Munra ta Rom 5

1Wa me ge taniniga nina tamaine, wa o qetegiu o nomtup, wa nina lav monina o tamata amen God apena mun Lord inina i Jesus Christ. 2Wa munia gina nina me lav veta o tano petpeteŋ mun o nomtup si a niŋa lai ma ape sogov iloke nina me tira veta alolona; wa nina a sou malakalaka kel nina ape we maros nerei naleŋasin God. 3Wa gate iloke vires, nava nina a sou malakalaka kel nina mulaŋ alo ganawono ŋaŋ. 4Ape nina we gilala si o ganawono te gagapalag taurmate o roŋomalumuaga; wa o roŋomalumuaga we ge si a ilo vaglala ape liŋanina, wa o gege ilo tamaine we gagapalag taurmate o maros nerei. 5Wa o maros nerei gate ge si nina a apemaragai apena. O manigiu me liŋ siwo o tapeva mon God alo toqanina mun o Vui we Roŋo me vasoal ma ti mun nina.

6Ape nina qale mageregere ti, wa alo tur qoŋina i Christ me mate ape ra ganganor. 7Ape tete nonom lai wun si sei te mate ape tanun we taniniga; pa te nonom lai lova si sei wun te nom mot sin mate ape matai tanun. 8Nava God we gaganag lue ape mon o tapeva mun nina, ape nina qale toga ganganor, wa i Christ me mate ape nina.

9Wa raka sage nan, me ge taniniga veta nina ilokenake mun nanarana, wa te vaesu nina nan o lologagara o manigiu ineia. 10Ape si me ge pul kel nina sur God mun namatean i Natuna alo inina qale tavalalea munia; pa raka sage nan, me ge pul kel veta nake nina, wa te vaesu ran nina alo esuna. 11Wa gate ilone vires, pa nina we sou malakalaka kel nina mulaŋ alo God, mun Lord inina i Jesus Christ, nina me lav veta ilokenake o pulpul kel iloke o manigiu ineia.

12Wa o manigiu ilone, tama mun o tanun tuwale o ganganor me mule pata ma ilo marama iloke, wa mun o ganganor o matea; wa o matea tamaine me gao lue ilo tanun sul, ape neira o sul me ganganor mora. 13Ape o ganganor we toga ran ma alo marama gai niŋa o lea; panava gate vasogo o ganganor alo lea tagai tiqa. 14Panava o matea me maranaga goro nan i Adam ma gai niŋa i Moses, wa goro ragai mulaŋ gate ganganor mora tataga o makale tamtames ilone mon Adam; wa ineia gina o vaglala apen i gene te rasu ma.

15Pa tete nonom lai si tama o tames, wasi o gene sogov mulaŋ we tamaine. Ape si mun non sei tuwale o tames o tanun sul me mate veta, pa raka sage aneane o sogov mon God, wa o gene we vasoal mamasa ma alo sogov ilone mon o tanun tuwale, i Jesus Christ qa, me ura sal veta sur o tanun sul. 16Wa gate tama o manigiu o tanun tuwale me ganganor, tamaine mulaŋ o gene me sogov mamasa ma. Ape o lea veveg me rowolue ma amen tuwale si a veveg mate, nava o gene sogov me rowolue ma alo tamtames we qoqo si a veveg taniniga. 17Ape si mun nonsei tuwale o tames o matea me maranaga goro veta, o manigiu i gene i tuwale ilone; pa raka sage aneane ineira iloke te maranaga goro mora alo esu, iragai ŋaŋ nake we taur mora lai o sogov we ura sal, wa o gene me vasoal mamasa ti tape liŋe taniniga, wa o manigiu ineia tuwale i Jesus Christ.

18Wa ape we tamaine nane, tama mun o tames i tuwale me veveg lue mun o tanun sul ape matea, tamaine gina mun o gagapalag taniniga vatuwale me veveg lue mun o tanun sul ape lea taniniga tape esu. 19Ape tama mun non o tanun tuwale o siriga o tanun sul me qeteg ganganor apena, tamaine gina mun non i tuwale mulaŋ o meremaŋas o tanun sul te qeteg taniniga apena.

20Pa o lea me viroag pata ma si o tames a ura sal apena. Pa o ganganor me ura sal avea, o sogov me qoqo sal aneane aia; 21si tama o ganganor me maranaga goro ti alo matea, tamaine gina o sogov a maranaga goro o manigiu o liŋe taniniga, gai niŋa o esu galava, mun Jesus Christ i Lord inina.

Currently Selected:

Munra ta Rom 5: MOTA

Highlight

Copy