Munra ta Rom 2

1Wa o manigiu iloke ko tete is lai naniko gai, val tanun we veveg; ape ko we veveg o tuara, wa alo ilone ko we veveg qalo keluko; ape iniko i gene we veveg we gagapalag moma o gene ŋaŋ ilone. 2Wa inina we lolomaran monina si o lea veveg mon God we sasarita ape liŋe nun we veveg irasei we gagapalag tamaine.

3Wa ko we nonom iloke, gai tanun we veveg iragai we gagapalag ilone ŋaŋ, wa we ge moma tamaine, si ko te toa wasawasa lai nan o lea veveg mon God? 4Si ko we nom tagtageag o tar valeŋaleŋa tape non o lolowia, wa o lolomalumlum we roŋo maul? Wa ko gate gilala si o lolowia mon God we vanogagiko ape nom leas? 5Nava tataga namatevuma we wasvat wa natoqama gate nomris lai ko we sogon pata matapuma muniko kel o lologagara alo qoŋ lologagara ilone o lea veveg taniniga mon God te ŋaŋalue ma aŋaisa alolona. 6Wa ni te sar mun val sei ape mon o gagapalag ŋaŋ; 7mun ragai nane we sike mora o leŋas wa o ronoga wa o matevui tete narunaru mun o roŋomalumuaga alo gagapalag we wia, te sar gina mun neira mun o esu galava; 8nava mun ragai we qatleasag, wa we sirsiriga nan we roŋotag o nun, pa we mawui goro o ganganor, mun neira gina o lologagara wa o lolo vasaqosaqo, 9o ganawono, wa o qisaŋwono, avune val ate tanun we gagapalag ran o malagene; mun o ta Judea amoa, wa mun o ta Grekia mulaŋ. 10Nava mun val sei we gagapalag o mataigene, o leŋas munia wa o ronoga wa o tamata, mun o ta Judea amoa, wa mum o ta Grekia mulaŋ. 11Ape o lavlav nagoi tagai ran amen God.

12Ape irasei nol me ganganor ti, wa o lea tagai, neira te tagtagea mora mulaŋ, wa o lea tagai: wa irasei nol me ganganor ti alo lea, te vevegira gina mun o lea. 13Ape gate irasei we roŋroŋotag o lea we toga taniniga amen God; nava te veveg taniniga gese irasei we gagapalag o lea. 14Ape alo si o sul ŋaŋ we sea, wa o lea tagai amaira, qe ge matapura mun o matev tanun o gene ŋaŋ talo lea; iragai ŋaŋ iloke o lea tagai amaira, pa we toga o lea mun neira kel. 15Wa neira we gaganag lue o gagapalag talo lea me rave siwo ti alo toqara; wa nor o lolomaran kel we veveg kelura we gaganag saratuwale apena; wa nor o nonomia ŋaŋ we vartilatila si we var isis nan neira, 16alo qoŋ nane ilone God te veveg lue ape gene vatŋorag ŋaŋ nora tanun, tataga nok o lea we wia, mun Jesus Christ.

17Pa si qe log nasasama si o ta Judea, wa ko we sov avune lea, wa ko we sotal keluko apen God, 18wa ko we gilala non o maros, wa ko we veveg vaglala ape gene ŋaŋ raka sage, me vatogo iniko ti apena alo lea; 19wa ko we matueg avunama kel si we tursalemoa ira matapei, o marmararan noragai alo silsiliga; 20wa si te vatvatanau lai ira qure, te vatvatogo o natmera ŋaŋ, ape ko we taur o makale lolomaran wa o liŋe nun alo lea; 21gai, sa si ko we vatvatogo o tuara wa gate vatvatogo keluko? Iniko i gene we maŋasag o lea si nipea palpal, sa si ko we pal moma? 22Iniko i gene we gaganag si nipea pakapaka, sa si ko we pakapaka moma? Iniko i gene we vasvasigtag o totogale, sa si ko we ge savsavawora o gene roŋo ŋaŋ? 23Iniko i gene we sotal keluko alo lea, sa si ko we tamtames goro moma o lea, wa we ge tagtageag God apena? 24Ape ti liŋaliŋasapur nasasan God alo sul ŋaŋ we sea o manigiu ikamiu, tama me rave veta ti.

25Pa we nun, o teve vaglala we piriŋ alo si ko qe gagapalag o lea; pa si ko qe tamtames goro o lea, nom o teve vaglala me qeteg veta tama si o teve vaglala tagai. 26O manigiu o ine, si o tanun gate teve vaglala qe kokor goro mona o gene ŋaŋ o lea me veveg apena si we taniniga, pa wasi tete vasogo munia non o togara gate teve vaglala ilone tama si o teve vaglala? 27Wa o togara tataga o matev tanun, wa gate teve vaglala, pa we ge tira ran o lea, ilone nane wasi tete veveg iniko i gene we tamtames goro o lea mun o nonom ape raverave wa ape teve vaglala?

28Ape gate ineia o ta Judea we iloa si we tamaine, wa gate ilone o teve vaglala we ilo tamaine alo visogoi; 29nava ineia o ta Judea we tamaine alo lolona; wa ilone o teve vaglala we talo toqai, alo vui gate alo raverave; o vavae varean apena gate amaira tanun ma nava amen God.

Currently Selected:

Munra ta Rom 2: MOTA

Highlight

Copy