MATAYO 21

Yesu iwa bar/úr dáh Yerusalemu

(Marko 11:1-11; Luka 19:28-40; Yoh 12:12-19)

1Tari Yerusalemií tseewúy, tari hardáh Betfage, dír tloomár xaaiikaari ta babay seituúni. Yesu eeharuusér tsár gari ya/aáw, 2gari báy, «Tlawsé' ay amór gixsarqá' geeraahúng i dirii'. Bara hardaté' daqwaay uqo aandá', kwaa tseék, dinkwa nee gwarendmoó daqwaaywo. Gweerare', ngi amor'eénií hubá'. 3Bar hee naa yaahaás, ku beera', ‹Aako gan slaa'.› Daqaní inós ngi ki/is ar gaanslaay.»

4Tí sleémeero ina tleehharút as tidá' aarusmo aa oó' iwa bo/,

5«Múk gixsár Siyoni bawaak.

Ga/aawaak, waawutmoohúng ni amorhúngií hardáh.

Inós ku tsá'. Aa tsa/án gawaá daqwaay,

nee gawaá gwarendmoó daqwaay.»

6Eeharuusér aáng iri tleér, adoodá' Yesu ngira oó' kari tleéhh. 7Daqwaydá' nee gwarendmooduú daqwaaywo kiri huúw, inqwaruuín kuri hhaáf gawaá daandeemaá daqwaayeedá', Yesu iri gawaadí iwiít. 8Múk yaariír baraá boo/aydae inqwaruuín guri hhafín baraá loohi, bahh'alé haleemaá xaai ngiri tlaaqiyé', ngiri hhafiné' baraá loohi. 9Nee boo/aydá' geeraá wa hi'iít, nee oo aluuwo ta tseeamín ta kaahi,

«Hosana, Garmoó Daudi,

i xirfuuti kudá' hardáh ar umuú Aako,

i xirfuuti Munguú gawaá doori.»

10Qoomár iwa dáh baraá Yerusalemu, muu sleémeero oo baraá gixsadá' i dirií' iri amoqwaqwadín, tari káh, «Heewí a heemá?»

11Boo/aydá' Yesu gwa eehar iri oó', «Heewí a aarusmo Yesu, oo baraá Nasaretír Galilayár daáhh.»

Yesu múk baraá Doó Mungú wa weerimiís nguwa guús

(Marko 11:15-19; Luka 19:45-48; Yoh 2:13-22)

12Yesu iri dáh baraá Doó Mungú, muu sleémeero, kudá' muruú weerimiís nee kudá' muruú tlaxuuma guri baraá Doó Mungú wa gusiisín. Meesadaá múk peésár gaamiís giri /aankwartsín, nee kiteeraá múk hhookár weerimiisa. 13Iri oó', «Kaa gooín, ‹Dooeé' ku bay a doó saaliingw.› Ala hám daxta kuungá' ugwa mar'ír fisuuse tlehhé'.»

14Qoomár Yesu iwa baraá Doó Mungú i dirii'i, taampu nee taqooraywo nguna i daqayé', inós giri hungu/uumiís. 15Ala kaahamuusér uren ar Mungú nee intsaahhatuusér hara'ayár Mosewo tari buúhh, asma muruuduú waa/oo/amo Yesu aa tlehhiít, nee asma na/ii niwa baraá Doó Mungú wa tseeaminé' ar afór ur, iwa kaahiya', «Hosana, Garmoó Daudi i xirfuuti.» 16Yesu kuri báy, «Aga axási adór i kaahiya'?»

Yesu iri oó', «Eeít, aga axaás. Kuungá' aga soomusi'iikáhe gídaabá, ‹Kuúng xirfuuwók ugwa amohhe'és kuwa boo/eesi ar afér na/aá ninakw nee awa du'uumá'.› »

17Yesu giri didí geexáy, iri tsee/aá gixsár ti'iít, iri tláy ay Betania, iri amoodií deél.

Yesu /aantsí ngiwa lu'ús

(Marko 11:12-14, 20-24)

18Matlaatleero looa niwa tleér, Yesu iwa baraá gixsár kay, ina qwariít. 19/Aantsírka wák ar afaá loohírí dirii' gari artá áy. Ala naxés i mamaá koondaaká, aqo har loo/o kilós. /Aantsídá' gari báy, «Iimír laarí mamu mikiwa baloó sláy gawaawoge.» /Aantsídá' iri kát siiwadár kilae.

20Eeharuuse adoodá' ngiwa aán, iri waa/ó/, iri ó', «Adoorí a milá, /aantsírí misa gaanslár kát?»

21Yesu giri báy, «Án a kah, kuungá' bar haratlintaao a koondá', nee a xuruumita'aaká, ar ta tlehha' a tír /aantsí kiloseeká. Tam tloomarí sleeme bara beeré', ‹Quútl, tláw ti kwahhtá eer baraá tlawi,› adoorí i tleehharút. 22Slám umuúqo gár ta firiinda'a baraá firorhunge, bar aga haratlintié', a sleerá'.»

Múk aleesleemuú Yesu gu yaahamiís

(Marko 11:27-33; Luka 20:1-8)

23Yesu iri dáh baraá Doó Mungú. Kaahamuusér uren ar Mungú nee bariisér múk Yahudi Yesu kuri i daqáy qoomár iwa intsaahhatimisi, kuri báy, «Muruuwí aleesleemuú kur tlehhit a gaalá? Nee heé aleesleemuuwí ngwa kuúng i haniis a heemá?»

24Yesu giri báy, «Aníng sleeme gár wák ngi dirhúng i yaahaás, kuungá' ngi oá'. Daqaní aníng sleeme aleesleemuú muruuwí ngur tlehhiit ngu dirhúngií oó'. 25Baatiísmoó Yohane amór naa daáhh a amá? A amór Mungúhe laqaá a amór muu?»

Tari kilooín axweés ta kaahi, «Bara ooaán, ‹Amór naa daáhh a amór Mungú,› ti bay, ‹Ahaá ala, Yohane musa haratlinti'i'iiká?› 26Ala bara ooaán, ‹Amór muu,› boo/aay u da'ayumitaán. Asma muu sleémeero Yohane gwaa tsaáhh adór tar aarusmo.» 27Yesu kuri báy, «A xuanaaká.»

Yesu inooín giri báy, «Aníng sleeme aleesleemuú muruuwí ngur tlehhiit ngu dirhúng i ooaaká.»

Slaqsoó daaqoó tsár

28«Kuungá' ma katá' daanduú kaangwihe? Heeko wák daaqoó tsár gu kón. Garmoó úr guri i daqáy, guri báy, ‹Garmaaeé', tláw laarí gadiyeé aweek baraá qaymór sabiíbu.› 29Garmaadá' iri oó', ‹Ka hhoo', baabá.› Ala aa daqayká. 30Aakoodá' iri tlay amór garmoó niiná, guri adoodá' báy sleeme. Ala garmoó niiná iri oó', ‹Án a daqawká.› Aluuwo iri hhu'u'ún, iri daqáy. 31Xáy, baraá daaqaywí tsare heé sla'aarír baabuúín gaa tleehh a gaalá?»

Tari oó', «A kudá' niiná.» Yesu giri báy, «Án a kah, ohomuusér koódi nee tsaatuuseero ta geeraahúng i waaraahh tari dah baraá waawuti'iimár Mungú. 32Asma Yohane nina dirhúng i hardáh ar loohír gan'amu, kuungá' kuri haratlinti'i'iiká. Ohomuusér koódi nee tsaatuuseero kuri haratlintií'. Kuungá' adoodá' kawa aandé' tam sleeme aga hhu'u'uundi'iiká as kuwa haratlintia'.»

Slaqsoó qaymór sabiíbu ar taa saayín

(Marko 12:1-12; Luka 20:9-19)

33«Slaqsoó hatlá' iiárií qaasaak. Heeko i deer oo do'ós koóm. Inós sabiíbu guna dahaás baraá qaymoorós. Qaymo gari yaáw. Bohóngw mamaá sabiíbu ngiwa tsoo/iti guri foól baraá tla/ángw qaymo. /Aampár xuuma gari tleéhh. Qaymo gari saayín dír doosluuse, iri aa'aá káy. 34Qoomár bu'uungw iwa naká/, sagadiyuuseerós gari ya/aáw amór doosluuseedá', as bu'uungós kuwa leehhi. 35Ala doosluuseedá' sagadiyuuseedá' gari ohiín, oo wák kuri muúx, oo hatlá' kuri gaás, nee kuqá' kuri tlaquút ar tlaa/e. 36Sagadiyuusér hatlá' ar yaariir, tidár geera ba/a gari malé ya/aáw. Kari malé adoodá' laáq. 37Alhhe'eesaywo garmaawós guri amor'ín i ya/aáw, iwa kaahi, ‹Garmaaeé' ku ilaiwaa/.› 38Ala qoomár doosluuseedá' garmaadá' nguwa aán, tari kilooín axweés ta kaahi, ‹Kwí a aalitmoowós. Qwalaas un gaasaán, as daqaní aali tawa toorén.› 39Kuri óh, kuri tsee/áy kwaáhh baraá qaymór sabiíbuwo, kuri gaás.

40«Xáy, aakoó qaymo loó' birna hardáh, adór doosluuseedá' ngi laqi a adoomá?»

41Tari oó', «Mukdá' tlákw gu ló'wa hhaamiis. Nee qaymór sabiíbu gari doosluusér hatlá' i saayín, tidá' bu'uungós gu haniis ar qoomár hariim.»

42Yesu giri báy, «Aga soomusi'iikáhe baraá Gooiro,

‹Tlaa/adá' qwatsiiruuse aa sí',

aa tlaa/ár ur tleehhít ar do' ira gawdúy.

/Aymuuwí amór i dahhi a amór Aako.

Slám a waa/oo/amo dír ilaarene.›

43«Gawaá adoorihe án kuungá' nu baw, ‹Waawuti'iimár Mungú ka hingees dirhunge, nee kari haniis dír xoorór tlehhema'aá waawuti'iimadá' wa hariim gi tlehhiit.› [ 44Umuúqo heewo oo gawaá tlaa/arí huú', aqo in qeqtaatín, nee slám umuúqo heewo oo tlaa/arí i i hu', aqo gun naasuúr.]»

45Kaahamuusér uren ar Mungú nee múk Farisayo slaqsi'iiwós kudá' kiwa axaás, kari tsaáhh adór múk i kaahi tar inooín. 46Gawaá adoorihe Yesu kuna loohi leelehhiít ar kur oohi, ala boo/oó muu kuri da'ayuút, asma Yesu muu gwaa tsaáhh adór tar aarusmo.

Currently Selected:

MATAYO 21: IRQW

Highlight

Copy