Munra ta Rom 14
14
1Pa i gene qe mageregere alo nomtup tur lav vasgot momiu; panava nipea lavia si a veveg ulul o gene ŋaŋ te varvarleasag apena. 2O tuara tanun wun te nom mot si ni gana lai o savasava ŋaŋ, nava i gene we mageregere ti ŋaŋaŋau vires. 3I gene we gana, ineia nipea nom tagtageag i gene gate ganagana, wa i gene gate ganagana, ineia nipea veveg i gene we gana; apen God me lav vasgot veta ineia. 4Iniko gai isei we veveg anansei we sea o rowrowovag? Mun i tur tagina ni we tira, si ni we masu. Nava te vatira ran ineia, apen God we mana si a vatira ineia.
5Wa o tuara tanun wun te veveg ape qoŋ si raka sage nan o tuara qoŋ; nava o tuara te veveg gese ape val qoŋ ŋaŋ. Val sei ni sov taurmate naapena alo non o nonomia kel. 6I gene we nonom ape qoŋ ilone we nonom apena mun i Lord: wa i gene we ganagana, we gana mun i Lord, ape ni we wievavae God apena; wa i gene gate ganagana, ni gate gana mun i Lord, wa ni we wievavae God apena. 7Ape i tagai isei amen nina we esuesu mun neia kel, wa i tagai isei we mate mun neia kel. 8Ape si nina qe esuesu, nina we esu mun i Lord; wa si nina qe mate, nina we mate mun i Lord. Wa o manigiu ilone si nina qe esuesu, wa si nina qe mate, inina ra anan i Lord gegese. 9Ape iloke i Christ me mate apena wa me tavaraka, wa me esu kel, si ni Lord goro ira mate wa gorora we esuesu mulaŋ.
10Iniko gai, apesa ko we veveveg i tasima? Si iniko mulaŋ, ape sa ko we surtagtageag i tasima? Ape nina nol te tira ape tano veveg non God. 11Ape me rave veta si,
Nau we esuesu, amon i Lord we vava, wa val qaui te vatieqau mun nau,
Wa val garameai te gaganag weswes lue mun God.
12Pa we nun gai, val nina te gaganag lue ape inina kel mun God. 13Wa o manigiu ilone nina nipea varveveveg mulaŋ inina; nava tur veveg vaglala ape iloke raka sage, nansei wa map o sava mun i tasina sin teqa, wa sin tutuag apena.
14Nau me gilala mok, wa me nomtup ran apena alo i Lord Jesus, si i tagai o gene we lepa matapuna; pa si sei qe nonom ape gene ilone si we lepa, mun i gene ilone we lepa nane. 15Ape si mun o sinaga i tasima qe lolowono, pa ko gate mulemule mulaŋ we sasarita ape tapeva apena. Nipea ge tagea mun gama o sinaga i gene ilone i Christ me mate veta ape ineia. 16Wa o manigiu iloke, nipea o tanun a liŋasapur lai nomiu o gene we wia. 17Ape o marana non God gate gene we gana wa we ima, nava o liŋe taniniga wa o tamata wa o lolomasekeseke alo Vui we Roŋo. 18Apen i gene we rowrowovag mun i Christ alo iloke we tangemarmaros mun God, wa o tanun ŋaŋ we ilo vaglala ape ineia si we wia. 19Wa o manigiu iloke nina tataga ran o gene ŋaŋ we tira ape tamata, wa o gene ŋaŋ ape we vilit o ima mun valval nina. 20Nipea sesewora ape sinaga o tano gagapalag anon God. O val savasava we wenewene: nava we tatas mun o tanun we ganagana mun o ge tutuag. 21We wia ras si nipea pig ilo o visogoi, si we ima o wine, wa nipea o sava tea i tasima te teqa apena, si te tutuag, si te qeteg mageregere apena.
22Iniko qa, o nomtup amaiko, ka taur moma ilone alo iniko kel ape nagon God. Turwia i gene gate veveg kelua alo gene ni we veveg vaglala apena. 23Te veveg qalo i gene we veveg seasea, sin qe pig, ape gate qetegiu apena alo nomtup. Wa o val gene gate qeteg raka alo nomtup o ganganor nane.
Currently Selected:
Munra ta Rom 14: MOTA
Highlight
Share
Compare
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
