Munra ta Rom 9
9
1Nau we gaganag o liŋe nun alo i Christ, nau gate gale, wa nok o lolomaran kel we gaganag we tira apena alo Vui we Roŋo; 2si nalolok we wono aneane wa we vivtig nau wa gate motmot alo toqak. 3Ape nau we maros ran si na qeteg mok o gene vivnag nan i Christ ape ra tatasik, ira sogok qa tataga o visogoi. 4Iragai ŋaŋ nane ra nanat Israel, nanora nane o tano ramova wa o leŋas, wa o vatavata ŋaŋ wa o tano la lue lea, wa o liŋe gagapalag, wa o vavae ligoligog naŋ. 5Amaira nane o retamai, wa amaira me rowolue ma i Christ tataga o visogoi; ineia gina we toga raka sage avune savasava ŋaŋ, i God nane we toga wievavae ti tuai ti tuai. Amen.
6Nava iloke gate tama si o vavae mon God me tavamasu. Apen ragai tamaira Israel gate ineira nol ira Israel. 7Wa gate wasi o manigiu ineira ira tuptupun Abraham, wasi ineira nanatuna nol apena: nava, Te log raka alo i Isaak ira tuptupuma ŋaŋ. 8Tamaike wa si, gate iragai ra nat visogoi we natun God iloke; nava te vasogo ira nat ligoligog mun ra tuptupuna. 9Wa iloke o vavae ligoligog, si, We sasarita ape masao tau iloke nau te van ma, wa natuna te wota ma mun Sara.
10Wa gate ilone vires, nava i Rebeka mulaŋ me tiana veta mun i gene tuwale i tamanina i Isaak. 11Wa gate wota tiqa o natmera, wa gate gagapalag ilo tiqa o gene tea si we wia si we tatas; o manigiu si o nonom mot non God te tira ran apena we sasarita ape me ilo raka ti, wa gate qetegiu apena o gagapalag ŋaŋ, nava namona we loglog raka; 12o manigiu o ine me vet munia wa si, O moemera te rowrowovag mun o tawurmera. 13Tama me rave mulaŋ wa, I Jakob nau me tapea, nava i Esau nau me soŋusia.
14Naŋ o sava nina te vava? Sa si o liŋe variava amen God? Nipea ran nane. 15Ape ti vet mun i Moses si, Nau te magarosa i gene nau we magarosa ineia, wa nau te lolowia i gene nau we lolowia ineia. 16Wa o manigiu ilone, gate qetegiu apena i gene we maros mona, si we valvalago, nava namon God we magarosa matapuna. 17Ape o raverave we vava mun i Pharaoh wa, O manigiu tuwale iloke nau me sau kaloko ti, si na gaganag lue nok o mana alo iniko, wa si te maŋasag nasasak tamaine alo marama nol apena. 18Wa ape we tamaine nane ni we magarosa goro isei ni we maros, wa isei ni we maros ni we ge natoqana sin wasvat.
19Pa naŋ ko te vava mun nau wa, Si ta tamaine ape sava te qale vet si napugara? Ape isei gai me tira goro lai non o maros? 20Alova, gai tanun, iniko isei we valui goro lai God? Sa si o tarape sava te vava mun i gene me ge ti sin tarapei tamaine, wa si, Ape sava ko me ge nau si tamaike? 21Si i maw lasa tano gate mana goro tano, si ni ge mun o vavtig tano tuwale iloke o lasa nake we nom mava, wa mun iloke mulaŋ o lasa we nom mataketake apena? 22Pa si God we maros we gaganag lue non o lologagara, wa we ge o tanun ŋaŋ si a lolomaran ape non o mana, wa me maukeg mun o roŋomaul vagaqoqo ape lasa ŋaŋ tape lologagara me tiŋ taurmate moai ti si a ge tagtageag; 23wa sin ge mulaŋ o tanun ŋaŋ si a lolomaran ape tar valeŋaleŋa tape leŋasina alo lasa ŋaŋ tape magarosa, ni me ge taurmate ti ape leŋas, 24inina qa nake iloke, ni me suware inina ma tamaine, gate tamaira Israel magasera, nava tamaira sul ŋaŋ we sea? 25Tama ti vet mulaŋ alo i Hosea si,
Nau te log ilone o sul anak gate sul anak tea,
Wa iro gene gate meratape si o meratape.
26Wa te tamaike, alo masaoi me vava ti mun ragai aia si,
Kamiu gate sul anak,
Si te loglogira aia ira nanatun God i esu.
27Wa i Isaia ti awoawo apenra Israel wa, Si ta vava lai apenra nanat Israel si we qoqo tama o one a lau, te vaes vires o tapai. 28Ape ni te ge vunvun wa ni te teve mot alo liŋe taniniga; apen i Lord te ge mot non o vavae avawo tano. 29Wa tama i Isaia me vava moai ti wa,
Si i Lord Sabaoth ta tete tivtag munina o sivui,
Nina me qeteg tama o Sodom, we sasarita ape o Gomora.
30Pa si ta tamaine nina te qara vava o sava apena? Si o sul ŋaŋ we sea gate tatataga ape liŋe taniniga, pa me taur suar lai o liŋe taniniga, o liŋe taniniga gina iloke we rowolue ma alo nomtup; 31pa si ra Israel we tatataga o lea tape liŋe taniniga, pa gate niŋa lai o lea ilone. 32Wa ape sava? Ape neira gate sikesike alo nomtup, nava tama alo gagapalag ŋaŋ tape lea. Ape neira me tutuag mora ape vat tutuag ilone; 33tama me rave veta,
Ilo, na we map alo Sion o vat tutuag, wa o vat teqateqa;
Wa valsei qe nomtupua naapena tete maragai ilo.
Currently Selected:
Munra ta Rom 9: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
