Mariko 12

Niphwanaphwaniho na oollima emata yampesa

(Mat 21.33-46; Luk 20.9-19)

1 # Yes 5.1,2 Vano Yesu ahaamba ollota m'maphwanaphwanihoni wi, “Waakhalla muthu mmodda aallimalle emataaye ya ezipaso ddampesa. Aamaka mpanda moowaapheella emateeyo, aasema nlliti moovotellamo ezipaso ddampesa, aamaka nttattha nookeraatthivo yaaweheraka emateeyo. Vano aapolleyiha emateeyo wa athu oollima nave olliye avenyavo aya o ellapo emodda. 2Yakwakhwanilliiwa enthawi yootthukumaniha ezipaso ddampesooyo, aamuruma mullupa muttekwaaye wa oollimaayo wi aakhelle ezipaso dda m'matanimmo. 3Oollimaayo yaamuphara mullupa muttekooyo, emuukutha, emuhokollosa ehimuvahille ello. 4Vano aamurumihattho mullupa mutteko mmodda koma oollimaayo yaamuukutha m'muruni ni omweerella ddoowulliha muru. 5Nave aamurumihattho mullupa mutteko mmodda. Koma yaamwiipha nave yaaweerella amodda emoddamoddave yeella, amodda owuukutha ni amodda owiipha. 6Aakhalla ni mwaana ookondiwa aamullopwana mmodda. Voomallihellani, aamurumiha mwanayooyo wa oollimaayo allota wi, ‘Eneeromuvaha olemu mwanaka.’ 7Koma oollimaayo yaalleellana wi, ‘Olla sika mwanaye aamullopwana anaahallena eyuumeella, hankoni nimwiiphe wi eyuumeella ekhalle yaahu.’ 8Sika yaamuphara emwiipha evokhella mutembwaaye otte wa emateeyo.”

9Yesu ahaakoha wi, “Vano anaaweere tini mwaneena a ematoolla? Aneeroowa wi awiiphe oollimaayo nave apolleyihe emateeyo wa athu amodda. 10#Mas 118.22,23Khamweerengille mawu a Mulluku awi,

‘Nlluku nno nakhootiwe ni oomaka enyumba,

nenna naakhalla nlluku noopaalleya.

11Nndda ddaheeriwa ni Apwiya

nave eri yoottikhiniha oyoona!’ ”

12Attekweene a Ayuda* yaapaalla wi emmake Yesu kaambiiwa yaadduwella wi ahaalleella niphwanaphwaniho nowaavaanyiha. Koma yawoova athwaayo, sika yaamuhiya evenyavo.

Nikoho na okhoma musonkho

(Mat 22.15-22; Luk 20.20-26)

13Afarisi* amodda ni athu a mulloko wa Herode* yaarumiwa wa Yesu wi yamuphwanyelle mullatu voomukohani ddoomuwaka muwano. 14Yaphiyalliiwa yaallota wi, “Ahuddihi, ninnadduwella wi muri oollota ddawoona. Munnahuddiha ddawoona dda opaalla wa Mulluku wa athu nave muhikhupanyeke dda wi athu enuuganizerekeni tini kaambiiwa khamunawehattho ekhove. Sika munilleelle hiyaano. Tti ddawaakhullelliwa ni malamulwaahu okhoma musonkho wa Kaisara* apaalle khe ddiiddo?”

15Koma Yesu voodduwellani maganizwiiwa oolleka aallota wi, “Munakeesella tini? Wannani nikobiri nookhomella musonkho wi koone!”

16Yaawaana nikobiri nimodda nave Yesu ahaakoha wi, “Ekhoveella ni nnddinanna tti ddawani?”

Yahaakhulla wi, “Dda Kaisara.”

17Vano Yesu aallota wi, “Ddawoona, sika velleellani wa Kaisara nnddo ddiri dda Kaisara nave velleellani wa Mulluku nnddo ddiri dda Mulluku.”

Vano Yesu ahaattikhiniha.

Nikoho na ovenya wa ookhwa

(Mat 22.23-33; Luk 20.27-40)

18 # Mit 23.8 Asaduki* amodda, ayo ehinakhulupilila wi ookhwa ttuuvenya, yaawa wa Yesu ellota wi, 19#Deu 25.5“Ahuddihi, Mose aalemba wi muthu akhwa amuhiya mwaariye ahinna anamwani, mwanamunne amutthelle mutthiyanooyo wi amuyarelle anamwani ookhooyo. 20Vano waakhalla muthu ni asinne atthanu ni mmodda, aatthella akhwa ahinna anamwani. 21Nave mwanamunne aamutthella mutthiyanooyo, nayeene aakhwa ahaahiyalle anamwani. Yaheereya emoddamoddave yeeyo wa mwanamunne aneeraru. 22Emoddamoddave yeeyo yaheereya wa asinne attheene. Voomallihellani, mutthiyanoollettho aakhwa. 23Vano va nllapo na ovenya wa ookhwa mutthiyanooyo anaakhalle mwaara awani va allopwana atthanu ni eellaayo vawi attheene yaamutthella?”

24Yesu ahaakhulla wi, “Munnalakwa kaambiiwa khamunadduwella mawu a Mulluku naari masiva a Mulluku. 25Vawi voovenyani ookhwa khavikhalla naari otthelliwa koma attheene enaakhalle wonanko angelo ooddullu. 26#Eks 3.6Vano dda ovenya wa ookhwa, khamweerengille mu nibukhu na Mose dda makukhu yakhara munllo mvo Mulluku allotilleeye ni Mose wi, ‘Miyaano kiri Mulluku a makhollwaanyu, Mulluku a Abrahamu, Mulluku a Isaki ni Mulluku a Yakobo.’ 27Olliyooyo khahiyo Mulluku a athu ookhwa koma tti a athu ookumi. Munnalakwa wunchichi.”

Dda lamulo nuullupalli

(Mat 22.34-40; Luk 10.25-28)

28Muhuddihi a malamulo* aari iiwellellaka ovaanyihananko. Ahoona wi Yesu aawaakhulla phaama Asaduki, sika aamukoha wi, “Lamulo nuullupalli ohiyana ni mattheene tti niivi?”

29 # Deu 6.4,5 Yesu ahaakhulla wi, “Lamulo nuullupalli tti nna, ‘Iwella Israele, kheyiivo apwiya amodda koma Apwiya Mullukwaahu. 30Nave waakondeke Apwiya Mullukwaawo ni murimaawo muttheene ni okumaawo muttheene ni maganizwaawo mattheene navettho ni masivaawo mattheene.’ 31#Lev 19.18Naneepiilli nuullupalli moophwanaphwana tti nna, ‘Waakondeke akhwaawo wonanko mmo oniikondelleewe weekha.’ Kheyiivo malamulo muullupalli ookhwaranya meellaalla.”

32 # Deu 4.35 Muhuddihi a malamulo aallota wa Yesu wi, “Mohaakhulla phaama, Ahuddihi! Moollota ddawoona wi ori Mulluku mmodda. 33#Hos 6.6Nave onapaalleya wi omukondeke Mulluku ni murimaawo muttheene ni maganizwaawo mattheene ni masivaawo mattheene navettho omukondeke mukhwaawo wonanko mmo oniikondelleewe weekha. Malamulo meellaalla tti oopaalleya ohiyana ni oheraatthi mukutho wooshellelliha wa Mulluku.”

34 # Luk 10.25-28 Nave Yesu vawoonani wi ahaakhulla mweezeru, vano aallota wi, “Khorakamellane ni omwene wa Mulluku.”

Ddiviralle ddenndda khavaarittho muthu allipalle murima omukoha Yesu makoho mamodda.

Nikoho na Mesiya

(Mat 22.41-46; Luk 20.41-44)

35Yesu ahuddiheeye mu enyumba ya Mulluku, aakoha wi, “Ahuddihi a malamulo enallota mwawiidde dda Mesiya* wi tti Edduullu ya Davide? 36#Mas 110.1Munepa Waweella aamuhoollella Davide wi allote wi,

‘Apwiya yaallota wa apwiyaaka wi,

“Khalla o nnattanatta naka

ophiyera kaagonjihalle adanaawo.” ’

37Sika Davide aamuromolla olliye wi Apwiya, Mesiya vano anaakhalle edduullu ya Davide mwawiidde?” Mulloko wa athu muullupalli watthukumannooyo waahakallalla voomwiiwani Yesu.

Yesu anaachenjeza dda ahuddihi a malamulo

(Mat 23.1-36; Luk 20.45-47)

38Yesu aahuddiheeye aallota wi, “Chenjerani ni ahuddihi a malamulo vawi ennakonda weeteeta ewanre mikanjo ddiwa ni ovahiwa mooni moolemu mu misika. 39Ennakondattho otthoolla mipando ddoolemu mu enyumba ddamavekello* ni mapuro oolemu vamachellelloni. 40Ennaachella anaamukhwelle ni waakusella katundwiiwa naari enyumba ddiwa ddene, vawaamarani athu muyeepe owiitthoni ni mavekello oorekama. Ollakiwa wiwa oneerokhalla wuullupalli waakhwaranya athu amodda!”

Yoovelleella ya naamukhwelle

(Luk 21.1-4)

41Yesu akeraatthilleeye moowehanana ni moosungellamo ddoovelleella mu enyumba ya Mulluku, aawoona athu emorihellaka makobiriiwa moosungellamo. Athu anchichi eeyuuma yaamorihellamo makobiri awaata. 42Nave naamukhwelle oohoowa aawa amorihellamo asimakobiri meelli, ookwakhwana nikobiri nimodda. 43Yesu awiithana oohudderaaye vamodda allota wi, “Ddawoona, kinimuulleellani wi, naamukhwelle oohoowooyo sika amorihellemo ddinchichi ohiyana ni attheenaayo. 44Vawi amoddaayo yaavelleella moollikana ni nnddo yavahullalliiwa va eyuumiiwa koma olliyoolla ni ohoowa wayenngu, oovelleella ddittheddene aariiyena wi achelleke.”

Currently Selected:

Mariko 12: MW2019

Highlight

Copy