MATAYO 20
20
Doosluusér qaymór sabiíbu
1«Waawuti'iimár doori a slaqás nee heé qaymór sabiíbu ga koóm. Inós ina tseewa ti'iít as doosluuse ngiwa leelehhtuú ay, ngiwa huwi baraá qaymoorós ar sabiíbu. 2Tana al'axweés nee inós, umuú heewo nguwa bui ar shilingmoó wák tlaatla/aangw sleémeerowo. Giri huúw ay baraá qaymoorós ar sabiíbu. 3Qoomár looár tame iri malé tláy, múk hatlá' guna ár i sihhimiit baraá boo/áy wa ale, i gadiyér kon'aaká. 4Inós giri báy, ‹Tlawsé' kuungá' sleeme, gadiyeé awaagáy baraá qaymor'eé' ar sabiíbu. Bu'utuuhúng oo hariím án ngu haniís.› 5Tari daqáy. Qoomár looár lahhooe nee looár gwaleele aqo adoodár kilá' gana malé tleéhh. 6Qoomár looár mibaá nee wake iri malé tláy, awa hatlá' gina malé ár baraá boo/aay, ta sihhimiit tawó alé. Giri báy, ‹Baré tlaatla/aangw sleémeero a tawó diirí sihhimitá', slám a gadiyér koonda'aaká.› 7Inooín nguri bayé', ‹Asma heé atén taa gadiyeé i haniis i kaahh.› Giri báy, ‹Kuungá' sleeme tlawsé' ay baraá qaymór sabiíbu.›
8«Qoomár looa iwa dát, aakooduú qaymo loó' sageesihhitusmoowós guri báy, ‹Doosluuse ateeteegáy, bu'utuuín haniiseek. Bu'utu ku iimu/uún dír kudá' naa aluú wa hardah, nee daqaní ku alhhe'és dír kudá' naa geerií hardah.› 9Mukdaáduú gadiyeé gaa iimu/un qoomár looár mibaá nee wak, umuúqo heewo aqo shilingmoó wák guna sláy. 10Kudá' aáng gadiyeé ngaa geerií iimu/un, inooín tindiwa hardáh, inooín geera ngiwa xuiya', bu'utuú úr kun kár sláy. Ala umuúqo heewo gár aa sláy aqo shilingmoó wák. 11Qoomár ooharo kuwa hhe'eés, tari qununuú/ dír heedaáduú qaymo loó' i alé. 12Tari oó', ‹Mukwí naa aluú wa hardah, gadiyeé kana tleéhh ar qoomár looár wák kilós, ahaá kuúng bu'utuuín musa alqoomés nee koorén, ateédá' tsee/amá ugwa saqiqtlaatlimaan tlaatla/aangw sleémeero?›
13«Inós heé wák dir'ine guri báy, ‹Mulqámo, án kuúng ugwa /aytimiiká. Aníng nee kuúng gár taa al'axweesaán a shilingmoówoóke? 14Ooheegáy tidá' kuúng wa hariím, waátl. Aníng aga slaá' bu'utuú kudá' naa aluú wa hardah nguwa alqoomees nee kók. 15I hariindakáhe aníng muruueé' nguwa ar gadiyuus ar adór án ngur slaa'. Laqaá daxta kuúng gura' un ohína asma aníng tiwa hhoó'?› »
16Yesu iri ilawaáts giri báy, «Gawaá adoorihe, kudá' alaá hará' ta geerií waaraahh, nee kudá' geeraá hará' ta alhhe'eesáy kii/.»
Yesu gwa'araarós ngiwa malé sagaáwa tám wa oó'
(Marko 10:32-34; Luka 18:31-34)
17Qoomár Yesu iwa tsa/aa/an iwa Yerusalémúr kay, eeharuuseedá' mibaá nee tsár kilooín gari huúw dinkwa nee inós. Tawa loohír i dirii'i, gari báy, 18«Ga/aawaagáy, hamí a tsa/aa/amaán tawa Yerusalémúr kawaan, nee Garmoó Hee ku qaas baraá dabaá kaahamuusér uren ar Mungú nee intsaahhatuusér hara'ayár Mose. Inooín kuri sakwasleemuut ar kuwa gaasi. 19Aluuwo kuri qaas baraá dabaá múk xoordaá hatlá' as kuwa niqin, nee kuwa muxi nee kuri kikii'' gawaá msalaába, nee bál tám kuri waaslee/atis.»
Firór aayór Yakobo nee Yohane
(Marko 10:35-45)
20Aamaá Sebedayo nee daaqaywós Yesu kuri i daqáy, guri i tumbarara'át, guri firiín gaaro.
21Yesu gari báy, «Gár ta sla' a milá?»
Aayoodá' iri ó', «Na/iieé' kuká' tsár ya/aameek niwa iwiitiya' oo wák dakók oo doó /iyáy, kuqá' dakók oo doó basáy baraá waawuti'iimaroge.»
22Yesu iri oó', «Gár ta fiririinda' a xua'aaká. Xooslmoodá' án ni wah,#20:22 Xooslmoodá' án ni wah: Gídaabárós a slahh'amu. kuungá' u qitlá'a wahto?»
Kuri báy, «Adoosíng a aleeslawaán.»
23Yesu giri báy, «Xooslmoodá' án ni wah, uqo watá', ala kángw kuungá' tawa iwita' heeqá' dakw'eé' oo doó /iyáy, kuqá' dakw'eé' oo doó basáy, kangwsíng a kwe'eeneeká. Ala kiteeridá' ki haniis dír mukdá' kisa amohhe'eés nee Baabuúeé'.»
24Nee eeharuuseedá' mibaangw adoodá' ngiwa axás, hhaeedá' tsár giri i búhh. 25Ala Yesu eeharuuseedá' gari ateét gari báy, «A xuá' adór waawitú xoordu ir waawuti'ii'ín ar /uuru, nee adór muk'ín oo aleesleemuú koóm tar baaliilín. 26Ala dirhunge a adoosingeeká. Ala umuúqo heewo oo uroó slaá' dirhunge, masók a sagadiyusmoohúng. 27Nee umuúqo heewo dirhunge oo geerií waarahhamaá slaá', masók a lawaalmoohúng. 28Asma tam Garmoó Hee sleeme naa hardihiiká as kuwa sagadiyuusi, ala nina hardáh as muu nguwa sagadiyuusi nee slafiingós nguwa duuxi as tawa bu'utuú múk yaariír ngur tu/i.»
Yesu taampaá tsár ngiwa ila' qaytsitís
(Marko 10:46-52; Luka 18:35-43)
29Qoomár tawa Yerikór wa tláy, Yesu kuri eehár nee boo/oó úr. 30Naxés mukko tsár oo taampu aa iwiít afaá loohi. Inooín ngiwa axaasiyé' Yesu in waaraahh, tari tseé' ar afór ur, tari oó', «Aáko, Garmoó Daudi, atén ti gurtleer.»
31Mukduú taampu kuri iigahhaát nee boo/aay as iwa xasliitiya', ala inooín tseeamooro tari ak buúhh tari oó', «Aáko, Garmoó Daudi, atén ti gurtleer.»
32Yesu iri sihhiít, mukduú taampu guri ateét, giri báy, «Adór ta sla'a' ar nu laaq a adoomá?»
33Kuri báy, «Aáko, gár ta sla'aan, masók ilaarén in qaytsitiyá'.»
34Yesu guruuwós iri tláy, ilaaín giri kwatiít. Siiwadár kilae ilaaín niri qaytsitiyé', Yesu kuri eehár.
Currently Selected:
MATAYO 20: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
