Mariko 14

Opangana ddoomwiipha Yesu

(Mat 26.1-5; Luk 22.1-2; Yoh 11.45-53)

1 # Eks 12.1-27 Vahanlle mallapo meelli wi niphiye nllapo na Paska ni Ehakallallo ya Buledi Oohikhalla ni Yisiti. Allupa mukutho uullupalli ni ahuddihi a malamulo* yahaashaasha ekaamba yoom'makella ni omwiiphella Yesu moowiipittheya. 2Yaallota wi, “Niheere ella enthawi ya machellello wi vihikhalle mapokoso.”

Yesu anazoziwa makhura o Betaniya

(Mat 26.6-13; Yoh 12.1-8)

3 # Luk 7.37,38 Yesu aari o Betaniya mpa mwa Simoni muthu amakatoolle. Yesu achaka, mutthiyana mmodda aawa wa olliyooyo ni makhura a nthuko naphaama oowallamella mutengo ooromolliwa nado mu yookusella. Nave aapwesa etthoka ya yookuselleeyo aamiminella vamuruni va Yesu. 4Vano athu amodda yaasha murima ekohana wi, “Anoonongella tini makhuraalle? 5Makhura yaalla yeerokullihiwa voowallamella mutengo ni waavaha athu oohoowa makobiraayo.” Nave yaamuhumullulla mutthiyanooyo.

6Koma Yesu aallota wi, “Muhiyeni mutthiyanoolla! Munamuhoosella tini? Vawi ookeerella ello yaphaama. 7#Deu 15.11Vawi munnakhalla ni athu oohoowa mallapo mattheene nave enthawi munapaalleenyu, muneerowora oweerella ddaphaama. Koma khamukhalla ni miyaano mallapo mattheene. 8Yoolla oheera yoophwanella wi eere vookimiminellani makhura vamwiillini vaka okikhozera dda ovitthiwa waka. 9Ddawoona, kinimuulleellani wi orive weko mu ellapo yavatthi ettheene onaallalleyiwelle othenga waphaamoolla, athu eneerollota yeella enreeye wi emuupuwelleke.”

Yudasi anaakhullella omuvelleella Yesu

(Mat 26.14-16; Luk 22.3-6)

10Vano Yudasi Isikariyoti, mmodda a oohuddera khumi ni eelli, aavenya aya wa allupa mukutho uullupalli wi amuvelleelle Yesu wa alliwaayo. 11Yiiwalliiwa ddallotilleeye yaahakallalla, emulonjeza wi eneeromuvaha makobiri. Sika Yudasi ahaashaasha mpata woomuvelleellella Yesu.

Yesu ni oohudderaaye enacha yoocha ya Paska

(Mat 26.17-25; Luk 22.7-14,21-23; Yoh 13.21-30)

12Va nllapo nawaamba na Ehakallallo ya Buledi Oohikhalla ni Yisiti, noomwiipha mwaanaankhosa wi emuche va Paska, oohuddera yaamukoha Yesu wi, “Munapaalla nuukhozereni wuuwi nipuro nawi mwachellevo yoocha ya Paska?”

13Vano ahaaruma oohudderaaye eelli, aalleella wi, “Vollowani m'muzindanimmo nave muneerokumana ni mullopwana atukhunlle muno wa maaddi nave mwamuthware. 14Nave avollowa mpa, mwallote ni mwaneena a enyumbeeyo wi, ‘Ahuddihi enakoha wi, eri wuuwi echipindaaka mwawi miyaano ni oohudderaaka nachellemo yoocha ya Paska?’ 15Vano aneerewuutthoonyiherani echipinda yavaddullu yuullupalli, yowaanddellelliwa phaama ddene. Wenko mwakhozerewo yoocha ya Paskaahu.”

16Oohudderaayo yaatimulla, eya m'muzindanimmo, ephwanya ddittheddene ddiri moollikana ni ollota wa Yesu nave yaakhozellawo yoocha ya Paskooyo.

17Nave voophiyani misikuwa, Yesu aawa ni oohudderaaye khumi ni eelli mu echipindeeyo. 18#Mas 41.9Vano achaka, Yesu aallota wi, “Ddawoona, kinimuulleellani wi mmodda a nyuwaano oyo anacha ni miyaano aneerokivelleella wa adanaaka.”

19Oohudderaayo yahaapheella muru yaamba okoha mmoddammodda wi, “Apaalle tti miyaano?”

20Yesu ahaakhulla wi, “Tti mmodda a nyuwaano khumi ni eelli, yooyo amurenre buledi mu embale nimodda ni miyaano. 21Mi, Mwaana a Muthu, kineerokhwa moollikana ni ddoolembiwa mu mawu a Mulluku koma ootulli tti muthu oyo anaakivelleelle miyaano! Waaweerokhalla phaama wa muthu yooyo ahiyariweke!”

Mugonelo wa Apwiya

(Mat 26.26-30; Luk 22.14-20; 1 Ako 11.23-25)

22Yesu ni oohudderaaye yachiiwa, Yesu aamukusa buledi avekella omuthokoza Mulluku. Vano aamumeyameya buledooyo aavaha oohudderaaye allota wi, “Kusani chani, olla sika mwiillaaka.”

23Nave aamukusa kapu, avekella omuthokoza Mulluku nave ahaavaha alliwaayo. Nave attheenaayo yaawiryamo mmoddammodda. 24#Eks 24.8; Yer 31.31-34Yesu aallota wi, “Nna tti nikhame naka noollipiha echipangano ya Mulluku, nookhumihiwa ekaamba ya athu anchichi.

25“Ddawoona, kinimuulleellani wi ngiwa kimuwiryattho vinyo ophiyera nllapo nenno kineereemi kimuwiryettho vinyo musha mu omwene wa Mulluku.”

26Yahiipa nchipo nave yaakhuma eya o mwaango wa Olivi.

Yesu anavallallella ollota wi Petro aneeromuruna

(Mat 26.31-35; Luk 22.31-34; Yoh 13.36-38)

27 # Zek 13.7 Vano Yesu aallota wi, “Nyu attheene muneerothawa okihiya meekhaaka vawi woolembiwa wi, ‘Mukakathe mbusa nave enkhosa dda mulloko ddineeropallalleya.’ 28#Mat 28.16Koma kavenyihiwa wa ookhwa kineerohoolla oya o Galileya.”

29Petro aallota wi, “Naari amodda yuuhiyeni, miyaano nguuhiyani.”

30Yesu aallota wa Petro wi, “Kinimuulleella ddawoona wi, mahiiyu yaalla mutthupi ohininlle wiilli, onaakhalle okikhootille oraru.”

31Petro ahaakhulla moollipihella wi, “Naari ori woophwanella miyaano okhwa ni nyuwaano, nguukhootani.”

Nave oohuddera attheenaayo yaallota ello emoddamoddave yeella.

Yesu anavekella mu Getsemani

(Mat 26.36-46; Luk 22.39-46)

32Vano Yesu ni oohudderaaye yawiilliiwa o nipuro nooromolliwa Getsemani, aallota wa oohudderaaye wi, “Khallani vaava, kinayeemi wi kavekelle.” 33Aamukusa Petro, Yakobo ni Yohane. Ahaamba okhupanya ni ohoowa m'murimani. 34Nave aallota wi, “M'murimani mwaka mooddalla ethakaraka ddinchichi ddookhwana. Hallani vaava nave muhikoneke.”

35Nave aaya vahoollo vang'ono akokhora oweha vatthi nave avekella wi, “Attiitthaaka, waworeya, enthawi ya ddookatamiheella ekikhwaranye! 36Nave avekellattho wi, Abba, Attiitthaaka ddeko ddittheddene ddinaworeya ni nyuwaano. Mukivenyiherevo kapu a ddookatamihoolla. Ohiri opaalla waka koma opaalla wanyu weereye.” 37Vano aahokollweella wa oohuddera ararwaalle, aaphwanya yiikimakona. Aallota wa Petro wi, “Simoni onimakona? Khawaaworille okhalla oohikona naari wa enthawi yooyeva? 38Muhikoneke, muvekelleke wi muhivollowe mooweesiwa. Murimaanyu onnapaalla weera ddaphaama koma mwiillaanyu tti woofooka.”

39Wiillittho Yesu aaya avekella emoddamoddave yeeyo. 40Awiilleeye ahaaphwanya oohudderaalle ekonakattho vawi yaatopa. Nave kheyaari ni yoomwaakhulla. 41Awiilleeye waneeraru, aallota waalliwa wi, “Munimakona ni wiithuuwa? Ddookwakhwanella! Enthawi yookwakhwana yawi mi, Mwaana a Muthu, kivelleelliwe wa athu oochimwa. 42Venyani, hankoni niroweke. Ngoonani, ookivelleella ari vaava.”

Omakiwa wa Yesu

(Mat 26.47-56; Luk 22.47-53; Yoh 18.3-12)

43Yesu allotaka ddiiddo, Yudasi, mmodda a khumi ni eelli a oohudderaalle, aaphiya ni mulloko muullupalli wa athu ekusalle masupada ni ekoonda erumiwe ni allupa mukutho uullupalli, ahuddihi a malamulo ni attekweene a Ayuda.* 44Vano oomuvelleellooyo ahaavaha echizindikiro wi, “Oyo kinaamukhupaarelleemi tti yooyo, mummake, mumukuse nave mumuwehereke phaama.”

45Enthawi yeeyo Yudasi aphiyalleeye, aaya wa Yesu allota wi, “Ahuddihi!” Eerille ddiiddo aamukhupaarella. 46Sika yaamphara emmaka moollipiha. 47Nave mmodda a yaayo iimenlle vakhuviru aahullulla nsupada amuphadda naaru kaporo a mullupa mukutho muullupalli. 48Nave Yesu aallota wi, “Muphiyalle ni masupada ni ekoonda wi mukimake wonanko miyaano tti echigawenga? 49#Luk 19.47; 21.37Nllapo ni nllapo kakhalla ni nyuwaano mu enyumba ya Mulluku ohuddiha koma khamwaakimakille. Koma nndda ddineereya wi mawu a Mulluku ekwakhwanihiwe.”

50Vano oohudderaaye attheene yaamuhiya ethawa.

51Musombwe mmodda oyo awanre ekuwove aanamuthwara Yesu, mullokooyo waapaalla omphara olliyooyo, 52koma aahiya ekuwaaye mutulli athawa oohiwara.

Yesu vanthatoni na attekweene a millatu a Ayuda

(Mat 26.57-68; Luk 22.54-55,63-71; Yoh 18.13-14,19-24)

53Nave Yesu yaamukusella wa mullupa mukutho muullupalli, nko yaatthukumanne allupa mukutho attheene, attekweene a Ayuda ni ahuddihi a malamulo. 54Nave Petro aamuthwara moomurekamella, ophiyera vanthatoni na mullupa mukutho muullupalli. Aavollowamo akeraatthi ni akhoto oowehera enootha munllo. 55Nave allupa mukutho uullupalli ni attekweene a millatu attheene yahaashaasha omboni woomuvaanyihera Yesu wi emwiiphe koma kheyaaphwanyille. 56Vawi athu anchichi yaavelleella omboni wawoottha dda Yesu nave ombonooyo khawaallikanne.

57Vano amodda yahiimella ellota omboni wawoottha woomuvaanyiha Yesu wi, 58#Yoh 2.19“Hi naamwiiwa allotaka wi, ‘Miyaano kineerokumulla enyumba ya Mullukweella yoomakiwa ni athu nave vavira mallapo mararu kineeromaka emodda yoohimakiwa ni athu.’ ” 59Komattho naari alliwaayo omboniiwa khawaallikanne.

60Vano mullupa mukutho muullupalli ahiimella vahoollo va attheenaayo amukoha Yesu wi, “Khonaakhulla nnddo athwaalla enallotiiwa dda wuuvaanyiha weyaano?”

61Nave Yesu khaakhullalle koma aari moona wi llakallaka. Mullupa mukutho muullupalli aamukohattho wi, “We tti Mesiya,* Mwaana a Mulluku Ootitimihiwa?”

62 # Dan 7.13 Yesu ahaakhulla wi, “Tti meene nave muneerokoona mi, Mwaana a Muthu, kikeraatthille onnattanatta na Mulluku Amasiva Mattheene kiwaaka vamiraponi ddooddullu!”

63Mullupa mukutho muullupalli ahaahulla mukanjwaaye, allota wi, “Ninaapaallellatittho amboni amodda? 64#Lev 24.16Momwiiwa amullotellaka epewe Mulluku. Nyuwaano maganizwaanyu tti awiidde?”

Nave attheene yahiiwanana wi anaphwanella iiphiwe.

65Nave amodda yahaamba omuttaphera mare Yesu, emukhuneella owiitthoni waye emuukutha, ellota wi, “Llotella awuukuthalle ttaani?” Nave oowehera yaamukusa emuukuthattho.

Petro anamuruna Yesu

(Mat 26.69-75; Luk 22.56-62; Yoh 18.15-18,25-27)

66Petro aari muwari mwa nthato namillatu. Vano aawa namwalli mmodda, mullupa mutteko a mullupa mukutho muullupalli. 67Nave amoonilleeye Petro oothaka munllo, aamuweha, allota wi, “Wettho waari nimodda ni Yesu oovenyera o Nazareti.”

68Koma aaruna, aamwaakhulla wi, “Nginadduwella nave nginiiwesesa onalloteewe.” Nave aakhuma aya okhwipi. Enthawi yeeyo mutthupi wahinlla.#14.68: Ddoolemba ddimodda ddakhalle khaddinna mawu awi enthawi yeeyo mutthupi wahinlla.

69Mullupa a muttekoolle aamoonattho ari vaavo aamba ollota wa athu yiimenlle vakhuvirwaayo wi, “Olla tti mmodda a yaalla!” 70Koma Petro aarunattho.

Viviralle enthawi yooyeva awiimellanaayo yaallotattho ni Petro wi, “Ohirune, weyaano tti mmodda a yaalla vawi weyaanottho onavenyera o Galileya.”

71Vano Petro ahaamba wiitembelela yeekhaaye ni ollupella wi, “Nginamudduwella muthu yoolle.”

72Enthawi yeeyo mutthupi wahinlla wiilli nave Petro ahuupuwella Yesu allotilleeye wi, “Mutthupi ohininlle wiilli, onaakhalle okikhootille oraru.” Vano Petro ahaamba winlla.

Currently Selected:

Mariko 14: MW2019

Highlight

Copy