MATAYO 22
22
Slaqsoó ni/imár duuxo
(Luka 14:15-24)
1Yesu iri malé axweés ar slaqsi'i, iri oó', 2«Waawuti'iimár doori slaqsaywós a adór waawutmooko wák oo muruú /aymár úr gwa qaas as garmaawós oo duuxuuxuúm. 3Lawaaleerós gana ya/aáw mukdá' taa doó duuxoórí dahi'ís, nguwa ateetiya'. Ala mukdá' iri sií' daqeemuuwo. 4Lawaalér hatlá' gari male ya/aáw, gana báy, mukdá' taa dahi'ís bawaagáy, ‹Ga/aawaak, muruú /aymar'eé' ugwa amohhe'eés, awe nee damaay kudaádá' wahhaará' iga hhe'eés tsu/utaaro, nee mura' sleémeero aa hhooáy. Qwalaasaré' amór doó duuxo.› 5Ala inooín kaa gaárií xuiiká. Tana tlatláy, kooko ina baraá qaymoorósí tláy, kooko ina baraá halaanu'uumarósí tláy. 6Nee mukdá' aa meet, lawaaleedá' gari ohín, gari muúx, gari tsuú/. 7Waawutmoodá' iri ló'wa buúhh, daqtá askaári gari ya/aáw, mukdaádá' aa tsu/uut kuri tsuú/, nee gixsar'ín kari daá/. 8Waawutmoodá' lawaaleerós gari báy, ‹Muruú /ayma aa hhooáy, ala mukdá' taa dahi'ís aa harinká. 9Ala tlawsé', tsa/amé' amór lohaá uren, muu sleémeero oo taa aandé' amór doó duuxórí ateetare'.› 10Lawaaleerós tidá' iri tleér baraá lohu, muu sleémeero kudá' taa qo ari kuri burumbuúr, múk tlákw nee múk hhoe. Doó duuxo iri haáts.
11«Waawutmo iri dáh baraá do', as dahaayeerós ngiwa taaqweesi. Heeko guri ár baraadae oo tlabaá duuxo gi koomaaká. 12Guri báy, ‹Mulqumooeé', adór tara baraá do'wí dát? Baré tlabaá duuxo i koondaaká.› Inós iri xasliít. 13Waawutmo lawaaleerós gari báy, ‹Heewí daba' nee ya'aawo tseegaak, tsee/aá i kwahhtá awaak baraá giwti, dír tawa /aa/amin nee sihhina' kiwa qirirtlimisi.›
14«Asma múk taa ateét ku úr, ala kudá' taa tsawaár ku niiná.»
Yaahasa daanduú bu'utuú koódi
(Marko 12:13-17; Luka 20:20-26)
15Aluuwo múk Farisayo iri tláy, tari al'axweés adór Yesu kur oohi ar /aymi'iiwós. 16Eeharuuser'ín dinkwa nee múk Herodewo, kiri ya/aáw amór Yesu tari oó', «Intsaahhatusámo, atén a xuaán adór kuúng tar heé ló', nee loohír Mungú adoodá' ir gana' tinar intsaahhatimís, tam kángw uroó hee u yaahamiská, asma hhohhoartá muu a ga/eeraaká. 17Tí atén i ooang, xáy, ka ga/eer, a hariímáro waawutmoó múk Roma kuwa koódír i haniisaan, laqaá aasla'áy?»
18Ala Yesu tlakweemaaín kudá' giri tsaáhh, giri báy, «Ahaá, án mis iiara'adá', kuungá' hhaahhafuúse. 19Xáda, peesmoó koódi laqaamare'.»
Peesmo kunguri huúw. 20Giri báy, «Slaqsaywí gawaakí dirií' nee gooirihe awa heemá?»
21Tari oó', «Slaqsaywí nee gooirihe awa waawutmoó Roma.»
Yesu giri báy, «Ar waawutmoó múk Roma wa hariim, amoorós ti hanise', nee ar Mungú wa hariim, amór Mungú ti hanise'.»
22Adoorí kawa axaás tari waa/oó/, kuri geexáy tari tláy.
Yaahasa daanduú waasle/
(Marko 12:18-27; Luka 20:27-40)
23Baalaadae múk Sadukayo, mukdá' káh waasle/ i kaahh, Yesu kuri i daqáy, kuri yaahaás, 24kuri báy, «Intsaahhatusámo, Mose tina báy, ‹Hee bira gwaá', harér aa geexáy bir na/aá koondaaká, hhiyaawós ngi aali, as doó hhiyaawós nguwa tleesi.› 25Hhaeekaari faanqw i dayá'. Oo geera ina duuxún, iri gwaá', na/oó aa geexáy i kaahh. Hareerós gari geexáy dír hhiyaawós as ngiwa aali. 26Oo tsár sleeme gari aál, nee oo tame, ay sleémeero faanqwamaawo kari aliít. 27Alhhe'eesaywo hareedá' sleeme iri gwá'. 28Bál deelór waasle/ bira xeér, /ameenidá' a harér heemá baraá mukdá' faanqwe? Asma inooínaadá' sleémeero kana aliít.»
29Yesu giri báy, «Aga qwadé' adoosinge, asma tidá' taa gooín a xua'aaká, tam aleesleemuú Mungú sleeme u xua'aaká. 30Asma alaá waasle/uuwo muu i duuxuxunká, nee /ameena ka duxuutiiká. Asma inooín a adór malayke gawaá dooriwo. 31Slám daanduú múk aa qaatl iwa waaslee/i, kuungá' /aymuudá' Mungú aa oó' ugwa soomusi'iikáhe, 32‹Aníng a Munguú Abrahamu nee Munguú Isaka nee Mungú Yakobo.› Mungú a Mungú tu'uuwooká, ala a Mungú múk slaáf.»
33Boo/aay adoodá' ngiwa axaás, intsaahhatimisuuwós kuri ló'wa waa/oó/.
Hara'ayár ak ur
(Marko 12:28-34; Luka 10:25-28)
34Múk Farisayo ngiwa axaás adór Yesu múk Sadukayo ngura xasltís, tari dinkwár wa axweés. 35Oo wák baraá tla/angw'ine a intsaahhatusmoó hara'ayár Mose, inós Yesu guri yaahaás ar iiara, guri báy, 36«Intsaahhatusámo, baraá hara'ayaro, hara'ayár ak ur a gaalá?»
37Yesu iri oó', «Aakoó Munguúwók na slaeek ar muunaáwók sleémeero, nee ar qeeruuwók sleémeero, nee ar fuquraangók sleémeero. 38Tí an hara'ayaadá' ur, slám i slahhá'. 39Nee hara'ayár hatlá' ar nee tisíng slaqás a tí, ‹Inslaawmoowók slaeek adoodá' kuúng tir kilók sla'.› 40Hara'ayár Mose sleémeero nee gooír aaruuseero iimu/uungw'ín a hara'ayaarí tsár.»
Yaahasa daanduú Kristo
(Marko 12:35-37; Luka 20:41-44)
41Múk Farisayo iri burumburiít, Yesu giri yaahaás giri báy, 42«Kuungá' ka ga/eera', Kristo a garmoó heemá?»
Kuri báy, «A Garmoó Daudi.»
43Giri yaahaás, «Ala Daudi musungwa Aakoowós ar ateetín, ar baraá aleesleemuú Qeeru, iwa kaahi,
44‹Aakoó Mungú Aakooeé' guna báy:
Iwiít bihhaaeé' awa doó /iyáy,
ay dír wakuuseerók
ngi baraá dabaawók i qaas.›
45«Bar Daudi gun Aakoowós ar ateetín, ala daxta adór tar garmaawós?»
46Ala heé /aymu tlaxwto gwa aleeslay i kaahh. Nee iimír baalaadae heé yaahasaro gwa qiitl i kaahh.
Currently Selected:
MATAYO 22: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
