MATAYO 24

Yesu fee/ár Doó Mungú gaa geerií oó'

(Marko 13:1-2; Luka 21:5-6)

1Yesu iri ti'iít, iri quútl dír Doó Munguhe. Eeharuuseerós guri i daqeér as tlehhmuú Doó Mungú nguwa laqaan. 2Yesu eeharuuseerós gari báy, «Tí sleémeero a ga/eerá'a? Án a kah, tlaa/anoó gawaá kuqí meét oo ta fee/iiká i kaahh.»

Iimu/úngw slahh'amu

(Marko 13:3-13; Luka 21:7-19)

3Tam qoomár Yesu iwa iwiít gawaá tloomár xaaiikaari ta babay seituúni, eeharuuseerós guri i daqeér dír tawa kilooín, tari oó', «Kangwsíng aténí ooang, axáy i tleehharuuti a xaylá? Nee layár ta araan a gaalá ar hardahamuuwók nee ar alhhe'eesoó yaamu?»

4Yesu iri oó', «Ti harmagahhe', hee munduwa al/aáy. 5Asma múk yaariír ni hardah oo ti ateetiím ar umuueé', tawa kaahi, ‹Aníng a Kristo.› Inooín múk yaariír ku al/aay. 6Kuungá' kángw slaqwara' uqo axasá', nee tsimaahhír slaqwaraaro. Ala ma da'ayuutara', asma muruuwí gár kuwa hariím aqo in geerií hardah, ala alhhe'eesaydá' aa xayká. 7Asma xooro i slaqwarár eér amór xoororqá'. Nee waawuti'iima i slaqwarár eér amór waawuti'iimár hatlá'. Slám giyeé ni tleér, nee yaamaá yaariire kunseeli ni ti'ít. 8Muruuwí sleémeero an iimu/úngw slahh'amu.»

9«Qoomaadae muu kuungá' nu sakii/ as slahh'amu kuwa sleera', nee tunduwa tsu/i. Kuungá' xoordu sleémeero nuri aahhiyá' as aníng. 10As adoorí múk yaariír haratlintaao gari máy, tiri kilooín sakikii/iyá' nee tiri kilooín ahhiitiyá'. 11Aaruusér yaariir ar lamuuse ni hardát, inooín múk yaariír ku al/aay. 12As dee/aanu iwa tlaáhh sla'aarír múk yaariír iri fák. 13Ala heé ba/ám a kudá' aa qiitl ay alhhe'eesaay. 14Slám ya/abtór hho' ar waawuti'iimár Mungú ka alki/iit baraá yaamu sleémeerowo as iwa lamabu'uungw tleehhit dír xoordu sleémeerowo. Daqaní alhhe'eesaydá' in sangw hardah.»

Slahh'ámuú úr

(Marko 13:14-23; Luka 21:20-24)

15«Qoomár kudá' tlaákw oo Hhitusmo bura aandé' aa sihhiít didaádá' hhoohhoó' i alé, kudaádá' aarusmo Danieli aa oó' (heé soomuús gídaabárós ngi tsaahhi), 16qoomaadae múk baraá yaamaá Yudearií dirií' ta ta'aain gawaá tlom'i. 17Nee heé gawaá daanduú dó' i dirií' miwa aweér as muruú baraá do' nguwa leehhi. 18Laqaá heé baraá qaymór i dirií' miwa kií/ as tlabaawós ngiwa leehhi. 19Ala /ameenár tsiihaawe nee ar na/aá ninakw gi koom qoomaadae, a tsaxwaaín. 20Firiirimé' as guwayhúng mindiwa qoomár tluwoó úr i hardáh, laqaá deelór Sabaáto. 21Asma slahh'amuú deeloodá' ku úr adór taa baloó ariiká iimír iimu/úngw yaamuwo ay laarí, slám slahh'amuú adór kwí i baloó ki/iiká. 22Ala bar deeloodá' kaa /aareesiiká, geeraawo heé ba/ám i kaahh. Ala asma kudá' taa tsawaár deeloodá' ka /aarees.

23«Qoomaadae hee burna báy, ‹Kristo areengw i diirí,› laqaá bira oó', ‹I amorqá',› ma ya/aamara'. 24Asma kristo lama nee aaruusér lamuuseero ni ti'iitiyá' Inooín layu nee muruú waa/oo/amooro ngu tleehhiyá' as múk yaariír kuwa al/ayi, bir ya/aán tam mukdá' Mungú aa tsawaár sleeme. 25Ala ga/aawaagáy, aníng kuungá' naa geerií gurbuú'.

26«Gawaá adoorihe bartunda báy, ‹Hanoosaay i baraá darma,› ma daqawara'. Laqaá barta kaahi, ‹I dír do',› ma ya/aamara'. 27Asma adoodá' mankari ir da/aáw wa gwa/at, tam /uwaawo kay ar, adoorí an adór Garmoó Hee nir hardihi.

28«Asma dír tuua i diri' an didá' gwares i burumburiiti.»

Hardahamuú Garmoó Hee

(Marko 13:24-27; Luka 21:25-28)

29«Slahh'ámuú deeloodá' bira waaraáhh, qoomaadár kilae,

Tsee/amá iri giiw,

nee slahhaangw iri gwa/aatiiká,

tsatse/uú gawaá doori iri paahh,

nee /uuruudá' doori gi koóm kuri dingiis.

30Daqaní layár Garmoó Hee kari ar gawaá doori, nee xoordu sleémeero awa baraá yaamu tari tsuunqumiis. Garmoó Hee kuri ar, niwa awdiiti ar huunkoó gawaá doori, ar /uuru nee xirfuú yaariír. 31Qoomár tarumbeéta bar kaa ufaáhh ar afór ur, inós malaykeerós ngin ya/aaw, mukós oo taa tsawaár gun burumbút amór bihhér yaamu tsiyahhaawo, iimír alhhe'eesaywí oo doori ay alhhe'eesayqá'.»

Intsaahhatisár slaqsoó ti'ita

(Marko 13:28-31; Luka 21:29-33)

32«Slaqsoó ti'ita nu intsaahhatisi. Qoomár loo/oorós bira páhh, ar /aben nay harmá/, an tsahhá' adór tluwaay nira naká/. 33Tam kuungá' sleeme muruuwí bura aandé' naxés naa iimu/ún, tsaahhaagáy adór qoomár alhhe'eesaay nira naká/. 34Án a kah, muruuwí sleémeero i boo/ dír mukú de'emaaká' ir kumiiti. 35Doori nee yaamu i waaraahhiyá', ala axweesante'eé' i baloó waarahhká.»

Siiwarós nee baalaarós heé ga xuú' i kaahh

(Marko 13:32-37; Luka 17:26-30, 34-36)

36«Ala kángw siiwadá' nee baalaarós heé gu xuú' i kaahh, tam malaykér gawaá doori, tam Garma, aqo har Baabá kilós. 37Asma adoodá' qoomár Noawo aa tleehharuut, an adór bál hardahaamuú Garmoó Heewo tleehharuut sleeme. 38Asma qoomár tluwoó da/atén iwa tluwiiká, muu ina /ayín nee ina wahán, slám tana duuxuxún nee kina duxuút, tam ay baalaadá' Noa iwa baraá miringamoowí dáh. 39Gár taa tsaáhh i káhh daanduú tidá' aa tleehharuti ay qoomár ma'aay niwa wa/iyé', muu sleémeero nguri hayoohiyé'. Adoorí an adoodá' tleehharuut bál hardahamuú Garmoó Heewo. 40Qoomaadae múk tsár ta baraá qaymór i dirii', oo wák kuri ar tláy, kuqá' kuri geexáy. 41Nee /ameenár tsár ar dinkwár wa alxoosliim, ar wák kan ar tláy nee tiqá' kari geexáy.

42«Gawaá adoorihe dalaaé', asma baalár Aakoohúng iwa hardihi a xua'aaká. 43Slám /aymuuwí na xuaak barnaxes, heé do' loó' ga xuu' adór fisusmo ir do'ós gaasár áy, geera alók aa dalaá'. Geera do'ós gu mayká kuwa gaasi. 44Gawaá adoorihe kuungá' ti amohhe'ese', asma qoomaadá' kuungá' ta haraxua'aaká, an qoomár Garmoó Hee niwa hardihi.»

Sagadiyusmoó inkihhím nee oo inkihhimu wásl

(Luka 12:41-48)

45«Sagadiyusmoó inkihhím nee oo sagaloó', oo aakoowós i do'ósií saayin a gaalá? As múk doó aakoowós nguwa muruú /aymár i hanmiisi ar qoomár hariima. 46Heé amohhoó' a sagadiyusmoó adoodá' gaa tleehh aakoowós guri adoodí áy. 47Án a kah, aakoowós gun qaas daanduú muruuwós sleémeero. 48Ala sagadiyusmoó tlaákw a kudá' aa baraá muunaáwósí oo', ‹Aakooeé' naa tliík.› Iri tláy, 49sagadiyuusér doó aakoowós gari muxtár áy, iri /ayín nee iri wahán dinkwa nee ooniituuse. 50Sagadiyusmoodá' ku adoodí áy nee aakoowós baalaadá' nee siiwadá' i xuiiká. 51Sagadiyusmoodá' guri tla/a tsaat, guri haragaas dír hhaahhafuuse. Diirí an didá' tawa /aa/amin nee sihhina' kiwa qirirtlimiisi.»

Currently Selected:

MATAYO 24: IRQW

Highlight

Copy