Munra ta Rom 13
13
1Val gene esu ni toga sur siwo alalaŋe tano liwoa goro ŋaŋ we raka sage: ape itagai tea o tano liwoa goro, nava amen God ma; wa apena ŋaŋ nake, wa amon God me qeteg apena. 2O manigiu si sei qe vatriv goro o tano liwoa goro, ni me tira goro veta o liŋai God me vareg ti apena; wa irasei ta tira goro te taur mora o liŋe veveg alo ineira kel.
3Ape ira gene liwoa gate gene kikina mun o gagapalag we wia, nava mun o malkeke. Pa ko we maros si nipea gogogolo ape tano liwoa goro? Ka gagapalag moma o gene we wia, wa ko te taur moma o liŋe varean amaia apena: 4ape ineia nane i gagapalag anan God muniko ape gene we wia. Nava alo si ko qe gagapalag we malkeke, ka gogolo; ape ni gate taur matila o gasal. Ape ineia nane i gagapalag anan God, sin sar mun o lologagara mun i gene qe gagapalag we tatas. 5Wa o manigiu o ine, amomiu ran si a toga sur siwo, wa gate o manigiu o lologagara vires, nava o manigiu o lolomaran kel.
6Wa iloke o manigiu si kamiu a vile munrasei we rowrowoag tal o som; ape neira ŋaŋ ira rowrowovag anan God we rowo gis vagae ape gene tuwale ran iloke.
7Tur wono nol napugura mun val rasei; si ta munsei o tuvag te vile sargag mun i liwoa, o tuvag; si ta munsei o som we rowrowoag, o som: si ta munsei o momogo, o momogo: si ta munsei o nom mava, o nom mava nane.
8Nipea si o pug avunamiu, nava si a vartapetape kamiu; ape isei we tape i tuara ni me ge tira nol veta o lea. 9Ape iloke si, Nipea pakapaka, Nipea vus nawono, Nipea palpal, Nipea tila galegale, Nipea ararike, wa si ta lea gatogoro tea mulaŋ we sea, me vile tuwale si a log qatutui alo vavae iloke wa si, Ka tape i tagvanuama tama iniko kel.
10O tapeva tete ge manaras ilo o tagvanua; o manigiu ilone o tapeva o gene o lea we tira qet nia. 11Wa iloke ti, nina we gilala ran o masaoi, si o masao qoŋ veta mun kamiu si a tavaraka nan o matur alolona: ape o vaesuvanina we arivtag nake nan amoa alo nina qara nomtup raka.
12O qoŋ me paparau veta, wa o maran me rivtag veta ma. Sowo, nina a savrag reag o gagapalag ŋaŋ talo silsiliga, wa a saru goro nina mun o reŋreŋ marmararan. 13Nina lalalano mantag tama alo maran, nipea alo we ganagana vasusumag nina, wa alo we imaima malesles, nipea alo pakapaka wa o matev wasmata, nipea alo ganor wa o loloanu. 14Nava tur saru goro kamiu mun i Lord Jesus Christ; wa turpea nom vasarig ape visogoi si a tataga o tortoron ŋaŋ tapena.
Currently Selected:
Munra ta Rom 13: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
