Munra ta Rom 3

1Pa si ta tamaine, o sava we raka sage mun o ta Judea? Wa te piriŋ tama avea o teve vaglala nane? 2Pa vagaqoqo valval. Wa o manigiu iloke amoa, ape me ukeg ran ma mun neira o lea we roŋo mon God. 3Wa o sava mulaŋ apena si o tuanira gate nomtup? Sa si naliŋara gate nomtup te ge pea ran naliŋan God we kokomag? 4Nipea ran nane; God te nun ran, wa val tanun ni qeteg galegale; tama me rave veta ti si,

Te nonom ape iniko si we taniniga alo nom o vavae ŋaŋ,

Wa ko te lalakete alo we vevegiko.

5Pa si naliŋanina we variava qe gaganag lue ape liŋan God si we taniniga, nina te vava lai o sava apena? Sa si God gate taniniga ti la siwo ma o lologagara? Nau we vava tataga o matev tanun. 6Nipea ran nane; ape si ta tamaine God te veveg gasei lai o marama? 7Ape si o liŋe nun anon God me ura sal mun leŋasin God mun nok o galegale, ape sava mulaŋ te veveg nau tama si inau we ganganor? 8Wa ape sava nina gate vava, tama ineira we sororov o lea tatas apen kamam, wa tama o tuaniu we vet si kamam we vava apena, si, Nina ge o gene ŋaŋ we tatas, o gene ŋaŋ we wia te qara rowo ma apena? Pa o lea te veveg iragai ŋaŋ ilone we taniniga ran.

9Pa si ta tamaine, kamam we raka sage apena? Tagai ran nane; ape kamam me gaganag qalo veta apen ra ta Judea wa ta Grekia si we toga nol alalaŋe ganganor. 10Tama me rave veta si,

Gate tanun taniniga apena, si ta tuwale;

11Gate isei we matanur, gate isei we sike God;

12Ineira nol me lil veta, ineira me sasawuara saratuwale;

I tagai ran we gagapalag we wia, tagai ran tuwale:

13Napuepuera o qaraŋ tamate we tawala;

Neira me galegale mun nagarameara;

O vaŋanpal tape nat mata ŋaŋ alalaŋe ŋusura;

14Navalara we uravag o vave vivnag wa o gogona;

15Naraŋora we togtogoa si a ge sale o nara;

16O qisaŋwono wa o lopsag alo matesalara;

17Wa ineira gate gilala o matesale tamata;

18O momogo God tagai goro namatara.

19Wa nina we lolomaran si o lea me vava ape sava tea, pa we gaganag mun rasei we toga alalaŋe lea ilone; o manigiu si a koko goro val valai, wa si o marama nol a toga sur siwo mun God alo liŋe veveg. 20Ape mun o gagapalag ŋaŋ talo lea tete veveg taniniga lai o visogoi tea alo nagona. Ape o manigiu o lea te gilala lai o ganganor.

21Pa ilokenake naliŋan God we taniniga me ŋaŋalue veta ma asau nan o lea, wa o lea wa ira prophet ŋaŋ we gaganag we tira apena. 22Naliŋan God nake we taniniga, mun o nomtup apen i Jesus Christ, mun rasei nol, wa avunarasei nol we nomtupua; ape gate map seasea ilo. 23Ape me ganganor nol wa we valuava nan naleŋasin God. 24Nava me veveg wasawasa ineira mun o sogov mamasa o manigiu o ulsag we toga alo i Christ Jesus; 25God me map lue ineia ti o tano magarosa, o manigiu o nomtup, mun nanarana; si a gaganag lue naliŋana kel we taniniga, mun we nomvitag o ganganor ilone me ge ti we tuai, 26alo liŋe lolomalumlum non God; sin gaganag lue naliŋara we taniniga alo masaoi nake iloke; o manigiu si ineia te taniniga mona, wa te ge taniniga i gene we talo nomtup apen i Jesus.

27Pa si ta tamaine, avea o sotaliva? Me tipag goro nane. Pa mun o lea we savai? Mun o lea tape gagapalag ŋaŋ? I tagai; nava mun o lea tape nomtup. 28Ape nina we nom mot si te ge taniniga o tanun mun o nomtup, asau nan o gagapalag ŋaŋ talo lea.

29Sa si God wun nora ta Judea magasera? Gate wasi nora sul ŋaŋ we sea mulaŋ? Uwe, nora sul ŋaŋ we sea mulaŋ. 30O manigiu God tuwale ran, wa ni te ge taniniga o teve vaglala o qetegiu o nomtup, wa o togara gate teve vaglala o manigiu o nomtup. 31Pa wasi inina we ge tagea o lea tamaike o manigiu o nomtup? Nipea ran nane; pa nina we vatira o lea.

Currently Selected:

Munra ta Rom 3: MOTA

Highlight

Copy