Proverb 22
22
1Enn bon repitasion meyer ki enn gran rises;
loner vo plis ki lor ek larzan.
2Ris ek pov ena enn kitsoz an-komin:
LESEGNER finn kree toule-de.
3Dimounn intelizan trouv problem vini e li pran prekosion;
bann ki pa reflesi fons drwat, e zot pey konsekans.
4Mars avek limilite e respekte LESEGNER;
lerla, to pou viv lontan e to pou gagn rises ek loner.
5Ena pikan ek piez lor sime move dimounn;
dimounn pridan res lwin ar sa sime-la.
6Montre enn zanfan bon manier viv depi li tipti;
li pou met sa an-pratik mem kan li finn vinn vie.
7Dimounn ris dominn lor dimounn pov;
bann anprinter vinn esklav bann kaser.
8Kan to sem linzistis, to rekolte maler;
e to koler pou anvol dan ler.
9Bann dimounn ki ena bon leker pou gagn benediksion,
parski zot partaz zot manze ar bann pov.
10Si to anvi aret enn dispit, met bann insolan deor;
lerla, pa pou ena ni lager ni insilt.
11Si to leker prop e si to koz avek bonte,
lerwa, limem pou vinn to kamarad.
12 LESEGNER veye ki laverite triyonfe
e li kas plan bann manter.
13Bann pares res lakaz,
zot dir: “Ena enn lion deor pou manz mwa.”
14Labous enn fam move lavi, li kouma enn lafos profon;
seki atir lakoler LESEGNER pou tom ladan.
15Li normal ki zanfan fer betiz.
Me disiplinn zot! Lerla, zot pou sanze.
16Si to rod vinn ris lor ledo bann pov, e si to donn kado bann ris,
enn zour, twa ki pou vinn pov.
Bann konsey enn saz
17Ouver to zorey e ekout parol dimounn saz;
met an-pratik mo bann lansegnman.
18To pou ere, si to gard zot dan to leker,
e lor to lalev.
19Mo anvi to met to konfians dan LESEGNER,
akoz sa, zordi, mo pe dir twa sa bann parol lasazes la.
20Pou twa mo finn ekrir trant konsey,
bann parol konesans ek sazes.
21Sa bann konsey-la pou fer twa kone ki bon e ki vre;
to pou konn donn bon repons kouma enn bon mesaze.
1
22Pa kokin enn pov zis parski li mizer;
e pa kraz kikenn ki pena mwayin pou pran enn avoka.
23An-efe, LESEGNER pou pled pou li
e pou konfiske to lavi, kouma to finn konfiske dibien enn malere.
2
24Pa rant kamarad ar dimounn ki sap lor kal brit-brit;
pa frekant dimounn ki sofe pou enn wi, pou enn non;
25parski to kapav vinn kouma li,
e may dan enn latrap.
3
26Pa fer erer donn parol
pou garanti det lezot.
27Tansion, si to pa kapav ranbourse,
bann-la pou vinn tir twa lor to lili e pou pran tou to dibien.
4
28Pa kokin propriete to vwazin;
pa deplas bann born ki to anset finn mete.
5
29Get bien sa artizan ki fer so travay bien la;
lerwa pou angaz li, e li pou nepli bizin travay pou etranze.
Currently Selected:
Proverb 22: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
