Munra ta Rom 1

1I Paul, o rowrowovag anan i Jesus Christ, me logia ma ti sin sala, me aseg wora ineia ti ape lea we wia amon God, 2ni me ligoligog moai ti apena munra prophet ŋaŋ anana alo raverave ŋaŋ we roŋo, 3we gaganag apen i Natuna; wa ni me wota ma amaira tuptupun David tataga o visogoi, 4wa me vonogia mun Natun God mun o mana, we sasarita ape vui tape roŋova, mun o tavaraka kel nora mate; i Jesus Christ nane i Lord inina, 5wa ikamam me taur veta momam o sogov wa o liŋe sala munia, te maŋas goro o liŋe nomtup alo val sul ŋaŋ namanig sasana apena; 6wa ikamiu mulaŋ amaira, ira gene suware ma anan i Jesus Christ: 7mun ragai nol iloke we toga a Rom, ira meratape anan God, me suware kamiu ma we roŋo: O sogov mun kamiu wa o tamata amen God i Tamanina ma, wa amen i Lord Jesus Christ.

8O moe gene iloke, nau we varean God inau mun Jesus Christ apen kamiu nol, ape me sororo veta nomiu o roro nomtup alo marama nol. 9Apen God we gaganag we tira ape nau, nau we mawmawui qa suria mun naatak alo lea we wia non Natuna, si nau we vava lolomaran kel apen kamiu wa gate motmot, 10alo nok o tataro ŋaŋ nau we paepaere vagae, si ta vawia lai ilokenake nok o vanoga at, mun o maros mon God, si na niŋa lai at sur kamiu. 11Ape nalolok we toron si na iloilo kamiu, si na mano tirag mun kamiu o sogov vui tea, te vatira netenete lai kamiu; 12wa si te ge masur lova natoqamam amen kamiu, mun o nomtup we toga alo val nina, nanomiu nane wa nanok.

13Naŋ nau gate maros kamiu a loloqoŋ, ratatasik, ape nau me nom mot vaga qoqo veta si na mule at sur kamiu, nava me ge goro ran ma, pa o manigiu si na taur mok lai tea o woai amen kamiu mulaŋ, tama alo sul ŋaŋ ilone we sea. 14O pug avunak, namora ta Grekia, wa namora we gato gap, namora mulaŋ we menmenaro, wa namora qure. 15Wa o tinegaro tamaine alo lolok tama we tira ape nau, si na maŋasag o lea we wia mun kamiu mulaŋ we togatoga a Rom. 16Ape naapek gate maragai ape lea we wia; ape ilone o mana non God si a vaesura ran, mun sei mun sei we nomtup apena, mun o ta Judea amoa, wa mun o ta Grekia mulaŋ. 17Ape ti ge ŋaŋalue alolona o liŋe taniniga mon God, nan o nomtup ma ilo nomtup; tama me rave veta si, I taniniga te esuesu o qetegiu o nomtup.

18Ape ti ge ŋaŋalue ma vunana o lologagara non God avune val liŋe tamtames wa val ganganor nor o tanun ŋaŋ we taur goro o liŋe nun alo liŋe ganganor. 19Ape o gene ŋaŋ non God te lolomaran lai apena we tira lue amaira; apen God me ge ŋaŋalue veta ti mun neira. 20Ape non o gene ŋaŋ gate iloilo lai, pa we gilala wurvag lai apena mun o gene tiŋ ŋaŋ alo qeteg marama ran ma, wa we ilo qalo lai; wa si non o mana nan qa ti galava, wa namatevun God; wa o manigiu o ine neira tete is lai napugara nan neira. 21Ape neira me lolomaran God, pa gate ge ronoga ineia tama si God, wa gate vareania; nava ineira me var sikesike pa me ge si neira sike matila; wa me qoŋ goro natoqara gate lolomaran qalo lai. 22Wa neira we soura si we lolomaran, pa me qeteg qaqae; 23wa neira me ge ris naleŋasin God gate naru ilo lai, sin tama natarapen o tanun te naru tagea, wa o tarape manu ŋaŋ, wa o qoe ŋaŋ, wa o gene ŋaŋ we kalokalo.

24Wa o manigiu o ine God me ukegira vano alo tortoron ŋaŋ talo toqara ilo togara pulua, si neira a ge tagtageag natarapera amaira kel. 25Ape neira gina me valete o liŋe nun amon God mun o liŋe galegale; wa ineira me momogo wa me rowrowovag mun o gene tiŋ, pa tagai mun i Tiŋ gene ŋaŋ, ni we toga wievavae gina ti tuai ti tuai. Amen.

26Wa o manigiu o ine God me ukegira vano si neira a roŋo o tortoron ŋaŋ we vasvasigtag apena. Ape o retavine amaira me ge ris o gene te ge tataga o matev tanun, sin sea ran nan o matev tanun. 27Wa we sasarita apena, o rereata we toavtag o gene te ge tataga o matev vavine, wa me saqora val alo nor o totoron ŋaŋ, o rereata we gagapalag amaira rereata o gene te apemaragai apena; wa neira me taur mora alo ineira kel o rusarusai, tama we sasarita ran ape nor o lerava ilone.

28Wa tama ineira gate mawui apena si a taur God alo nor o lolomaran, God me ukegira vano ilo nonomia te gevtagira apena, si neira a gagapalag o gene ŋaŋ gate tira ran ape neira; 29me ge ura veta neira mun o ganganor nol, o liŋe pakapaka, o matev wasmata, o ararike, o ganor, we uravag o mata wolowolo, o manvus, o varleasag, o galegale, o matev malkeke; 30ira ŋeŋeŋe nane, we gosgosorag, we soŋsoŋus God, we tatalaiga, we nom rekereke kelura, we valalava, we sike suar matapura o gene ŋaŋ we tatas, we sirsiriga nan ra tamara, 31o qaqae nane, we ge ava o vatavata, gate tapetape, tete pulpul kel, gate magarosa ilo. 32Wa ineira we gilala mora si o lea mon God we veveg apen rasei qe gagapalag tamaine si we sar ape matea, pa we gege mora tamaine; wa gate tamaine vires, nava neira we lolowia saratuwale amaira sei we gagapalag apena.

Currently Selected:

Munra ta Rom 1: MOTA

Highlight

Copy