Mariko 11

Ovollowa wa Yesu mu Yerusalemu

(Mat 21.1-11; Luk 19.28-40; Yoh 12.12-19)

1Yesu ni oohudderaaye yaatamelliiwa o Yerusalemu, vakhuviru ni matawoni a Betefage ni Betaniya, va mwaango wa Olivi. Yesu ahaarumiha oohudderaaye eelli wi ehoolle. 2Ahaalleella wi, “Khaweni m'muzi muhoollo mwanyu. Enthawi yeeyo mwaphiya muneeromuphwanya mwaana a bulu oomakellelliwa, oyo ahinawelliweke nikhalle nene. Mwamuttaphulle muweena wa miyaano. 3Muthu uukohani wi, ‘Kaambiiwa tini muneereenyu yeeyo,’ mumulleelle wi, ‘Apwiya#11.3 Apwiya: apaalle Mwaneena. ennampaalla nave eneeromuhokollosa weewuno veneva.’ ”

4Sika yaayaawo, yamphwanya mwaana a bulooyo amakellelliwe vakhuviru ni va mullako va enyumba yowaatamella m'musewuni nave yaamuttaphulla, 5Athu amodda yiimenlle vakhuviru yahaakoha wi, “Munamuttaphullella tini bulooyo?”

6Yahaakhulla moollikana ni ddalleelliwiiwa ni Yesu nave athwaayo yaawaakhullella wi erowekena. 7Yaawaana wa Yesu mwaana a bulooyo, yaanddellella ddawiikhuneella ddiwa va yooyo. Vano Yesu aawella akeraatthi. 8Athu anchichi yahaanddellella ddawiikhuneella ddiwa m'musewuni, amodda yahinttaka enthambi dda miteekho yaanddellella m'musewuni. 9#Mas 118.25,26Athu yeeta vahoollo va Yesu ni vatulli vaye yaakhuwa wi, “Ntitimiho nikhalle wa Mulluku! Oodalisiwa oyo anawa mu nnddina na Apwiya! 10Odalisiwe omwene wa Davide nikhollo nahu, oyo onawooyo! Ntitimiho nikhalle wa Mulluku!”

11Yesu aavollowa mu Yerusalemu, aya mu enyumba ya Mulluku nave aawehaweha ddeko ddittheddene mwemmo. Nave kaambiiwa waari misikuwa, aakhuma aya o Betaniya ni oohudderaaye khumi ni eellaayo.

Yesu anatembelela muteekho wanamukuyu

(Mat 21.18-19)

12Osaka wene Yesu ni oohudderaaye yavenyeriiwa o Betaniya, Yesu aavolliwa ettalla. 13Ari voorekama ahoona muteekho wanamukuyu ori ni makukhu, sika aaya wi oone eeki amuphwanyemo namukuyu. Koma aphiyalleeye, aphwanyille makukhuve vawi kheyaari enthawi yawi namukuyooyo aawerowiima. 14Yesu aallota wa muteekho wanamukuyooyo wi, “Khakhallavottho muthu anaawe amuche namukuyu oovenyera mwa weyaano!”

Nave oohudderaaye yaamwiiwa.

Yesu anawiikariha athu mu enyumba ya Mulluku

(Mat 21.12-17; Luk 19.45-48; Yoh 2.13-22)

15Yesu ni oohudderaaye yaphiyalliiwa o Yerusalemu, Yesu aavollowa mu enyumba ya Mulluku aamba owiikariha athu ookulliha ni ookulla malonda a ddeko ddooheraatthella mukutho mwemmo. Aarukunusa matebulo a athu awaakakhaniha makobiri navettho mipando dda ookulliha ekhunda. 16Nave khaakhullenlle wi muthu atukhulle ddeko ddookulliha wi aweellena vanthatoni na enyumba ya Mullukweeyo. 17#Yes 56.7; Yer 7.11Nave aahuddiha allota wi, “Mulluku aallota mu mawaaye wi, ‘Enyumbaaka ekhalle enyumba yoovekellamo athu a mitundu ddittheddene.’ Koma nyuwaano mooyitthattusa nipuro nawiipitthamo allupaawiiya!”

18Allupa mukutho uullupalli ni ahuddihi a malamulo* yiiwalliiwa yeella, yahaamba waashaasha ettilla yawi emwiiphelle Yesu. Yaanamoova kaambiiwa athu attheenaayo yaattikhina wunchichi ni ehuddihwaaye.

19Wasikuwalliiwa, Yesu ni oohudderaaye yaakhumamo m'muzindanimmo.

Ehuddiho ya muteekho wawumma wanamukuyu

(Mat 21.20-22)

20Osaka wene ohinase Yesu ni oohudderaaye yeetiiwa m'musewuni, yahoona muteekho wanamukuyoolle. Waari wummalle muttheene ni misisi ddene. 21Petro ahuupuwella ddeereyenndde nave aallota wa Yesu wi, “Ahuddihi, ngoonani muteekho wanamukuyu mwawutembeleleenyuulle wohumma!”

22Yesu ahaakhulla wi, “Mukhalle ni echikhulupililo mwa Mulluku. 23#Mat 17.20; 1 Ako 13.2Ddawoona, kinimuulleellani wi muthu ahiikayikellaka yeekha m'murimani mwaye koma anakhulupilila wi eyo allotilleeye eneereweereya nave allota wa mwaangoolla wi, ‘Venya wiivokhelle weekha mu enyanja,’ eneereweereya. 24Ekaamba ya yeella kinimuulleellani wi munavekeenyu munivekello, khulupililani wi mohaakhella nave eneerovahiwa wa nyuwaano. 25#Mat 6.14,15Mwaawiimellaka ni ovekella, mwaakhululukelleke athu attheene ayo yuulakwenlleni. Vano Attiitthaanyu ooddullu eneerewuukhululukellani machimwaanyu.”#11.25: Ddoolemba ddimodda ddakhalle ddaanaanjereravo evesi 26: Koma mwahaakhululukella amodda, sika Attiitthaanyu kheyuukhululukellani machimwaanyu (onani Mat 6.15).

Nikoho na olamulello wa Yesu

(Mat 21.23-27; Luk 20.1-8)

27Yesu ni oohudderaaye yaaphiyattho o Yerusalemu. Nave vaari Yesu eeteeye mu enyumba ya Mulluku, allupa mukutho uullupalli, ahuddihi a malamulo ni attekweene a Ayuda* yaamuweella. 28Nave yaamukoha wi, “Muneera ddenndda ni olamulello woovenyera wuuwi? Uuvahilleni olamulello woweera ddenndda ttaani?”

29Yesu ahaakhulla wi, “Mittho kineerewuukohani nikoho nimodda, mwakaakhulla, kineerewuulleellani wi kineera ddeko ddenndda ni olamulello wa aani. 30Mukilleelle, Yohane aakusalle wuuwi olamulello woobatiza, waavenyenre wa Mulluku apaalle wa athu?”

31Yaakambirana weekhiiwa wi, “Nillote wi tini? Namwaakhulla wi, ‘Wa Mulluku,’ aneerollota wi, ‘Khamwaamukhulupililalle Yohane kaambiiwa tini?’ 32Koma eneereye tini nallota wi, ‘Ovenyera wa athu?’ ” Vawi yaanoova eyo eneere athu kaambiiwa attheene yaamwaakhullella Yohane wi aari namallotella. 33Sika yaamwaakhulla Yesu wi, “Khaninadduwella.”

Nave Yesu aallota wi, “Naari miyaanottho nguulleellani wi ddenndda kineera ni olamulello wa aani.”

Currently Selected:

Mariko 11: MW2019

Highlight

Copy