Munra ta Rom 10
10
1Ra tatasik, o gene nau we ilo mana alo toqak, wa nau we tatataro mun God apena ape neira, wasi nor o vaesuva nane. 2Ape nau we gaganag we tira ape neira si o tinegaro amaira mun o nonom apen God, nava gate tama we sar ape lolomaran. 3Ape neira gate gilala mantag naliŋan God we taniniga, wa we sikesike si a vatira naliŋara kel si we taniniga, pa gate map siwo kelura mun naliŋan God we taniniga. 4Apen i Christ o ulus lea, si a niŋa ape liŋe taniniga, mun valsei we nomtup.
5Apen i Moses we rave si o tanun we gagapalag o liŋe taniniga talo lea wasi ni te esuesu apena. 6Nava o liŋe taniniga talo nomtup ma we vava tamaike, si, Nipea vava alo toqama si, Isei te mule kalo vawo tuka? pa iloke si a lav siwo ma i Christ; 7si, Isei te siwo ilo kerei? pa iloke si a lav kalo kel i Christ ma nanra mate. 8Pa ti vet si o sava? si, O vavae arivtag iniko, alo valama wa alo toqama; wa si o vavae talo nomtup iloke kamam we maŋasag nake.
9Ape si ko qe gaganag lue mun navalama si i Jesus i Lord, wa we nomtup alo toqama si God me ge raka kelua nanra mate, te ge esuko apena; 10o manigiu si mun o toqai te nomtup suar o tano taniniga, wa mun o valai te gaganag lue suar o tano vaesuva apena.
11Ape o raverave ti vet wa si, Valsei qe nomtupua naapena tete maragai ilo. 12O manigiu gate tanoi we seasea munsei ta Judea wa munsei ta Grekia; ape ineia gina i Lord gorora nol o meresogov munrasei nol we loglog kaloa; 13ape, Valsei qe loglog kalo nasasan Lord te vaesua apena.
14Pa si ta tamaine, neira te loglog kalo gasei lai i gene neira gate nomtupua tiqa? wa neira te nomtup gasei lai i gene neira gate roŋotag tiqa ape neia? wa ineira te roŋotag gasei lai si ta itagai i gene we maŋasag? 15wa neira te maŋasag gasei lai si ta tete suwarera at apena? Tama me rave si, Gate raŋora we lulum we gaganag o lea we wia tape mataigene ŋaŋ!
16Nava neira gate roŋotag nol mora o lea we wia. Apen Isaia we vet si, Lord, isei me nomtup nomam o roro lea? 17Pa we nun ragai, o nomtup talo roŋotag ma, wa o roŋotag talo liŋan God ma.
18Wa na we vava mulaŋ wa si, Alova, wasi neira gate roŋotag mora? Pa we nun,
Nor o qalo lea me rowolue veta ilo vanua nol,
Wa nor o vavae ŋaŋ ilo ulus marama.
19Naŋ nau mulaŋ wa si, Alova, wasi Israel gate gilala mora? Pa i Moses o moai me vava mona si,
Na te vasosov nalolomiu si a titin ape sul i tagai;
Na te vasosov nalolomiu si a gagara ape sul o qaqae.
20Wa i Isaia we wawaŋ raka sage, ti vet wa,
Me ilo suar inau amon rasei gate sike inau ti;
Nau me ŋaŋalue raka munrasei gate varvarus inau ti.
21Nava mun i Israel ti vet si, O masao maran nol na me teterpan rowo napaneksa mun o sul we sirsiriga we valeleasag gese.
Currently Selected:
Munra ta Rom 10: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
