Proverb 23
23
6
1Si to invite pou manze kot enn dimounn inportan,
to bizin ena enn bon konportman.
2Si to lapeti feros,
konn kontrol twa.
3Pa les twa tante par so bann manze rar;
sa kapav rann twa malad.
7
4Aret touy lekor pou vinn ris;
les lasazes gid twa. Lerla, to pou kone kan bizin dir non.
5Apenn to get to larzan dan to lame, li rod sime ale;
li met lezel, li mont dan lezer kouma zwazo.
8
6Refiz al manze kot enn dimounn peng;
pa dezir so bann manze rar;
7parski li touletan fer kont.
Ar so labous li pou dir twa: “manz ankor, bwar ankor!”
Me dan so leker li pa sinser.
8Apre sa, to pou vomi seki to finn manze;
lerla, bann parol remersiman ki to finn dir li, pa pou servi nanye.
9
9Pa gaspiy to bann parol sazes ar enn dimounn san-konpran;
li pou mepriz valer to parol.
10
10Pa deplas bann vie born;
Pa kokin later bann orfelin san defans;
11 LESEGNER, zot defanser, li pwisan.
Li pou pled zot ka kont twa.
11
12Grav lansegnman ki to finn gagne dan to leker;
ouver to zorey pou ekout bann parol ki donn konesans.
12
13Pa ezite pou koriz enn zanfan;
enn ti-kout rotin pa pou touy li.
14Okontrer, sa pou ed li
e pou tir li dan sime lamor.
Konsey enn paran pou so zanfan
13
15Mo zanfan, si to vinn saz,
mo leker pou dan lazwa.
16Mo pou bien fier,
kan mo pou tann twa koz bann parol konesans.
14
17Pa bizin zalou bann move dimounn;
respekte LESEGNER sak zour to lavi.
18Lerla, to pou ena enn bon lavenir,
e to lespwar pa pou tom dan dilo.
15
19Mo piti, ekout mwa e to pou vinn saz;
diriz to pa lor sime ladrwatir.
20Pa frekant soular;
Pa frekant voras.
21Soular ek voras pou fini lor lapay.
Si to nek manze-bwar apre to dormi, biento to pou met kostim goni#23:21 Kostim goni: Linz move kalite. .
16
22Ekout to papa ki finn donn twa lavi;
pa abandonn to mama kan li dan laz.
23Touletan rod laverite, zame pa rezet li;
kiltiv lasazes, linstriksion ek disernman.
24Kan enn zanfan amenn enn bon lavi, so paran ranpli ar lazwa;
leker enn paran kontan kan so zanfan saz.
25Fer to paran kontan;
donn lazwa to mama ki finn met twa lor later.
17
26Mo zanfan, fer mwa konfians;
swiv mo lexanp dan lazwa.
27Enn prostitie, li kouma enn piez pou twa;
enn fam adilter, li kouma enn latrap.
28Li vey lokazion kouma enn voler.
Li finn fini kas boukou menaz.
18
29Kisann-la ki dan traka e pe regrete?
Kisann-la nek sipote e dispite?
Kisann-la nek gagn dimal pou nanye?
Kisann-la so lizie touletan rouz?
30Bann ki touletan dan tavern;
bann ki nek bwar melanz.
31Pa les twa tante ar larak;
pa les li atir twa ar so kouler ek so lekim;
dan labous li bon, li glise, li desann.
32Me alafin to pou konn so refrin,
ler li mord twa kouma serpan.
33Maloker pou fer twa trouv zekler;
to pou delire, to pou rabase.
34To latet pou vire;
to pou balans dekote kouma enn bato dan tanpet.
35To pou dir: “Zot ti bat mwa, me mo pa rapel;
mo finn gagn dimal, me mo pa santi.
Kan pou gramatin? Mo bizin enn topet pou kas malad latet.”
Currently Selected:
Proverb 23: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
