MATAYO 25

Slaqsoó dasuú mibaangw

1«Qoomaadae waawuti'iimár doori a slaqas nee dasuú mibaangw oo taa'aduuín gaa oh, tari tláy as heé duuxuuxuúm kuwa al'ay. 2Baraá tla/angw'ine dasuú kooán a daktana, nee oo kooán a fuquruuse. 3Kuduú daktana taa'aduuín ngiri taataahhiyé', ala di/i ngaa huwi'iiká. 4Ala kudaá fuquruuse di/i ngi koná' baraá xooslar'ine dinkwa nee taa'aduuín. 5Heedá' duuxuuxuúm niwa adaá/, sleémeero tari gufmiís, tari guú'.

6«Qoomár dakiingo naxés gaa tsimaahhi, ‹Xayshé', heedá' duuxuuxuúm hanoos, tlawsé' ti'iité', al'awaak.› 7Dasú aáng iri tláy sleémeero ar gaanslaay, taa'aduuín kiri amohhe'eés. 8Kuduú daktana kudaá fuquruuse nguri bayé', ‹Di/tá niinawe ti qeere', asma taa'aduurén i gwagwa'aná' as di/i iwa fák.› 9Ala kudaá fuquruuse tari oó', ‹Aasla'áy, di/tí atén nee kuungane ti bu'uká. A tsiní bara tlaxwtá eeré' dír mukdá' di/tá weerimiís.› 10Inooín tawa tláy, tawa di/tá tlaxór áy, heedá' duuxuuxuúm nay hardáh. Nee kudá' taa amohhe'eesiye' nee inós tari al dáh baraá doó duuxór i alé. Piindo kari qaás.

11«Aluuwo dasuduú hatlá' nay hardáh tari oó', ‹Aáko, Aáko, do' duuxeek.› 12Giri i ilawaáts giri báy, ‹A ló', án a kah, án kuungá' nu xuaaká.› »

13Naagáy Yesu iri oó', «Dalaaé', asma baala a xua'aaká laqaá siiwa.»

Slaqsoó sagadiyuusér tám

(Luka 19:11-27)

14«Qoomaadá' a slaqás nee heé aa'aá káw, oo lawaaleerós gaa ateet, daqaari'iimarós gari dabaá lawaaleedí saayín. 15Gari qasmiís ar harqoomoó umuúqo heewo i aleesláy. Oo wák guri talaántár#25:15 Talaánta: Gídabaárós a peesmooko taa tleéhh ar miislír ló'wa tlaxo ur. kooán i haniís, oo tsár guri talaántár tsár i haniís, nee oo tám guri talaántár wák i haniís, iri aa'aá káy. 16Kudá' taa talaántár kooán i haniís, iri tláy siiwadár kilae, gari ar halaanuús, talaántár hatlá' kooán gari sláy. 17Tam kudaáduú talaántár tsár gaa slay, inós sleeme gari ar halaanuús, talaántár hatlá' tsár gari sláy. 18Ala kudaáduú talaántár wák gaa slay, iri tláy, bohoongw guri foól, peésár aakoowós gari baraadí tiíp.

19«Deelór yaariir iwa waaráhh, aakoó lawaaleedá' niri waátl, faaro kari altleéhh nee lawaaleedá'. 20Kuduú talaántár kooán gaa slay niri hardáh, talaántár kooán ar hatlá' ngiri huúw, iri oó', ‹Aáko, kuúng talaántár kooán ngina hanís. Qaytsiít, talaántár hatlá' kooán ngaa sláw baraá halaanu'uumaro.› 21Aakoowós iri oó', ‹I qoón, kuúng a lawaalmoó hhoó' nee oo inkihhím. Kuúng tu inkihhím baraá tidá' niina tuy saayini. Án kuúng u muruú yaariír i saayiím daxta. Qwál daháng baraá qwal/uueé'.›

22«Kudaáduú talaántár tsár gaa slay niri hardáh, iri oó', ‹Aáko, kuúng talaántár tsár ngina dir'eéní hanís. Qaytsiít, talaántár hatlá' tsár ngaa sláw baraá halaanu'uumaro.› 23Aakoowós iri oó', ‹I qoón, kuúng a lawaalmoó hhoó' nee oo inkihhím. Kuúng tu inkihhím baraá tidá' niina tuy saayini. Án kuúng u muruú yaariír i saayiím daxta. Qwál daháng baraá qwal/uueé'.›

24«Aluuwo kuduú talaántár wák gaa slay niri hardáh sleeme, iri oó', ‹Aáko, án kuúng u xuú' adór tar /akusmo. A bu'uún didaádá' gár taa dahás iwa kahh, nee an burumburiín didaádá' gár taa intlát iwa kahh. 25Aníng ana da'ayuút, talaántarók ngiri yaamií foól. Xuuxueek, talaántarók tidá' ooheek.›

26«Aakoowós iri oó', ‹Kuúng a lawaalmoó tlaákw nee oo tli/usmo. Kuúng bar xú' adór aníng nir bu'uúm didaádá' gaa ngiwa dahaasiiká, nee a burumburiím didaádá' gaa ngay intlahiiká, 27kuúng gár uwa hariím geeraawo a peésar'eé' an ar halaanús, as án binda kií/, peésar'eé' ngiwa slaw, dinkwa nee slaasláwarose.› 28Iri oó', ‹Talaántasíng i kon hayoohaak, hanisaak dír heeqá' talaántár mibaangw ga koóm. 29Asma umuúqo heewo oo gár koóm, ka haniis, nee kari dooga hhe'ees. Ala kudá' gár koomaaká, tam tidá' niina i kon ka hayoh. 30Nee lawaalmooduú ado wásl amór saaw ti kwahhe', baraá giwtír tsee/a. Didaádá' an dír tawa /aa/amin nee sihhina' kiwa qirirtlimiisi.› »

Sakwasleemár xoordu

31«Qoomár Garmoó Hee birna hardáh ar baraá xirfuuwós dinkwa nee malayke sleémeero tidá' hhohho', inós iri iwiit gawaá kitaangós kuduú xirfuú koóm, 32xoordu sleémeero niri dír geeraawósí burumbuuritiyá', giri partliit adór de'eemusmo bee/aangw nee aara ngir partlaatliti. 33Bee/aangw guri qaas bartá dakós oo doó /iyáy, nee aara giri qaas bartá dakós oo doó basáy.

34«Waawutmo mukduú bartá dákw doó /iyáy guri bay, ‹Qwalaasé', kuungaásingá' Baabuúeé' aa tsuúq. Waawuti'iimadá' iimír tlehhmuú yaamuwo taa amohhe'eés as kuungá' aalaak. 35Asma qoomár án niwa qwariit, kuungá' ina /aymisé'. Qoomár án niwa waxiit, ina wahasé'. Qoomár án tawa dahaaymo, ina dahi'isé'. 36Qoomár án tawa /aankwets, ina tsiitisé'. Qoomár niwa tiiq, ina neetleesi eeré'. Nee qoomár tiwa tseék, ina artá eeré'.›

37«Mukdá' hota ganaá' tari ooi, ‹Aáko, ahaá a xaylá kuúng tawa qwarit, uri /aymiisaán? Laqaá tawa waxit uri wahaasaán? 38Slám a xaylá uwa araán tawa dahaaymo, uri dahi'isaán? Laqaá tawa /aankwets uri tsiitisaán? 39Nee a xaylá uwa araán tawa tiq, uri neetleesi awaán, laqaá tawa baraá doó tseegamo, uri artá awaán?› 40Waawutmo iri ooi, ‹Án a kah, umuúqo gaaro ar taa tlehhé' dír oo wák baraá hhaee'eé' kuká' ninakwe, a ngina aníng i tlehhé'.›

41«Aluuwo mukdá' bartá dákw doó basáy i dirií' guri bay, ‹Quutlé' dir'eene, kuungaásingá' taa lu'ús, tlawsé' baraá asltá baloó gwaa'aaká, tidá' taa amohhe'eés as Neetlaangw nee malaykeerós. 42Asma qoomár án niwa qwariit, iga /aymisi'iiká. Nee qoomár niwa waxiit, iga wahasi'iiká. 43Qoomár tawa dahaaymo, iga dahi'isi'iiká. Nee qoomár tawa /aankwets, iga tsiitisi'iiká. Qoomár niwa tiiq, iga neetleesi eeri'iiká, nee qoomár niwa baraá doó tseegamo, iga artá eeri'iiká.›

44«Mukdá' sleeme iri ooi, ‹Ahaá Aáko, a xaylá atén kuúng uwa araán tawa qwarit, laqaá tawa waxit, laqaá tawa dahaaymo, laqaá tawa /aankwets, laqaá tawa tiq, laqaá tawa baraá doó tseegamo, uri sagadiyusaniiká?› 45Inós iri ooi, ‹Án a kah, umuúqo gaaro ar taa tlehhi'iiká dír oo wák baraá hhaee'eé' kuká' ninakwe, a ngina aníngií tlehhi'iiká.› 46Nee kukaáká' niri tlayá', niri dahamaá ayá' baraá sakwasleemár alhhe'eesay wasl. Ala mukdá' hota ganaá' tan dahamaá áy baraá slafíngw alhhe'eesay wásl.»

Currently Selected:

MATAYO 25: IRQW

Highlight

Copy