MATAYO 23

Yesu intsaahhatuusér hara'ayár Mose nee múk Farisayo ngiwa gurbu'ún

(Marko 12:38-40; Luka 11:39-52; 20:45-47)

1Yesu iri axweés dír boo/oó muu nee dír eeharuuseerós, giri báy, 2«Intsaahhatuusér hara'ayár Mose nee múk Farisayowo taa iwiít gawaá kitángw Mose as hara'ayaarós kawa alki/iiti. 3Gawaá adoorihe umuúqo gaaro ar ni kuungií intsaahhatisiia, oohaak nee ka tlehhá'. Ala tlehhemi'iidá' inooín ta tlehhiiti, mi tleehhara'. Asma inooín tidá' ta kaahi ka tlehhiitiiká. 4Inooín huwaá ilo' ki tsegiit nee kiri tsa/amiis gawaá sum'aá muu. Ala inooínaá kilá' tam kwatiitár diitsaro ki slaiiká. 5Asma tlehhemi'ii'ín sleémeero kin tlehhiit as muu ngiwa ga/ay. Inooín slambaré/uuín kuduú firo ngun dogiitiyá' nee hirituú tsaafoó inqwaruuín ngun ureemisiyá'.

6Doó kiwa dahi'isi kiteeraá geera ngin tsawdaaditiyá', nee baraá maraá saaliingo sleeme. 7Inooín baraá boo/aywo gár ta slai a kin taaqweemiis nee kiwa babay, ‹Intsaahhatusámo›. 8Ala kuungá' mutunduwa intsaahhatuusér ar ateetín asma Intsaahhatusmoohúng a wak, nee kuungá' sleémeero a hhae. 9Kuungá' hee mu baabá ar ateetimaara' baraá yaamuwo, asma Baabuúhúng a wak, inós an kuduú gawaá doorí dirií'. 10Slám kuungá' mutunduwa geeraharuusérár ateetín, asma geeraharusmoohúng a wak, inós an Kristo. 11Nee heedaádá' úr dirhunge, masók inós a sagadiyusmoohúng. 12Umuúqo heewo oo ti kilós ureemiís ku niinawees, nee kudá' ti kilós niinaweemiís, ku urees.

13«Ala kuungaá intsaahhatuusér hara'ayár Mose nee múk Farisayo awa hhaahafuuse, a tsaxwaahúng. Asma kuungá' afkú doó waawuti'iimár Mungú una tsegé' as muu miwa dáh. Gím kuungá' kilá' a ak data'aaká, slám mukdá' daráh u ak geemeera'aaká iwa dahi. [ 14Kuungaá intsaahhatuusér hara'ayár Mose nee múk Farisayo awa hhaahhafuuse a tsaxwaahúng. Asma kuungá' muruú kwaeeli un /aa/agá', nee firór yaariir a firaariindá' ar hhaahhafiingw. Gawaá adoorihe sakwasleemarhúng ka ak ur.]

15«Ala kuungaá intsaahhatuusér hara'ayár Mose nee múk Farisayo, awa hhaahhafuuse, a tsaxwaahúng. Asma kuungá' an harweeririindá' baraá tlawtá wa ale, nee baraá yaamaá kaahare as heé wák kuwa eeharusmoohúng tlehha'. Aluuwo kuri heé tlaákw tlehhá' sagaáwa tsár ta kuungae, tari heé hariím kuwa kwahhi baraá asltá baloó gwaa'aaká.

16«Kuungá' geeraharuúse, kuungaásingá' taampu, a tsaxwaahúng, kuungaásingá' kaahá', ‹Bar hee lo'o gaa huúw ar Doó Mungú, gaarós i káhh. Ala bar hee lo'o gaa huúw ar sahaábuduú Doó Mungú, lo'oodá' gu eér.› 17Kuungá' a daktana nee a taampu. Asma gár ak ur a gaalá? A sahaábudáe, laqaá a Doó Mungú oo sahaábudá' gu hheehhe'eemiís? 18Slám kuungá' a kata', ‹Bar hee lo'o gaa huúw ar meésaadár baraá Doó Mungú, gaarós i káhh, ala bar hee lo'o gaa huúw ar ilahhooár daanduú meésaadá' i dirii', lo'oodá' gu eér.› 19Kuungá' a taampu. Asma gár ur a milá? A ilahhooadaádae, laqaá a kitangwduú ilahhooa, kudá' ilahhooadá' gaa hheehhe'ees? 20Gawaá adoorihe, heé lo'ór huwahuúw ar kitangwduú ilahhooa, aqo lo'o gana huúw ar kitángw ilahhooa, nee ar muruudá' sleémeero oo gawaadá' i dirii'a. 21Nee heé lo'ór huwahuúw ar Doó Mungú aqo lo'o gana huúw ar do'dá', nee ar kudá' baraadá' wá hoót sleeme. 22Nee heé lo'ór huwahuúw ar doori, aqo lo'o gana huúw ar kitángw aleesleemuú Mungú, nee ar kudá' aa gawaadí iwiit.

23«Ala kuungaá intsaahhatuusér hara'ayár Mose nee múk Farisayo, awa hhaahhafuuse, a tsaxwaahúng. Asma kuungá' ilahhooár manákw nee daantláy nee piripíri an hanmaamisá', ar wák baraá mibaango tawa ar Mungú, ala muruú urén oo hara'aya ugwa meeré', adór hotaá ganaa'á' nee gurtleemu nee haratlintaao. Gár kuungá' tunduwa hariím aqo muruuwí un tlehhá', ala muruuquú hatlá' sleeme mu mawaara'. 24Ala kuungá' a geeraharuusér taampu, a ineera an hingeemisá', ala angamía an gu/uundá'.

25«Ala kuungaá intsaahhatuusér hara'ayár Mose nee múk Farisayo, awa hhaahhafuuse, a tsaxwaahúng. Asma kuungá' daanduú isaangi nee oo qwaree/amo in hamtlitá', ala baraá guruuwose gár aa hats a /ayta nee har qoomay wasle. 26Kuúng heé Farisayo oo taampa, guruú isaangi ala hamaatleek, as daanduú isaangi sleeme iwa hhoohhoouy.

27«Kuungaá intsaahhatuusér hara'ayár Mose nee múk Farisayo, awa hhaahhafuuse, a tsaxwaahúng, kuungá' a slaqás nee /aantaá taa sliík ar chokaá'a. Bira tsee/aá wa aán, ki hhohho', ala baraadane gár aa hats a fadaá múk aa qaatl nee slasla/areema sleémeero. 28Kuungá' sleeme an adoodá', asma burtundu tsee/aá wa ga/áy nee muu, kuungá' a múk ganaá', ala gár baraahunge aa hats a hhaahhafiingw nee dee/aanu.

29«Kuungaá intsaahhatuusér hara'ayár Mose nee múk Farisayo, awa hhaahhafuuse tsaxwaahúng. Asma kuungá' /aantaá aaruuse in tlehhitá' nee /aantaá múk hota ganaá' kiri parootusé' as inslaslangw'ín. 30Slám a kata', ‹Atén geera qoomaadár baabi'iirene bar an dawaán, atén geera a kahhaán baraá tseerdaá aaruuse ku'umisuwo.› 31Gawaá adoorihe kuungá' ti kiloohúng lamabu'uundá' adór tar na/aá mukdá' aaruuse gaa tsuu/. 32Gimsé', qoomayduú baabi'iihúng naa iimu/uné' hatsiisaak. 33Kuungá' a dayshe, slám a na/aá daysheedá' uren. Kuungá' sakwasleemár baraá asltá baloó gwa'aaká adór kar ilagoba' a adoomá?» 34«Gawaá adoorihe xumiisé'. Án aaruuse ngi amorhúng i ya/aáw nee múk sageloene, nee intsaahhatuuseero. Inooín bahh'alé kuungá' i tsu/á', bahh'alé i kiki'iindá', bahh'alé i muxá' baraá maraá saalingwhunge, nee kiwa gusisiinda' baraá umuúqo gixsaro. 35Gawaá adoorihe tseerdu sleémeero awa múk hota ganaá', kudá' taa yaamií ku'uús, nu i ki/iyá', iimír tseerér Abeli wa tleemu kudá' hota ganaá', tam ay tseerér Sakariuú Barakia, kudá' taa gasé' tla/ángw kitángw ilahhooa nee Doó Mungú. 36Án a kah, kaangwí sleémeero ni hardah gawaá múk qartí.»

Sla'aarír Yesu daanduú gixsár Yerusalemu

(Luka 13:34-35)

37«Aá Yerusalému, Yerusalému, kiídá' aaruusér tsu/aa/iim, nee mukdá' tinda amoorók i ya/aáw un tlaqwaaqút ar tlaa/e. A sagaáwa magá' án mukók nguwa dinkwárí burumburtá wa slaá', adoodár koonki tsiioorós ngir baraá hhaampi'iiwósií burumburaariin, ala kuungá' aga ya/aandi'iiká. 38Ga/aawaak, marayhúng naa dewaaiyé'. 39Asma án a kah, aníng i baloó aanda'aaká daxta ay dír ti oa', ‹I xirfuuti kudá' hardáh ar umuú Aako.› »

Currently Selected:

MATAYO 23: IRQW

Highlight

Copy