Munra ta Rom 11

1Naŋ nau wa, Sa si God me gevtag reag o sul anana? Nipea ran nane. Ape nau gina o nanat Israel, nan ra tuptupun Abraham ma, talo veve Benjamin. 2God gate gevtag reag o sul anana ni me gilala vasarig ti. Si kamiu gate gilala o raverave we gaganag o sava apen Elia, si ni we tataro mun God goro ra Israel tama avea? 3Wa si, Lord, neira me vus mate ira prophet ŋaŋ anama, me sese savrag nom o tano oloolo ŋaŋ, wa me tivtag nau magesek, wa neira we sikesike naesuk. 4Pa naliŋan God me valui goro, we vet o sava munia? Wa si, Nau me raka vitag mun nau kel o rereata tar vaga lavearua, gate vatieqau tea naqaura mun i Baal.

5Wa we sasarita mulaŋ apena alo masaoi nake iloke te qale toga o garatai me ilo rakatira mun o sogov mamasa. 6Pa si mun o sogov, gate qeteg raka mulaŋ alo gagapalag ŋaŋ; ape si tete tamaine o sogov gate sogov mamasa nake. 7Pa si ta tamaine, o sava nake? O gene i Israel we sikesike apena, ilone ni gate taur suar; nava ira ilo raka me taur suar mora, wa iragai we sea me wasvat veta. 8Tama me rave ti si, God me le at mun neira o vui matmatuav, o matai ŋaŋ nan wa iloilo, o qoroi ŋaŋ nan wa roŋroŋotag, gai niŋa o qoŋ nake iloke. 9Wa i David mulaŋ ti vet si,

Nor o tano ganagana ni qeteg mun o tiatiag wa o gasalsal,

Wa o vat tutuag, wa we sar kel mun neira;

10Wa ni marav goro namatara nan wa ilo lai,

Wa ka wulapeg nakulara vagae.

11Naŋ nau wa, Sa si neira me tutuag si neira a masu apena? Nipea ran nane. Nava mun mor o masuva me qeteg vaesuva mun o sul ŋaŋ we sea, si a vasosov ineira si a lolotutun. 12Wa mor o masuva ilone ta qeteg tar valeŋaleŋa mun o marama, wa nor o tano valuava o tar valeŋaleŋa mun o sul ŋaŋ we sea, pa nor o tano uraura mot tete raka sage aneane nan amoa apena?

13Nava nau we vava mun kamiu talo sul ŋaŋ we sea; tama inau gina o sala mun o sul ŋaŋ we sea, wa nau we sotal nok o tano gagapalag apena; 14si na vasosov lai tea ira visogok si a lolotutun, wa si na vaesu lai ma o tuanira. 15Ape si me savrag reagira wa me ge pul kel o marama apena, pa te savai, gai, alo we lav kelura ma, si gate esuva nan ra mate? 16Wa si o sawaliu ta roŋo, o wo bread nol te kalkal te tamaine; wa si o gariu ta roŋo, wa o wotwotiu ŋaŋ mulaŋ.

17Pa si me kome late veta o tuan wotiu, wa iniko o mala oliv ran ma, pa me sou iniko ma alo wotiu ŋaŋ, wa ko me qeteg taur pul moma alo gariu wa o matev matai oliv we totoaga; 18nipea sotal keluko goro o wotiu ŋaŋ. Pa si ko qe sotal keluko, pa ko gate taur kalo moma o gariu, nava o gariu we taur kalo iniko.

19Pa ko te qara vava wun si, Me kome late o wotiu ŋaŋ o manigiu si a sou leas inau. 20Sowo; me kome late neira ape neira gate nomtup, wa iniko, ko me tira moma mun nom o nomtup. Nipea nom rekereke keluko, nava ka gogolo. 21Ape si God gate gogoroi o wotiu ŋaŋ ilone tape tur matev oliv, pa ni tete gogoroi wun iniko.

22Wa ka ilo alo iloke naliŋan God we lolowia wa we veveg mot. Naliŋana we veveg mot avunan ragai ŋaŋ me masu veta; nava avunama o lolowia, si ko ta qale toga alo liŋana o lolowia, nan wa kome late iniko qa aŋaisa. 23Wa te sou kel mulaŋ ineira aŋaisa, si ta tete toga galava alo gate nomtup, apen God we mana si a sou kel mulaŋ ineira. 24Ape si me kome late iniko ma alo mala oliv, o matev tangae ilone we tamaine ran ma, wa we sea nan o matev tangae ilone me souko ilo matai oliv, pa tete sou kel raka sage aneane iragai ŋaŋ ilone tape matev oliv ran ma, ilo nor o tur matai oliv?

25Ape nau gate maros kamiu a loloqoŋ, ratatasik, ape gene iloke we vagis, nan kamiu wa nom matanur kel kamiu; si me qeteg wasvat amaira Israel a takelei, gai ura qet ma o sul ŋaŋ we sea wa we ura mot. 26Wa te vaes Israel nol tamaike; tama me rave veta si,

Te rowolue ma a Sion i Ulsag,

Wa ni te viroag o liŋe variava ŋaŋ nan i Jakob.

27Wa iloke mok o vatavata amaira,

Alo nau te la reag savrag napugara nan neira.

28Pa si qe nonom ape lea we wia, ineira o tavala lea o manigiu kamiu; pa si qe nonom ape tano ilo raka, ineira o meratape, o manigiu o retamai. 29Ape o gene sogov ŋaŋ wa o liŋe suwasuware amon God tete nom ris lai apena. 30Ape tama kamiu gate nomtup ilo God we tuai, nava ilokenake me magarosa veta kamiu apen ragai iloke we leasag nan we nomtup; 31tamaine mulaŋ gina neira iloke me leasag nan we nomtup nake, si mun o magarosa we magarosa kamiu nia neira a taur mora mulaŋ o magarosa ilokenake. 32Ape God me kokos o tanun sul alo liŋe leleasag, o manigiu sin magarosa ineira o sul apena.

33Gate roro gai o tar valeŋaleŋa wa o lolomaran wa o gilgilala mon God! gate mon o lea veveg ŋaŋ! isei tete sike suar lai; gate matesalana, isei tete tataga suar lai namalekana! 34Ape sei gai me gilala lai o nonomia non i Lord? Si isei me qeteg var sikesike tuwale amaia? 35Si isei qa me la moai lai at munia, wa te wonoa kel mulaŋ apena? 36Ape amaia ma o ronronotar, wa o manigiu ineia, wa te rowolue at suria. Wa munia gina o leŋas ti tuai ti tuai. Amen.

Currently Selected:

Munra ta Rom 11: MOTA

Highlight

Copy