Mariko 10
10
Dda omwallana
(Mat 19.1-12; Luk 16.18)
1Yesu aavenyawo onipuroninko, aya o echigawo ya Yudeya ni okhopella wa muhinje wa Yordani. Athu anchichi yaawattho emutthukumanella nave ahaahuddihattho kaambiiwa aaddollweella weera ddiiddo.
2Afarisi* amodda yaawa wa olliyooyo, emukoha moomweesa wi, “Tti wowaakhullelliwa ni malamulwaahu wi muthu amwallane ni mwaariye?”
3Yesu ahaakhulla ni nikoho wi, “Mose uulamulalleni wi tini?”
4 #
Deu 24.1-4; Mat 5.31 Yahaakhulla wi, “Mose ahaakhullella wi muthu amulembeke kalata oomwallanella nave amuhiyeke mwaariyooyo.”
5Yesu aallota wi, “Mose ahuulembelani malamulo yaalla kaambiiwa nyuwaano tti awumma murima. 6#Gen 1.27; 5.2Koma Vawaambawaamba va ophatusa, ‘Mulluku ahaaphatusa athu, mullopwana ni mutthiyana.’ 7#Gen 2.24‘Nave ekaamba ya yeella mullopwana aneerekewaahiya attiitthinnya ni amennya aya atthella.#10.7: Ddoolemba ddimodda ddakhalle khaddinna mawu awi aya atthella. 8Nave eellaayo eneerokhalla mwiilli mmodda.’ Sika kherittho eelli koma mmodda. 9Vano eyo Mulluku amakilleeye vamodda, muthu ahihiyanihe.”
10Yesu ni oohudderaaye yavollowilliiwa mpa, oohudderaayo yaamukoha Yesooyo dda nnddo ahuddihalleeye. 11#Mat 5.32; 1 Ako 7.10,11Aallota wi, “Mullopwana amuhiya mwaariye amutthella mmodda, animararuwa. 12Emoddamoddave yeeyo, mutthiyana amuhiya mamune atthelliwa ni mullopwana mmodda, animararuwa.”
Yesu anaadalisa anamwani
(Mat 19.13-15; Luk 18.15-17)
13Athu amodda yaawaana anamwani wa Yesu wi iiyaatthi mattaaye va alliwaayo wi aadalise koma oohuddera yahaahumullulla athwaayo. 14Yesu oonilleeye yeella, aasha murima nave aallota wa oohudderaaye wi, “Ahiyeni anamwanaayo ewe wa miyaano, muhaahiihe kaambiiwa omwene wa Mulluku tti wa athu ookhalla wonanko anamwanaalla. 15#Mat 18.3Ddawoona, kinimuulleellani wi, muthu oohaakhullella omwene wa Mulluku wonanko mwaana aneerelleeye khavollowamo.” 16Vano ahaakusa anamwanaayo awuupaara m'miwononi mwaye, aadalisa vawiiyaatthini mattaaye va yaayo.
Dda muthu eeyuuma
(Mat 19.16-30; Luk 18.18-30)
17Yesu avirellelleeye ni olendwaaye, muthu mmodda aamuthamakella, amukokhorella amukoha wi, “Ahuddihi aphaama, keere tini wi kaakhelle okumi woohimalla?”
18Yesu aamukoha wi, “Onakeera miyaano muthu aphaama kaambiiwa tini? Khaavo muthu ari aphaama koma Mullukuve. 19#Eks 20.13; Deu 5.17; Eks 20.14; Deu 5.18; Eks 20.15; Deu 5.19; Eks 20.16; Deu 5.20; Eks 20.12; Deu 5.16Onnadduwella malamulo a Mulluku: ‘Ohiiphe, ohiraruwe, ohiiye, ohivelleelle omboni wawoottha, ohaachelleke akhwaawo matthu vamuru, waavaheke olemu attiittho ni amaayo.’ ”
20Muthooyo aallota wi, “Ahuddihi, waambeella kiri mwaana, kaawiiwellella malamulo mattheenaalla.”
21Yesu aamuwehesesa moomukonda allota wi, “Onayelleella ello emodda. Khawe wakullihe ddeko ddittheddene oriiwena nave makobiraayo waavahe athu oohoowa nave oneerothuviwa oddullu. Weera ddiiddo owe okithware.” 22Muthooyo iiwalleeye ddenndda, ekhovaaye yaamora, avenyavo ari ookhupanya wunchichi kaambiiwa aakhalla ni eyuuma yinchichi.
23Yesu ahaaweha oohudderaaye allota wi, “Tti wookatamiha wi athu eeyuuma yavollowe mu omwene wa Mulluku!”
24Oohudderaayo yaattikhina ni mawaalla nave Yesu aallotave wi, “Akhwaaka, tti wookatamiha wi muthu eeyuuma avollowe mu omwene wa Mulluku! 25 Tti yavakhuviru wi ekamira* evire vamullakoni va singano ohiyana ni wi muthu eeyuuma avollowe mu omwene wa Mulluku.” 26Vano oohudderaayo yaattikhina wunchichi ekohana wi, “Ttaani vano, anaawore ovulluwa?”
27Yesu ahaawehesesa aakhulla wi, “Ddenndda tti ddoohiworeya ni athu koma ddinaworeya ni Mulluku kaambiiwa ddittheddene ddinaworeya ni Mulluku.”
28Vano Petro aallota wi, “Noohiya ddeko ddittheddene nuuthwarani nyuwaano.”
29Yesu aallota wi, “Ddawoona, kinimuulleellani wi, ayo ehiyalle enyumba ddiwa, asinniwa, arokoriwa, ameewa, attiitthiiwa, aniiwa apaalle emata ddiwa, ekaamba ya miyaano ni othenga waphaama, 30eneerewaakhella 100 m'mallaponi yaalla nnddo yahiyalliiwa monga enyumba, asinniwa, arokoriwa, ameewa, aniiwa ni emata ni ddoohoosa nave mallapo amuhoollo eneerewaakhella okumi woohimalla. 31#Mat 20.16; Luk 13.30Nave anchichi ayo eri awaamba eneerokhalla ookomihera nave ayo eri ookomihera eneerokhalla awaamba.”
Yesu anallota waneeraru dda okhwa waye
(Mat 20.17-19; Luk 18.13-34)
32Yesu ni oohudderaaye eri voolendoni oya o Yerusalemu ahaahoollella oohudderaayo. Vano oohudderaayo yaattikhina nave athu yaathwaraayo yahoova. Vano Yesu ahaakusellattho vakhwipi oohuddera khumi ni eellaayo aamba waalleella dda ddeko nnddo ddinaamwereyelle. 33Ahaalleella wi, “Ninnawella oya o Yerusalemu. Wenko mi, Mwaana a Muthu, kineerovelleelliwa wa allupa mukutho uullupalli ni ahuddihi a malamulo* nave eneerokamulla wi kiiphiwe nave eneerokivelleella wa athu ayo ehiri Ayuda. 34Yaayo eneerokeerella epewe, eneerokittaphera mare, eneerokiwashulla, eneerokiipha nave vavira mallapo mararu kineerovenya wa ookhwa.”
Dda muullupalli wunchichi
(Mat 20.20-28)
35Yakobo ni Yohane, anamwani a Zebedayo, yaawa wa Yesu ellota wi, “Ahuddihi, ninapaalla wi muneerelle erive ello ninaavekeehu.”
36Yesu ahaakoha wi, “Munapaalla wi kiweerelleni tini?”
37Yaamwaakhulla wi, “Mwakeraatthi vampandoni wa ntitimiho mu omwenaanyu, ninapaalla wi munaakhullelle nakhalle, mmodda o nnattanatta nanyu ni mmodda o nnatta noonyottho nanyu.”
38 #
Luk 12.50
Yesu aallota wi, “Khamunadduwella eyo munavekeenyu. Muneerowora omuwiryella kapu a ddookatamiha kinamuwiryelleemi? Muneerobatiziwa ni obatizo wa ddookatamiha wonanko miyaano?”
39Yahaakhulla wi, “Nineerowora.”
Yesu aallota wi, “Ddawoona muneeromuwiryella kapu kinaamuwiryelleemi ni obatiziwa wonanko miyaano. 40Koma nginna olamulello woomutthoolla oyo anaakhalle o nnattanatta naka apaalle o nnatta naka noonyottho. Koma mapuro yaalla tti ayo ekhozeriwe ni Mulluku.”
41Oohuddera amodda khumaalle yiiwalliiwa ddennddo, yahaashella murima Yakobo ni Yohane. 42#Luk 22.25,26Vano Yesu aawiithana attheenaayo vamodda allota wi, “Munnadduwella wi oolamulella a athu a ellapo yavatthi ennakhalla ni masiva va olamulelliwa nave oohoollella aakhalla ni olamulello va oohoollelliiwa. 43#Mat 23.11; Mrk 9.35; Luk 22.26Wa nyuwaano ddihikhalleke ddiidda. Koma muthu apaalla okhalla muullupalli anaphwanella akhalle oorumeyella attheenenyu. 44Nave oyo anapaalla okhalla awaambeella mwa nyuwaano, akhalle kaporo a attheene. 45Vawi naari mi, Mwaana a Muthu, ngaawiille wi kirumeyelliwe koma wi kaarumeyelle ni ovelleella okumaaka owoopolla athu anchichi.”
Yesu anamuchiriha muthu oohoona
(Mat 20.29-34; Luk 18.35-43)
46Yesu ni oohudderaaye yaawa o muzinda wa Yeriko. Yavenyeewawo ni mulloko wa athu muullupallooyo, muthu ooveka oohoonooyo nnddina naye Bartimeyu, mwaana a Timeyu, aakeraatthi mukhwipi mwa musewu. 47Iiwalleeye wi tti Yesu a o Nazareti anavira, ahaamba okhuwa wi, “Nyu Yesu, edduullu ya Davide, mukeerelle echifundo!”
48Athu anchichi yaamusimwella emulleella wi amaalle. Koma aavirellella okhuwa ohiyana ni vawaamba wi, “Edduullu ya Davide, mukeerelle echifundo!”
49Yesu ahiimella allota wi, “Mwiithaneni awe.”
Sika yaamwiithana muthu oohoonooyo ellota wi, “Llipa murima, venya, animawiithana.”
50Aatathilla yawiikhuneellaaye nave aallupha, awa wa Yesu.
51Yesu aamukoha wi, “Onapaalla wi kiweerelle tini?”
Ahaakhulla wi, “Ahuddihi, kinapaalla wi kooneke.” 52Yesu aamulleella wi, “Rowa, echikhulupilwaawo yohuuchiriha.”
Enthawi yeeyo ahoona, amuthwara Yesu voolendonooyo.
Currently Selected:
Mariko 10: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
