Mariko 13

Dda okumulliwa wa enyumba ya Mulluku

(Mat 24.1-2; Luk 21.5-6)

1Yesu akhumalleeye mu enyumba ya Mulluku, mmodda a oohudderaaye aallota wi, “Ahuddihi, ngoonani, malluku ni enyumba ddoophwanelliwanndda!”

2Yesu ahaakhulla wi, “Ethiyo munnoona enyumba dduullupallinndda? Ddawoona, kinimuulleellani wi, vaava khavikhalla nlluku naari nimodda va nikhwaaye nihinaamorihiwe.”

Ddookatamiha ni ddoohoosa

(Mat 24.3-14; Luk 21.7-19)

3Yesu aakeraatthi va mwaango wa Olivi, moowehana ni enyumba ya Mulluku. Vano Petro, Yakobo, Yohane ni Andreya yaawa wa olliye mwa weekhiiwa. 4Yaamukoha wi, “Nilleelleni, ddenndda ddineereye niini? Echizindikiro yawi enthaweeyo yookwakhwana enaakhalle yawiidde?” 5Yesu ahaamba waalleella wi, “Chenjerani wi muthu ahiwoottottheni. 6Vawi athu anchichi eneerophiya mu nnddina naka ni ollota wi, ‘Mi tti Mesiya,’* nave eneerowoottottha athu anchichi. 7Nyuwaano mwiiwa dda ekhoto ni epilli ya ekhoto, muhinahoowa m'murimani mwanyu vawi tti ddoophwanella wi ddeereye koma emallihello khenaphiye. 8Mutundu ni mutundu mmodda oneerekowana navettho omwene ni omwene omodda oneerekowana. Navettho oneerokhalla echivomerezi virive veko owaaka ettalla. Ddeko ddittheddenenndda ddinaakhalle wonanko ddoovoreya ddawaamba mwaana aayariwaka.

9 # Mat 10.17-20; Luk 12.11,12 “Sika nyuwaano chenjerani. Muneeromakiwa ni okuselliwa m'mathatoni a millatu nave muneerewuukuthiwa mu enyumba ddamavekello.* Muneerewiimella vamiitthoni va oolamulella ni mamwene kaambiiwa nyuwaano tti oohudderaaka wi mwakhalle amboni a othenga waphaama wa yaayo. 10Ehinaphiye mamallihello, othenga waphaama onapaalleya wi ollalleyiwe wa athu attheene. 11Yuukusellani omillatuni, muhikhupanyeke wi munaaye mwallote tini apaalle munaallote mwawiidde vawi enthawi yeeyo Mulluku eneerewuulleellani yawi mullote. Vawi mawu munaalloteenywaayo khekhalla aanyu koma enaavenyere wa Munepa Waweella. 12Athu eneerewaakusa yaavelleelle asinniwa wowiiphiwa nave attiitthi eneereweera emoddamoddave yeeyo wa aniiwa. Nave anamwani eneerewaawukila makhollwiiwa wi ewiiphe. 13#Mat 10.22Athu attheene eneerowiitani kaambiiwa nyuwaano tti oohudderaaka. Koma oyo anaavillelle ophiya o mamallihello, aneerovulluwa.

Yoonanara yawoononga

(Mat 24.15-28; Luk 21.20-24)

14 # Dan 9.27; 11.31; 12.11 “Vano muneerewoona ‘Yoonanara Yawoononga’ yiimenlle mu nipuro noohiphwanella wi yimellevo (Oyo aneerenga mawaalla iiwesese ottaphullella wiwa.) Vano ayo eri o Yudeya ethawelle omiyaangoni. 15#Luk 17.31Oyo ari vaatte ahiselliwe ni ovollowa mpa wi akuse ddeko ddaye. 16Oyo ari m'matani ahihokollweelle owaniwa wi akuse yawiikhuneella. 17Enthawi yeeyo ootulli enaakhalle atthiyana ayo enaakhalle ni erukullu vamodda ni awaamwiha anamwani. 18Vekellani wa Mulluku wi ddeko ddenndda ddiheereye mu eyitta. 19#Dan 12.1; Yaw 7.14Kaambiiwa, ddoohoosa ddinaawe mallapo yaayo, ddinaakhalle ddawi khaddineereyeke ovenyera mvo Mulluku aphatusalleeye ellapo ophiyera ollello nave khaddiwa ddeereyattho ddoophwanaphwana ni ddenndda. 20Nave Apwiya yahaayevihalleke mallapwaayo, khaavo naari muthu mmodda aavulluwe. Koma ekaamba ya athwiiwa ootthoolliwa, eneerewaayeviha mallapwaayo.

21“Vano muthu allota wa nyuwaano wi, ‘Mesiya ari wuno,’ apaalle wi, ‘Ari nko,’ muhikhulupilile. 22Vawi amesiya awoottha ni anamallotella awoottha eneerewooneya. Eneereweera ezizindikiro dduullupalli ni ddoottikhiniha wi wakhalla wooworeya yaahollose naari athu ootthoolliwa a Mulluku. 23Chenjerani, kohuulleellani erive ello enthawi ehinaphiye.

Owa wa Mwaana a Muthu

(Mat 24.29-31; Luk 21.25-28)

24 # Yes 13.10; Yow 2.10,31; 3.15; Yaw 6.12; Yes 13.10; Ezk 32.7 “Enthawi yeeyo ddamalla ddoohoosa ddennddo, nndduwa nineerothiima nave mweeri khowala. 25#Yes 34.4; Yaw 6.13; Yow 2.10Etheneeri ddineeromora ovenyera oddullu nave masiva a muddullu eneerotikhiwa. 26#Dan 7.13; Yaw 1.7Vano mi, Mwaana a Muthu, kineerewooneya kiwaaka vamiraponi ni masiva muullupalli ni ntitimiho. 27Nave kineerewarumiha angelwaaka omapuroni mattheene masese a ellapo yavatthi. Nave angelwaalla eneerewaatthukumaniha ootthoolliwaaka ovenyera o mamallihello a ellapo yavatthi ophiya o mamallihellwaaye mamodda.

Ehuddiho ya muteekho wanamukuyu

(Mat 24.32-35; Luk 21.29-33)

28“Muteekho wanamukuyu wuuhuddiheni ello. Enthambi ddaye ddaamba ophuwa makukhu, munnadduwella wi ellimwe yohaatamella. 29Emoddamoddave yeeyo nyuwaano mwawa moona ddenndda dduwellani wi enthawi yoohaatamella, okhozekella wohaambeya.#13.29 enthawi…wohaambeya: apaalle kohaatamella, okhozekella owa. 30Ddawoona, kinimuulleellani wi, ddeko ddenndda ddineereweereya athu a mbadoolla amodda ehinakhwe. 31Oddullu ni ellapo yavatthi ddineeromalla koma mawaaka khemalla.

Khaavo anadduwella dda nllapo ni enthawi

(Mat 24.36-44)

32 # Mat 24.36 “Khaavo anadduwella nllapo ni enthawi ya owa wa miyaano, Mwaana a Muthu naari angelo naari mwaneenaka koma Attiitthaakave sika enadduwella. 33Chenjerani, tiyerani kaambiiwa khamunadduwella enthawi enaakwakhwane niini. 34#Luk 12.36-38Ddinaphwanaphwana ni muthu atimullalle va olendwaaye ahiya enyumbaaye. Aavaha olamulello allupa muttekwaaye wi arive muthu awehereke mutteko waayewaaye nave amulleella oowehera a va mullako wi awehereke phaama. 35Sika weherakani kaambiiwa khamunadduwella mwaneena a enyumba anaawe niini apaalle misikuwa apaalle variyari va mahiiyu apaalle oyaaka ni osa apaalle nndduwa nikhumalle. 36Awa moorurumusa, ahuuphwanyeni mukonaka. 37Nave yeeyo kinalloteemi wa nyuwaano, kinallotattho wa athu attheene wi weherakani!”

Currently Selected:

Mariko 13: MW2019

Highlight

Copy