Mariko 15

Pilato anamukoha Yesu

(Mat 27.1-2,11-14; Luk 23.1-5; Yoh 18.28-38)

1Osaka wene ohinase allupa mukutho uullupalli, attekweene a Ayuda,* ahuddihi a malamulo* ni attekweene a millatu attheene yaakumana wi yiiwanane yaweera. Yaammaka Yesu ni onyolo, emukusa, emuvelleella wa Pilato, oolamulella a o Roma. 2Pilato aamukoha Yesu wi, “We tti Mwene a Ayuda?”

Yesu ahaakhulla wi, “Mullotillethi nyookha.”

3Allupa mukutho uullupalli yaamullotella Yesu wi oochimwa ddinchichi, 4Sika Pilato aamukohattho wi, “Khonapaalla waakhulla? Ngiiwa ddittheddene enuullotelliiwanndda!”

5Koma Yesu khaawakhullallettho ello nave Pilato aattikhina.

Mullatu onakamulliwa wi Yesu iiphiwe

(Mat 27.15-26; Luk 23.13-25; Yoh 18.39—19.16)

6Va erive Ehakallallo ya Paska, Pilato aaddollweella waattaphullella muthu oomakiwa mmodda oyo athu yamupaalliiwa. 7Nave enthawi yeeyo aakhallavo muthu nnddina naye Baraba oyo amakiwe ni athu amodda kaambiiwa yaamwiipha muthu enthawi yawukiliiwa niboma. 8Vano mulloko wa athu waawa waamba omukoha Pilato wi amuttaphulle oomakiwa mmodda wonanko mmo addollweellelleeye. 9Pilato ahaakoha wi, “Munapaalla kuuttaphullelleni Mwene a Ayuda?” 10Aadduwella wi allupa mukutho uullupallaayo yaamuvelleelle Yesu wa olliye ekaamba ya ehache.

11Koma allupa mukutho uullupallaayo yaahaattusha waawatihera athu attheenaayo wi emveke Pilato aattaphullelle Baraba. 12Nave Pilato ahaakohattho wi, “Vano munapaalla keerena tini oyo munamuromolleenyu Mwene a Ayuda?”

13Nave yaakhuwa wi, “Mumutthomeye vamutandani!”

14Nave Pilato ahaakoha wi, “Eerille tini yoonanara?”

Koma yaakhuwa moollipiha wi, “Mumutthomeye vamutandani yooyo!”

15Pilato voopaallani waahakallalliha athwaayo, ahaattaphullella Baraba. Sika amuvelleella Yesu wi awashulliwe ni otthomeyiwa vamutandani.

Akhoto enamullotella epewe Yesu

(Mat 27.27-31; Yoh 19.2-3)

16Vano akhoto yaamukusa Yesu eyaana o enyumba ya oolamulella eyo yaari nthato namillatu na Aroma, emutthukumanihella akhoto attheene. 17Vano yaamuwariha Yesu mukanjo wooreera woofiira, elluwa echipewa ya miiwa emuwariha m'muruni mwaye. 18Yahaamba omvaha mooni wi, “Mooselliwa, Mwene a Ayuda!” 19Yaanamuukutha ni ekopo vamuru vaye, emuttapheraka mare, yaanamukokhorella mweepewe. 20Vano yamallihalliiwa omullotella epewe, yaamurulla mukanjoolle emuwariha ddoowara ddayenndde. Nave yaamuhoolliha oyaana wi yamutthomeye olliye vamutandani.

Yesu anatthomeyiwa vamutandani

(Mat 27.32-44; Luk 23.26-43; Yoh 19.17-27)

21 # Aro 16.13 Akhotwaayo yamukusalliiwa Yesu yaakumana ni muthu oovira nnddina naye Simoni, avenyeraka o mizi ayaaka o etawoninko. (Simoni aari a o Kurene, attiitthiiwa a Alekizandro ni Rufu.) Akhotwaayo yaamuwatihera wi areye mutanda wa Yesu. 22Nave yaaphiyana Yesu vanipuroni nooromolliwa Gologota (Ottaphullella wi, Nipuro na Nikharakadda.) 23Yaamuvaha vinyo oottakanyihera ni wamwa wi amuwirye koma khaamuwiryalle. 24#Mas 22.18Vano yaamutthomeya vamutandani ni okawana ddoowara ddaye weekhiiwa yoombesille wi yoone ttaani anaakuse eevi. 25Enthawi yaari 9 koloko ohinase mvo yamutthomeyilliiwa vamutandani. 26Nave yoolembiwa yoomuvaanyihera yaari yawi, “Mwene a Ayuda.” 27#Yes 53.12Vano yaatthomeya vamutandani ezigawenga piilli vamodda ni Yesu, mmodda o nnattanatta ni mmoddooyo o nnatta noonyottho.#15.27: Ddoolemba ddimodda ddakhalle ddaanaanjereravo evesi 28: Sika ddaakwakhwanihiwa ddallotiwe mu mawu a Mulluku wi, “Yaamweesa wonanko mmodda a athu oohithwara malamulo” (onani Luk 22.37).

29 # Mas 22.7; 109.25; Mrk 14.58; Yoh 2.19 Athu oovira yaanatikha miru ddiwa enamullotella epewe. Yaanallota wi, “Ha! Weyaano oowora okumulla enyumba ya Mulluku oyimakattho mallapo mararu, 30wiivulluse weekha nave okitthevo vamutandanimvo!”

31Emoddamoddave yeeyottho allupa mukutho uullupalli ni ahuddihi a malamulo yaamullotella epewe. Yaallota muthu ni mukhwaaye wi, “Aanaavullusa amodda koma khanawora wiivullusa yeekha. 32Nimoone Mesiya,* Mwene a Israele, kitthavo vamutandanimvo wi noone nave nikhulupilile!”

Nave ayo yatthomeyiwena vamodda yaamullotellattho epewe emoddamoddave yeeyo.

Okhwa wa Yesu

(Mat 27.45-56; Luk 23.44-49; Yoh 19.28-30)

33Waambeella 12 koloko otthaana ophiyera 3 koloko waakhalla epiphi mu ellapo ettheene. 34#Mas 22.1Va enthawi ya 3 koloko Yesu aakhuwa moollipiha wi, “Eloi, Eloi, lama sabakitani?” (Ottaphullella wi, Mullukwaaka, Mullukwaaka, mukihiyere tini miyaano?)

35Athu amodda yiimenlle vaavo yaamwiiwa nave yaallota wi, “Ngiiwani, muthu yoolla anamwiithana namallotella Eliya.” 36#Mas 69.21Vano mmodda a yaayo aathamaka ni esiponje atthaveya mu vinyo oonyuunya, iiyaatthi otthoka wa ekopo amutukhullella owanoni waye wi awirye. Nave aallota wi, “Ngatiyerani, noone eeki namallotella Eliya awe wi amukitthihevo vamutandanimvo!”

37Yesu aakhuwattho moollipiha nave aakhwa.

38 # Eks 26.31-33 Nave ekatani yoohiyaniha mapuro meelli a mu enyumba ya Mulluku yahaahuwa okawaneya variyari ovenyera vaddullu ophiyera vatthi. 39Nave akhoto muullupalli a o Roma iimenlle vahoollo vamutandani ahoona mmo Yesu akhwelleeye,#15.39 akhwelleeye: Ddoolemba ddimodda ddakhalle ddookhalla ni mawu awi aakhuwelleeye nave akhwelleeye. allota wi, “Ddawoona, muthoolla aari Mwaana a Mulluku!”

40 # Luk 8.2,3 Voorekamella vang'ono vaakhalla atthiyana amodda yoonella. Mwa atthiyanaayo mwaakhalla Mariya Magadalena, Mariya amennya a Yakobo mung'onong'ono ni Yosefe; Salome aarittho vaavo. 41Yesu aariiye o Galileya atthiyana yaayo yaanamuthwara enamurumeyella. Nave atthiyana amodda anchichi yaawattho ni olliye o Yerusalemu.

Ovitthiwa wa Yesu mu mahame

(Mat 27.57-61; Luk 23.50-56; Yoh 19.38-42)

42Waari nndduwa nivollowille va Nllapo Nookhozekella (nna naari, nllapo na vatulli va nllapo na Sabata). 43Vano Yosefe o Arimateya mmodda oodduwanyeya, a attekweene a millatu a Ayuda,* aaya moollipa murima wa Pilato wi amuveke mutembo wa Yesu. Yosefe nayeenettho aanatiyerella owa wa omwene wa Mulluku. 44Pilato aattikhina vawiiwani wi Yesu aari akhwille khalle. Aamwiithana akhoto muullupalli amuveka wi oone aarimi akhwille. 45Akhoto muullupallooyo asimikizalleeye wi ookhwa, Pilato aamulleella Yosefe wi akusevo mutembooyo. 46Yosefe aakulla ekuwo, akitthiha mutembooyo, ahuruwella ni ekuweeyo, amuvittha mu mahame oosemiwa vanllukuni. Aaphikirisellawo nlluku nuullupalli omullakoni wa mahamaayo. 47Mariya Magadalena ni Mariya, amennya a Yosefe, yaawehesesa wi yoone mvo avitthiweeye.

Currently Selected:

Mariko 15: MW2019

Highlight

Copy