuli umu ve usifwalile umwenda gwa noolane?’ Neke kangi umuunu uyo alemwage ulwa kulonga. 13Umutwa uyo akuvalongelaga avalimila-vangi vaakwe iitigilaga, ‘Mumupinge umuunu uyu amagulu na mawoko, mumutoodze kwivala ku kiisi, uko kwe kwene kwe ahadza iivedza ni ngʼuuto nu kugeledzula amiino.’ ” 14UYesu iimaliidzaga iitigilaga, “Pakuva uNguluvi aaikemeela avaanu voloofu ukwingila ku wutwa waakwe, neke kangi vakeefu vaavihaagulwa ukwingila.”
Ukuhomba ikodi kwa Kayisali
(Maluko 12:13-17; Luka 20:20-26)
15Neke aVafwalisayo vahegage uko, vahelelage kulongana ngita kye vahadza vakumutegandza uYesu mu madzwi gaakwe. 16Neke vavatumage kwa Yesu avanyigendwa vaawo pamwinga na Vahelode,#Matayo 12:14 vakamuwuudze viitigila, “Muwulanidzaave, twidzeela ukutigila uveeve uli muunu va ndakyene. Wiiwulanidza idza ndakyene ku vaanu valimage ngita kye iisaka uNguluvi. Kangi usikuwoogopa nambe wutambule we vali nawo, pakuva usiilola kye vagenda. 17Lino utulongele mwe wiiwonela. Ongo, lwikwidikwa uneefwe ukuhomba ikodi kwa Kayisali,#22:17 Kayisali Ili lye litaawa lya mutwa mukomi, umutemi va Valoma. Umusika ugo, inyi ya Isilaheli yaali mu wutemi wa Valoma. enewuli lusiikwidikwa?” 18Neke kangi uYesu awudzeelage uwugulume waawo uwuviifu, avahigage atigilage, “Nye vakedusaanye! Kye kiki mukuungemya? 19Muumboneese iligoobeli lye mwihomba ikodi.” Navo vakumupeelaga iligoobeli lya dinaali#22:19 Dinaali Aga gaali magoobeli ga Valoma. Idinaali yimwinga yaalingʼiine nu luhombo lwa mulima-malimo mu kigono kimwinga. yimwinga. 20Neke uYesu avawuudzage atigilage, “Uluhwano ni litaawa ifili mu ligoobeli lya dinaali iyi, fya ani?” 21Aveene viihigaga viitigilaga, “Fya Kayisali.” UYesu akuvalongelaga iitigilaga, “Lino ifya Kayisali mumupeelage uKayisali, ifya Nguluvi mumupeelage uNguluvi.” 22Pe vaapuliike ulupiluso lwa Yesu, viidzumaga mbandu. Neke vamulekage baaho, vahegage.
UYesu iiwulanidza ulwa ludzulubuko lwa vaanu
(Maluko 12:18-27; Luka 20:27-40)
23Mu kigono kiikyo, aVasadukayo vamwinga vaaheliye kwa Yesu. Avo ve veene avasaafuuwaga ukutigila, kooluli uludzulubuko lwa ávafuwe. Vakumuwuudzaga uYesu viitigilaga, 24“Muwulanidzaave, uMose aalagiidze mu milagililwe ukutigila, ‘Ngana umugoosi áfuwe, ámulekile umudala vaakwe kitamubaabihidza mwana, apo umunungʼuve amuhaalage umufwile uyo, ukuta amubaabihidze avaana uyo ye áfuwe.’#Lwiwuko 25:5-6 25Lino vaali koovali avanyalukolo mufungʼati (7) avaali vaana va mwadaada yumwinga. Uva kutala aatoolile umudala, iifuwaga kitamubaabihidza vaana, neke umunungʼuve amuhaalage umufwile uyo. 26Umunungʼuve iifuwaga kitamubaabihidza vaana. Lwivedzaga ndeeni na ku va wudatu ukufikila uva mufungʼati. 27Pambele umudala umufwile uyo nave iifuwaga. 28Lino utulongele, ngana kulaavedza nu ludzulubuko lwa ávafuwe, umufwile uyo ye aahaaliilwe ku vagoosi vonda mufungʼati, alaavedza mudala va ani? Pakuva aatawiike ku vagoosi vonda mufungʼati!”
29UYesu akuvahigaga iitigilaga, “Mwiyagila muumo, pakuva musiidzeela uWusimbe uWiimike nambe ngufu dza Nguluvi. 30Pakuva ávafuwe umusika pe valaadzulubuka, vasilaatoola nambe kutawuka, nda haamu, valaavedza ngita vanyamwandza va kukyanya. 31Neke kangi mu mola ya kudzulubuka ku ávafuwe, ongo, musinaa mwimba mu Wusimbe uWiimike kye avalongiye uNguluvi? Iitigila, 32‘Uneene nde Nguluvi va Abulahamu, uIsaka nu Yakobo.’#Kuhega 3:6 Umwene si Nguluvi va ávafuwe, nda haamu va vuumi!” 33Ililugu lya vaanu pe lyapuliike idzo, liidzumaga hiilo wiimila wa mbulanidzo dzaakwe.
Ululagi ulukomi ukulutila dzonda
(Maluko 12:28-34; Luka 10:25-28)
34AVafwalisayo pe vaapuliike ukutigila uYesu avadzisiidze aVasadukayo mu madzwi gaakwe, viilundanaga pamwinga. 35Yumwinga mu Vafwalisayo avo ye aali muwulanidzi va milagililwe gya Mose, akumugemyaga uYesu ukumutegandza, akumuwuudzaga iitigilaga, 36“Muwulanidzaave, mu milagililwe, luli kwi ululagi ulukomi ukulutila indagi dzingi dzonda dza Nguluvi?” 37UYesu akumuhigaga iitigilaga, “ ‘Umwendage uMutwa Nguluvi vaako ni numbula yaako yonda, nu wuumi waako wonda nu luhala lwako londa.’#Lwiwuko 6:5 38Ululagi ulo lwe lukomi ukulutila indagi dzingi dzonda, kangi lwe lwa kutala mu milagililwe. 39Ululagi lwa kavili lwihwanana nu lwa kutala, nalo lwitigila, ‘Umwendage umuyago ngita kye ukwiyenda yuuve.’#Valevi 19:18 40Imilagililwe gyonda igya Mose ni mbulanidzo dza vavidzi, dziihuuvila indagi dzivili idzo.”
UMesiya ye Muswamuve va Dawudi kangi Mutwa
(Maluko 12:35-37; Luka 20:41-44)
41Umusika aVafwalisayo avo pe vapila válundiine pamwinga, uYesu akuvawuudzaga iitigilaga, 42“Mwihoodza wuli ulwa Mesiya? Muswamuve va ani?” Viihigaga viitigilaga, “Umwene ye Muswamuve va Dawudi.” 43UYesu akuvawuudzaga iitigilaga, “Ngana idzo dza ndakyene, luli ndawuli uDawudi, ye aalongile wugendela mwa Mubepo uMwimike, akumutambula uKilisiti ukutigila Mutwa? Pakuva uDawudi aalongile ukutigila,
44‘UMutwa Nguluvi amulongiye uMutwa vangu ukutigila,
“Wiikale ulubali lwangu ulwa kundiyo,#22:44 Wiikale ulubali lwangu ulwa kundiyo Kwe kutigila, uYesu iitemasa nu Nguluvi.
ukufikila pe ndiivedza ndívadelwidze avatavangwa vaako,
nu kuvaviika paanyi pa ndzayo dzaako.” ’#Ndzimbililo 110:1
45“Wiimila wa idzo, ngana uDawudi akumutambula uMesiya ukutigila Mutwa, apo uMesiya iivedza muswamuve wuli?”#22:45 Kwe kutigila, wiimila wa kuvedza Mesiya, uYesu ye mukomi mbandu ukulutila uDawudi. 46Sikwali umuunu ye amuhigile kiinu uYesu. Kangi ukuhuma umusika ugo, sikwali umuunu ye aagelile ukumuwuudza uYesu imbuudzo dzingi.
Currently Selected:
Matayo 22: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
