Munra ta Rom 4

1Wa si ta tamaine, nina te vava lai si Abraham i tamanina me taur suar o sava tataga o visogoi? 2Ape si me ge taniniga i Abraham mun o gagapalag ŋaŋ, o sotaliva amaia apena, nava gate alo nagon God. 3Ape o raverave we vava o sava? si, I Abraham me nomtup God, wa me vasogo munia mun liŋe taniniga. 4Pa mun i gene we mawmawui tete vasogo o rusarusai tama si o sogov, nava si tama o pug. 5Wa mun i gene gate mawmawui, nava we nomtup ineia we ge taniniga ira ganganor, te vasogo non o nomtup munia mun liŋe taniniga. 6Tama i David mulaŋ me vava ape tano vawia non o tanun God we vasogo o liŋe taniniga munia asau nan o gagapalag ŋaŋ, 7wa si,

Ira gene vawia iragai me nomvitag napugara mun neira,

Me vataqav goro ti nor o kiskislag.

8I gene vawia ilone nane i Lord tete vasogo munia o pugai.

9Pa wasi o vavae vawia iloke avunara teve vaglala vires, si avunara gate teve vaglala mulaŋ? Ape nina we vava si, Me vasogo o nomtup mun i Abraham mun liŋe taniniga. 10Pa me vasogo munia alo we savai? alo me teve vaglala veta ineia, si alo gate teve vaglala tiqa? Gate alo me teve vaglala veta, nava alo gate teve vaglala tiqa ineia.

11Wa me la munia o vaglala, o teve vaglala ilone; tama o pul vaglala munia ape liŋe taniniga tape nomtup ilone amaia veta alo gate teve vaglala tiqa ineia: o manigiu sin tamarasei nol we nomtup pa gate teve vaglala ineira; si a vasogo mulaŋ muneira o liŋe taniniga. 12Wa sin tamara teve vaglala mulaŋ; nava gate tamarasei vires we talo teve vaglala, panava tamarasei we varavara alo maleke nomtup ilone mon i tamanina i Abraham, alo gate teve vaglala tiqa ineia.

13Ape o vavae ligoligog ilone mun Abraham wa mun nawoturiana gate tira alo lea, wa si te taur usurag mona o marama; panava me tira ran alo liŋe taniniga tape nomtup. 14Ape si rasei we toga alo lea qe taur usurag lai tea, pa me ge wegowego nane o nomtup, wa o vavae ligoligog me pea veta apena. 15Ape o lea we gagapalag qalo o lologagara. Nava o lea ta tagai avea, o tames mulaŋ tagai aia.

16Wa o manigiu ilone ti tira alo nomtup ma, sin tataga mulaŋ o sogov; si o vavae ligoligog a tira netenete mun o woturiai nol apena, gate ilone vires we talo lea, nava mun ilone mulaŋ we talo nomtup non Abraham ma, ineia gina tamanina nol. 17Tama me rave veta si, Nau me map iniko mun tamara sul ŋaŋ we qoqo. Wa iloke alo nagon God ni me nomtupua ti, ineia gina i gene we ge esuesura mate, wa ti loglog o gene ŋaŋ tagai tiqa tama si apena veta. 18Wa ineia mun o nom nerei me nomtup goro o gene gate nom nerei lai apena, si ni te qeteg tamara sul ŋaŋ we qoqo, tataga o vavae me vet ti apena wa si, Nawoturiama te tamaine. 19Wa mon o nomtup gate mageregere alo ni we nononom qalo ape turiana tama me tamate veta; pa natauna tama me melnol veta, wa natoqan Sara me mate mulaŋ. 20Wa ni gate nom qerqeret, wa gate nom varuarua ape vavae ligoligog amon God, nava me varagaia mun o nomtup, wa ni me la o ronoga mun God. 21Wa ni me sov lai naapena si ineia ilone we mana sin ge qalo o gene ni me ligoligog ti apena; 22wa o manigiu ilone mulaŋ me vasogo munia mun liŋe taniniga.

23Pa gate rave tamaine o manigiu ineia magasena, si me vasogo munia, 24pa nava o manigiu inina mulaŋ, te vasvasogo aŋaisa mun nina tamaine, we nomtup i gene me ge raka kel i Jesus i Lord inina na ra mate, 25me maniriŋia gina ape nonina o tamtames, wa me ge raka kelua si a ge taniniga nina.

Currently Selected:

Munra ta Rom 4: MOTA

Highlight

Copy