Munra ta Rom 6
6
1Naŋ o sava nina te vava? Nina te qale toga alo ganganor, si o sogov a poa sal apena? 2Nipea ran nane. Inina me matevtag veta o ganganor pa te qale esuesu lai gasei nia alolona?
3Sa si kamiu gate gilala ape nina nol me vasugroŋo veta nina ilo Christ Jesus, si me vasugroŋo nina ilo mateana? 4O manigiu ilone me tavig saratuwale veta inina amaia mun o vasugroŋo ilo matea; si tama me ge raka kel i Christ nanra mate mun naleŋasin o Mama, nina a tataga mulaŋ tamaine o togare esu garaqa apena.
5Ape si me matev tuwale amaia tataga namakali mateana, pa te tamaine mulaŋ munina alo makalina me tavaraka kel. 6Ape nina we gilala o ike, si me woso teterpan saratuwale veta monina o matev tanun we tuai, o manigiu si a ge pea ran o tarape ganganor, si nan wa nina aŋaisa a rowrowovag we rot mun o ganganor. 7Ape si isei me mate veta, me veveg wasawasa veta ineia nan o ganganor.
8Pa si nina me mate saratuwale veta amen Christ, pa nina we nomtup si te esuesu saratuwale mulaŋ amaia; 9ape nina we gilala si i Christ me tavaraka veta nanra mate, pa ni tete mate mulaŋ tea aŋaisa; o matea tete mana lai mulaŋ ineia. 10Wa ape ni me mate, ni me matevtag vatuwale veta o ganganor; wa ape ni we esu, ni we esu sur God. 11Tamaine gina tur nonom apen kamiu si kamiu o tamate veta mun o ganganor, wa si kamiu we esuesu sur God alo i Jesus Christ.
12Wa o manigiu o ine nipea o ganganor a riga goro alo tarapemiu o gene we matemate, si kamiu a maŋas goro o tortoron ŋaŋ tapena. 13Wa turpea ukeukeg nasoesoemiu o reŋreŋ liŋe variava mun o ganganor; nava tur ukeg kel kamiu sur God tama si we esu nanra mate, wa nasoesoemiu o reŋreŋ liŋe taniniga mun God. 14Ape o ganganor tete liwoa goro kamiu; o manigiu kamiu gate alalaŋe lea, nava alalaŋe liŋe sogov.
15Alova, si ta tamaine, nina togatoga ganganor, ape nina gate alalaŋe lea nava alalaŋe liŋe sogov? Nipea ran nane. 16Kamiu gate gilala momiu si kamiu me ukeg kel kamiu o rowrowovag munsei si a mawui goroa, si kamiu qara rowrowovag anan i gene ilone kam we mawui goroa? si ta mun o ganganor ilo matea, si ta mun o liŋe meremaŋas ilo liŋe taniniga. 17Nava te varean ran God, ape kamiu me rowrowovag ti mun o ganganor, nava kam me qeteg maŋas goro veta alo lolomiu o makale liŋe vatvatogo iloke me ukeg kamiu at ti apena. 18Wa ikamiu me wasawasa vitag veta o ganganor, wa qara qeteg rowrowovag mun o liŋe taniniga apena.
19Nau we vava makala ape tanun o manigiu namatev visogomiu we mageregere. Ape tama kamiu me ukeg veta ti nasoesoemiu o rowrowovag we rot mun o togara pulua wa mun o liŋe tamtames gai niŋa o tamtames; tamaine gina tur ukeg momiu ilokenake nasoesoemiu o rowrowovag we rot mun o liŋe taniniga gai niŋa o roŋova. 20Ape kamiu me togatoga ti o rowrowovag we rot mun o ganganor, wa alo ine nane me toga wasawasa nan o liŋe taniniga apena.
21Pa alo me tamaine, kamiu me taur momiu o sava o woai alo masaoi nane ilone tape gene ŋaŋ naapemiu we maragai ilokenake apena? Ape o ulus gene ŋaŋ ilone o matea nane. 22Nava ilokenake kamiu me wasawasa vitag veta o ganganor, wa me qeteg rowrowovag mun God; wa ikamiu we taur momiu o woai gai niŋa o roŋova apena; wa o ulusui nake o esu galava.
23Ape o rusarusai tape ganganor o matea; nava o gene sogov ma mon God o esu galava alo i Christ Jesus i Lord inina.
Currently Selected:
Munra ta Rom 6: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
