Matayo 24

UYesu iilonga ulwa tembeli

(Maluko 13:1-2; Luka 21:5-6)

1Neke uYesu ahumage mu lipaala lya tembeli. Avanyigendwa vaakwe vakumuhelelelaga, ukuta vamuwoneese itembeli ni nyumba idzingi ídziyipiliime. 2Neke kangi uYesu avalongelage atigilage, “Mukudziwona dzonda idzi? Ndakyene ndikuvalongela ndiitigila, sikoolili nambe liganga limwinga ililaasigala pakyanya pa liyagwe. Amaganga gonda ago galaakunamulwa!”

UYesu iilonga ulwa nalamu ni mumuko

(Maluko 13:3-13; Luka 21:7-19)

3UYesu pe iikalile pa Kidunda kya Miseyituni, avanyigendwa vaakwe vamuheleliye veene, vakumuwuudzaga viitigilaga, “Utulongele, dzilaahumila ndali dzonda idzo? Kangi ikimanyilo kiki ikilaawoneesa ukwadzila kwako nu wusililo wa misika?”#24:3 Lwiwoneka ukutigila, uYesu iihiga imbuudzo idzo mu ndimbili idza 27-28.

4UYesu akuvahigaga iitigilaga, “Muvedzage miiho, umuunu ye avedzaga atanage ukuvadzanga! 5Avaanu voloofu valaadzila mu litaawa lyangu, kangi valaatigila, ‘Uneene nde Mesiya,’ valavadzanga voloofu. 6Mu musika ugo mulaapulikaga imola dza magoha ni mwepo dza magoha. Mwali mutanage ukwituunidza, pakuva idzo dzinya kuhumila, neke kangi uwusililo uweene wulaavedza waave ukwadza. 7Inyi yimwinga yilayaaluka inyi iyingi nu wutwa wumwinga wulawaaluka uwutwa uwungi. Kulaavedza ni filindima ni lipunge fivala fivala. 8Dzonda idzo dzilaavedza we waamulilo wa wuvafi ngita wa kuhola umwana. 9Unyeenye mulaasindikwa kupumuswa nu kukomwa, kangi avaanu va nyi dzonda valavasuula, pakuva muli vanyigendwa vangu. 10Mu musika ugo, avaanu voloofu valaaleka ukuuniniila. Valiisutula nu kwisuula veene mwa veene. 11Kangi valaahumila avavidzi voloofu va wudesi nu kuvadzanga avaanu voloofu. 12Wiimila wa wuhosi úwuginaliye hiilo, avaanu voloofu valaaleka ukuveenda avangi. 13Neke kangi umuunu ye avedzaga ye aliigugumidza ukufikila ku wusililo, uyo ye alaapokwa. 14Kangi iMola iNofu dza wutwa wa kukyanya dzilaadalikwa mu nyi yonda, ukuta dzivedze woolesi ku vaanu vonda, apo pe peene pe wulaahumila uwusililo wa misika.

Ifigono fya mumuko ingomi

(Maluko 13:14-23; Luka 21:20-24)

15“Umusika gwikwadza pe mulaluwona ‘uluviifyo lwa wanandzi’#Danyeli 9:27; 11:31; 12:11 lwímile aPiimike mu tembeli.#24:15 APiimike mu tembeli Lole Itembeli ku Figanulo. Idzo dzaalongiilwe nu muvidzi uDanyeli. Lino umuunu ye avedzaga ye iikwimba amadzwi ago, alufikage. 16Umusika ugo, avaanu vonda avakwikala mu nyi ya Yudeya, vaali vanyililage ku fidunda. 17Nave ye ali kukyanya ku likiingʼa lya nyumba, iikage nu kunyila, aali atane ukwingila mu nyumba, ukuta anyamule ifiinu fyakwe. 18Nave ye ali ku mugunda, aali atane ukupiluka ku nyumba kunyamula ilikoote lyakwe. 19Vali nu lukali avamwayuuva avalaavedza nu wuvaha, kangi aviikoongʼeledza mu figono ifyo! 20Apo mulapangilage, ukuta ukunyila kwenyo kwali kutane ukuhumila mu musika gwa ngʼaala ingʼali, nambe mu kigono ikya Sabato. 21Pakuva mu figono ifyo, kulaavedza ni mumuko ngomi, idzisinaa dzihumilaga ukuvangila uNguluvi pe aagavile ilidugulu ukufikila lino, nambe dzisilaahumila kangi. 22Ngana uNguluvi akali atane ukukeepudza ifigono ifyo, apo ngali sikwali umuunu ye akali iipokwa. Neke kangi wiimila wa vahaagulwa vaakwe, uNguluvi alafikeepudza ifigono ifyo.

23“Mu musika ugo, ngana umuunu akuvalongela iitigila, ‘Lolage, uMesiya ali apa,’ enewuli, ‘Ali kula,’ mwali mutane ukufuuwa. 24Pakuva valaahumila avaanu avakwitambula Mesiya na vangi avakwitambula ukutigila vavidzi. Vonda avo valaavedza vadesi. Valaahuufya ifimanyilo ni fidzumo fikomi ukuvadzanga avaanu, nde vavedze vahaagulwa va Nguluvi. 25Muvedzage miiho, pakuva ndívalongiye tandi dzonda idzo pe dzisinaa dzihumila. 26Apo ngana avaanu vakuvalongela ukutigila, ‘Lolage, uMesiya ali ku lungʼalangʼala,’ mwali mutane ukuhelela kulola. Enewuli vakuvalongela ukutigila, ‘Lolage, ali kuno mu nyumba,’ mwali mutane ukufuuwa. 27Pakuva ukwadza kwa Muswamuve va Muunu kulaavedza kitinuhidza ngita ulumuli lwa libalamusi kye lwiwoneka imbali dzonda. 28Pe gugenda umufimba, baaho pe giilundanila amambungu.#24:28 Pe gugenda umufimba, baaho pe giilundanila amambungu Aga gaali madzwi ga luselengo. Kwe kutigila, ngana amambungu giiwoneesa pe gugenda umufimba, ndeeni amadzwi ago galaawoneesa uYesu pe alaapiluka, nayula alamuwona nu kudzeela ukutigila we wudugilo wa misika.

Ukwadza kwa Muswamuve va Muunu

(Maluko 13:24-27; Luka 21:25-28)

29“Mu musika ugo, pe fiivedza fíhelaniidze ifigono fya mumuko ifyo,

‘UNguluvi alaahambusa ilidzuwa ukuvedza kiisi,

umwedzi gulaatilivadzwa,

ni nondwe nadzo dzilaaguwa paanyi ukuhuma kukyanya.

UNguluvi alaatendemya ifiinu fyonda ifikomi ifyo ifili kukyanya.’#Isaya 13:10; 34:4; Yoheli 2:10

30“Mu musika ugo, ikimanyilo kya Muswamuve va Muunu kilaawoneka kukyanya na vaanu va fipelela fyonda mwe naanyi, valaahugumilila.#Sakalya 12:10-14 Navo valamuwona uMuswamuve va Muunu pe iikwadza pakyanya pa mafunde ga kukyanya, ali ni ngufu ídzilutiye pamwinga ni ndolo.#Danyeli 7:13 31Neke alavatuma avanyamwandza vaakwe vatove ingʼwalimba, ukuta vavalundase avahaagulwa vonda ukuhuma imbali dzonda dzitayi dza nyi.”

Ikihwananidzo kya mudzombe

(Maluko 13:28-31; Luka 21:29-33)

32UYesu iiginaga ukulonga iitigilaga, “Mwiwulanidzage ukuhuma ku mudzombe. Umusika pe mwiwona umudzombe gúvangile ukulembula utuhamba utudeke, apo muludzeelage ukutigila, umusika gwa minga guli biihi. 33Ndeeni na yuunye, pe mulaavedza mukudziwona dzonda idzo dziilimika, mudzeelage ukutigila, uMuswamuve va Muunu áhegeliye, ali pa mulyango. 34Ndakyene ndikuvalongela ndiitigila, ikivegalo iki kisilaahelanidza ukufikila dzonda idzo pe dzíhumiye. 35Ikyanya ni nyi filaahelanidza, neke kangi amadzwi gangu gasilaahelanidza nambi.

Sikwali ye iidzeela ikigono ikya wusililo

(Maluko 13:32-37; Luka 12:35-40; 17:26-36)

36“Neke kangi ulwa kigono kila ni kivalilo kila kye alaadzila uMuswamuve va Muunu, sikwali ye iidzeela, nambe vanyamwandza va kukyanya nambe Muswamuve, yu Daada mwene ye iidzeela. 37Pakuva ukwadza kwa Muswamuve va Muunu kulaavedza ngita kye lwali pa figono ifya Nwaka. 38Mu figono ifyo uwulava pe wusinaa waadza, avaanu vaaliyaga nu kunyuwa, vaatoolaga nu kutawuka ukufikila ikigono uNwaka pe iingiye mu ngalavala. 39Avaanu avo vasaadzeeliye kikivedzaga ikihadza kiihumila ukufikila uwulava pe wiikwadza nu kuvatipula vonda. Lulaavedza ndeeni pa kwadza kwa Muswamuve va Muunu. 40Mu musika ugo avaanu vavili valaavedzasa mu kulima ku mugunda, yumwinga alaanyamulwa, uyungi alaalekwa. 41Kangi avamwayuuva vavili valaavedza mu kuhaalula pamwinga pa lwala, yumwinga alaanyamulwa, uyungi alaalekwa. 42Lino mwikalage miiho, pakuva musikukidzeela ikigono kye alaadzila uMutwa veenyo. 43Neke kangi muludzeelage wunofu ukutigila, ngana umunya nyumba akali adzeelage umusika gwe iikwadzila umuhiidzi, ngali íikalile miiho, ukuta amutanidze umuhiidzi atane ukuyava inyumba yaakwe. 44Pa ulo, na yuunye mwikalage mwígelaniidze, pakuva uMuswamuve va Muunu alaadza ikivalilo kye musiihuuvila.”

Ikihwananidzo kya mulimila-vangi umuhuuvilwa

(Luka 12:41-50)

45UYesu akuvawuudzaga iitigilaga, “Umulimila-vangi umuhuuvilwa, umunya luhalawukagudzi ye ani? Ye uyo ye átemiidzwe nu mutwa vaakwe ukuvedza mwimiilidzi va valimila-vangi avangi mu nyumba yaakwe, ukuta avapeelage ikyakuliya mu musika ugwivagila. 46Áfuunyiliilwe umulimila-vangi uyo, ngana umutwa vaakwe pe iipiluka, akumuwona iilima ngita kye akamulagiidze. 47Ndakyene ndikuvalongela ndiitigila, umutwa vaakwe ahadza akumutemya iimiililage ifiinu fyakwe fyonda. 48Neke kangi, ngana umulimila-vangi muviifu uyo, ahoodze mu numbula yaakwe ukutigila, ‘Umutwa vangu iifuvalila ukupiluka,’ 49neke avangage ukuvatova avalimila-vangi vayagwe, kangi aliilasage nu kunywelasa na vagaadzi, 50apo umutwa vaakwe uyo ahadza iipiluka mu kigono ni kivalilo kye asiikagula umulimila-vangi vaakwe. 51Umutwa uyo ahadza akumudumulingʼasa fipiidza nu kumuviika kwe vagenda avakedusi. Uko kwe kwene kwe kulaavedza ni ngʼuuto nu kugeledzula amiino.”

Currently Selected:

Matayo 24: BEZ

Highlight

Copy