Munra ta Rom 12

1Wa nau we pes kamiu, ratatasik, mun o sale lolomagarosa mon God, si kamiu a ukeg naturiamiu rowo mun o gene oloolo we esu, we roŋo, o tangemarmaros mun God; momiu o gagapalag we roŋo we nom mantag nane. 2Wa turpea ris tataga o makali marama iloke, nava tur ris sea mun we ge garaqa o nonomia; si kamiu a ilo wurvag o sava gene God we maros, we wia wa o tangemarmaros, wa we taurmate ran.

3Ape na we vet munsei munsei tamen kamiu, mun o sogov me vasoal ti munau, sinpea nom raka kelua sal o nonomia we sar ape neia; nava sin nom mantag si a nom vasartag kelua, tama God me tirag veta munsei munsei non o takele nomtup. 4Ape tama alo turiai tuwale o soasoai we qoqo amenina, nava mun o val soasoai gate gagapalag tuwale; 5tamaine gina inina we qoqo o turiai tuwale alo i Christ, wa val nina soesoenina gese.

6Wa inina we taur monina o gene sogov ŋaŋ we seasea gese, tataga o sogov me vasoal veta ma munina; wa si ta sogov munsei o liŋe prophet, ni sasarita ape makali nomtup tuwale; 7pa si o liŋe gagapalag, ni goara alo liŋe gagapalag; pa si o liŋe vatogo, ni goara alo vatvatogo; 8pa si o vava varagai, ni goara alo liŋe varagai; pa si o tiratirag, mun o lolo vatawasai; pa si o moai goro, mun o tinegaro; pa si o lolomagarosa, mun o nago maskara.

9Nipea sokoi goro o tapeva; tur soŋus ran o gene we malkeke, tur kata ape gene we wia; 10tur var tapetape val kamiu alo varkokor gese o retatasiu; tur nom mava sal moa val kamiu. 11Alo tinegaro nipea we maraŋ; we lolotutun alo atai; we rowrowovag mun i Lord gegese. 12Wa tur masekeseke alo maros nerei; tur roŋo malumuaga alo te qisaŋwono; tur goara tasovule alo tataro. 13Tur tiratirag munra roŋo tama neira we maros ran; tur tataga taso o liŋe lav vasgot salavano.

14Tur wievavae rasei qe ge visarag kamiu; wievavae wa turpea vivnag. 15Amomiu ran si a masekeseke tuwale amairasei we masekeseke, a taŋtaŋ amairasei we taŋtaŋ. 16Tur varnonom we sasarita ape val kamiu gese; nipea nomrekereke ilo, nava a ge pepewu kel kamiu munrasei qe sur siwo. Turpea qeteg nom matanur kel kamiu. 17Turpea wono kel o malagene munsei mun o malagene. Tur nom vasarig momiu ape matai gene ŋaŋ alo nagora tanun nol. 18Si ta lai ran, tama si ta tira apen kamiu, tur togatoga tamata amaira tanun nol. 19Turpea raparapa apen kamiu kel, ra meratape, panava tur ukeg o tanoi mun o lologagara; ape me rave veta si, Namok o raparapa, inau te wono kel mok, amon i Lord we vava. 20Panava si nom o tavalalea qe maliŋsala, ka vaŋania; si qe marou, la mana o pei; ape si ko qe ge tamaine ko te gora vavtig o matawereav vawo qatuna apena. 21Nipea o tatas a lalakete naniko, nava ka lalakete moma mun o wia nan o tatas.

Currently Selected:

Munra ta Rom 12: MOTA

Highlight

Copy