Proverb 21
21
1Lespri enn dirizan kouma enn larivier dan lame LESEGNER;
li diriz li kot li anvi.
2To kapav panse ki to ena rezon;
me LESEGNER konn bien to lintansion.
3LESEGNER prefer ladrwatir ek lazistis
ki enn lofrand.
4Move dimounn ena regar meprizan ek leker arogan;
samem ki met zot pese okler.
5Prepar to proze avek swin e to pou gagn sikse;
me si to rod al tro vit, to pou zwenn tase.
6Larises ki to gagne kan to koz manti,
li atir twa dan lamor e li disparet vit.
7Move dimounn kondane par zot prop violans.
Kifer zot refiz sanze?
8Bann malonet mars lor sime traver;
me dimounn zis swazir sime bien drwat.
9Prefer dormi deor, dan kwin lakaz;
ki dan lakaz, ar enn fam gran labous.
10Move dimounn pans zis fer lemal;
zot pena pitie pou personn.
11Kan vantar gagn pinision, mem inioran gagn enn leson;
me linstriksion grandi konesans enn saz.
12Bondie li zis! Li konn tou seki pase dan lakaz move dimounn;
li pou donn zot pinision ki zot merite.
13Si to refiz ekoute kan bann pov kriye,
tou zorey pou sourd, ler twa to pou rod sekour.
14Si to anvi kalme koler kikenn, donn li enn kado an-sekre;
si to anvi tengn so laraz, glis enn ti prezan dan so pos.
15Kan lazistis triyonfe, bon dimounn kontan;
me bann malfeter gagn per.
16Dimounn ki pa swiv bon sime konesans,
bien vit pou rant dan bis lamor.
17Dimounn ki kontan lamizman pou res pov;
dimounn ki kontan labwason zame pou vinn ris.
18Kan bann move dimounn rod piez bann bon dimounn,
zot invit katastrof lor zotmem.
19Preferab viv dan dezer,
ki viv ar enn partner move karakter.
20Dan lakaz enn saz ena bann gran rises;
me bann dimounn bet gaspiy pou zot sanses.
21Rod touzour labonte ek lazistis e to pou viv lontan;
dimounn pou respekte twa e pou onor twa.
22Enn zeneral saz, pou reisi pran enn lavil bien proteze;
li pou arive kraz miray sitadel.
23Vey bien to langaz,
e problem pa pou vinn dan to lakaz.
24Dimounn ki fier ek vantar, zot insolan;
zot azir ek boukou larogans.
25Dimounn pares mor avan zot realiz so dezir;
an-efe, so lame lour pou travay later.
26Bann pares pas letan anvi kitsoz lezot;
me bon dimounn donn zot kitsoz ek leker kontan.
27Lofrand enn malfeter bien degoutan;
sirtou kan li ofer li avek enn move lintansion.
28Bann fos temwin pou disparet;
me dimounn ki konn ekoute, li pou kapav temwagne avek sikse.
29Move dimounn fer sanblan zot serye;
me bon dimounn viv enn lavi exanpler.
30Mem si to ena bann verti kouma lasazes, bon rezonnman, ek disernman,
to pa pou kapav defie LESEGNER.
31Nou kapav prepar bann seval pou konba;
me zisLESEGNER ki donn laviktwar.
Currently Selected:
Proverb 21: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
