MATAYO 26

Ta loohír leelehhiit ar Yesu kur oohi

(Marko 14:1-2; Luka 22:1-2; Yoh 11:45-53)

1Yesu axweesanaywí sleémeero ooaro nguwa hhe'eés, eeharuuseerós gari báy, 2«A xuá' deelo tsár bira waaráhh, a deeloodár ur ar Pasaáka, nee Garmoó Hee ku sakii/ as kuwa kikii'i.»

3Qoomaadae kaahamuusér uren ar Mungú nee bariisér muu tari burumburiít baraá afeenír doó kaahamusmoó Mungú, kudá' umuuwós ta bay Kayafa. 4Tari dinkwár wa axweés as Yesu kuwa qawti oohi, nee kuwa gaasi. 5Ala tari oó', «Adoosíng a tleehhanaaká baraá deeloorí ure, as muu muwa tlaahhírár awaán.»

Yesu kuwa Betaníár wa sliík ar mooyaangw

(Marko 14:3-9; Yoh 12:1-8)

6Qoomár Yesu iwa Betaniár i dirii'i, dír doó Simonidá' tiqtír tsatimituú koóm, 7/ameenirka nina hardát. /Ameenidá' i chupiito'ór mooyángw koón, Chupiito'oodá' kana tleéhh ar tleeír ta bay Alabasta. Mooyangwdá' tlaxoorós ka ur. Iri tseewuúr dír Yesu, chupiito'oodá' gari gawaá ságw Yesú ii ku'ús, qoomár Yesu iwa dír muruú /aymár i dirii'i. 8Eeharuuse adoodá' ngiwa aán, iri búhh, iri ó', «Gár mooyangwqá' kus adooqár hhitin a milá? 9Asma bar geera kwaa weeriís, peésár yaariir ga sláy, kari haniis dír liitlakuuse.»

10Yesu axweesanay'ín nguwa tsaáhh, iri oó', «Asma milá /ameenirí mas daawitimisá'? Gadiyeérí naa aníng i tléhh ka hhoo'. 11Asma liitlakuuse nee kuungá' a dinkwa umuúqo daqto, ala án nee kuungá' umuú baalaaro a dinkwaarooká. 12Inós mooyaangw nguna ku'ús gawaá slaqwte'eé', as slaqwte'eé' ngiwa geerií slik, as amohhe'eesár bál foolar'eé'. 13Án a kah, umuúqo diiro ar Ya/abtór hho' kawa alki/iiti baraá yaamu sleémeero, tí /ameenirí aa tléhh sleeme ka alki/iit as inslaslaangós.»

Yuda iwa ya/án Yesu nguwa saki/i

(Marko 14:10-11; Luka 22:3-6)

14Eeharusmoó wák baraá kudá' mibaá nee tsare, oo ta bay Yuda Iskarioti, iri hardáh dír kaahamuusér uren ar Mungú. 15Iri oó', «Án barnaxes ngu dirhúng i sakií/, gár ni hanisa' a milá?» shiliíngi mibeeri tám kay dirósí haniís. 16Iimír qoomaadá' Yuda pa/aangw guri leelehhiít oo Yesu ngur saki/i.

Yesu nee eeharuuseerós muruú /aymár Pasaáka kuwa dinkwár wa /aáy

(Marko 14:12-21; Luka 22:7-14, 21-23; Yoh 13:21-30)

17Baalár deelór geera ar deeloodá' ur ar Mikaátér taa sluuftisiiká, Yesu eeharuuseerós guri i daqeér guri beér, «Dír kuúng ta sla' a diimá ar muruú /aymár Pasaáka kway amohhe'eesaan?»

18Yesu iri oó', «Tlawsé' baraá gixsa, dír doó heeko, ku beera', ‹Intsaahhatusmo i kaahi, Qoomar'eé' naa tseewuúr. Án muruú /aymár Pasaáka u dír do'ók wa /aáy, dinkwa nee eeharuuser'eé'.› »

19Eeharuuse adoodá' Yesu ngaa báy gari tléhh. Muruú /aymár Pasaáka kuri amohhe'eés.

20Qoomár tsiindowo, tawa iwiít dír muruú /ayma dinkwa nee eeharuuseedá' mibaá nee tsár, 21qoomár tawa /ayin, Yesu iri oó', «Án a kah, heé wák baraá tla/angwhunge aníng i sakii/.»

22Eeharuuse iri ló'wa gurhaamuút. Tiri wakeetiné' yaahamisuwo tawa kaahi, «A anínge, Aáko?»

23Yesu iri oó', «Heé nee aníng aga altsaakwaan baraá isaangi, an kudá' aníng i sakií/. 24Garmoó Hee inqo tawo amór gwa'arár i hi'iit, adoodá' gooi i kat daanduuwose. Ala heedá' Garmoó Hee gu sakií/, hhiintluuwós ku gawít. Inós a tsiní geera bur kwa laqwaaliiká.»

25Yudadá' Yesu gu sakií/ iri oó', «Intsaahhatusámo, a anínge?»

Yesu iri oó', «Kuúng aga ó'.»

Muruú /aymár Aako

(Marko 14:22-26; Luka 22:15-20; 1Kor 11:23-25)

26Qoomár tawa /ayin, Yesu mukatmo guna óh, iri sluufiís, guri parhhamiís, guri eeharuuseerós i haniís, iri oó', «Oohaak, /ayaak, gaarí a slaqwte'eé'.»

27Xooslmoó wahaangw guri óh, iri sluufiís, guri haniís, iri oó', «Kuungá' sleémeero gaarír baraá xooslmoowí wahaak. 28Asma gaarí a tseerer'eé' ar alqado, ar ku'uut as múk yaariír as hingeemisuú tlakweema. 29Án a kah, ma'aá sabiíbu i baloó wahaaká ay baalaadá' awa /aben ngiwa wah dinkwa nee kuungá' baraá waawuti'iimár Baabuúeene.»

30Tawa hhe'eés daa'ango, tari tsa/án gawaá tloomár xaaiikaari ta bay seituúni.

Yesu tlaankuú Petro nguwa geerií oó'

(Marko 14:27-31; Luka 22:31-34; Yoh 13:36-38)

31Yesu eeharuuseerós gari báy, «Xweeraaká' laarihe kuungá' sleémeero insereehhi nu eér as aníng, nee aníng iri geexeerá'. Asma kaa gooín, ‹De'eemusmoó bee/aangw u slaáhh, nee daqtá bee/aangw iri diyaa/át.› 32Ala án binda waasleé/, án a geerií tláw Galilayár i alé.»

33Petro iri oó', «Tam sleémeero insereehhi ngi eera as kuúng, ala aníng i baloó eeraaká.»

34Yesu guri báy, «Án a kah, konkomo iwa uui xweeraakaá laarihe, kuúng an iga sagaáwa tám wa satlánk.»

35Petro iri oó', «Barnaxes gár tiwa hariím a tawa alqatlaan nee kuúng, tam adoorihe u baloó satlankaaká.»

Eeharuuse sleémeero adoorí sleeme gari ó'.

Firór Yesu baraá Getsemane

(Marko 14:32-42; Luka 22:39-46)

36Yesu nee eeharuuseerós tari tláy dirka ta bay Getsemane. Eeharuuseerós gari báy, «Diirí iwiitaak, daa aníng a amorqií firór áw.» 37Petro gurir tláy dinkwa nee daaqaydá' tsár oo Sebedayo. Gurhaamír ur guri iimu/uún, nee iri amoqwaqwadín. 38Giri báy, «Muunaáeé' gurhaamír yaariir gwa eér ar tsaxwaá gwa'ara. Diirí wa iwiiwitaak, dalaaé' dinkwa nee aníng.»

39Iri geerií kumiít gár niinawe, giti gari yaamúr óh, iri firín iri oó', «Baabuúeé', barnaxes i ya/aán, qoomaarír slahh'amu aníng i wa pa/. Ala ma tleehhaar ar adoodá' án ngir slaa', na tleehheek ar adoodá' kuúng ta sla'.»

40Yesu iri kií/ dír eeharuuseerós, naxés naa guiyé'. Petro guri báy, «Ahaá, aga aleesleeri'iikáhe tawa dal'a' dinkwa nee aníng tam qoomár niinawe? 41Dalaaé', firiiriimé', mutunduwa ar baá/ iiara'aduuwo. Muuná ga mak slaa' ala slaqwa kan daqatlaakw.»

42Yesu iri malé kií/ sagaáwa tsare, iri firín iri oó', «Baabuúeé', barnaxes slahh'amuuwí hingeesaro i ya/anaká, barqo ay dír ngway slaw, sla'aarirók i bo/.» 43Yesu nay malé kií/, naxés naa guiyé', asma ilaaín naa il'uu'uyé'.

44Yesu eeharuuseerós gari malé didí geexáy, iri tláy iri malé firín sagaáwa tame, /aymi'i aqo kudá' kilá' gina inkií/. 45Yesu iri kií/ dír eeharuuseerós, gari báy, «A kumitá'a gu'uteero as tawa hungu/usa'? Ga/aawaagáy, qooma aa xeér, Garmoó Hee ku qaas baraá dabaá múk tlakuuse. 46Tlawaaré', diirí geexawaare'. Ga/aawaagáy, kudá' aníng i sakií/ naa tseewúy.»

Yesu kuwa óh

(Marko 14:43-50; Luka 22:47-53; Yoh 18:3-12)

47Qoomár Yesu iwa baraá axweesanaydí kahhi, naxés Yuda, oo wák baraá eeharuuseedár mibaá nee tsare, niri hardáh nee boo/oó úr oo muu. I paangadaá koná' nee guhhuli'i. Mukwí amór i dahhi a amór kaahamuusér uren ar Mungú nee bariisér muu. 48Yudadá' Yesu gu sakií/ laya gaa qaro geerií haniís iwa kaahi, «Heedaádá' án ni ma'aas an inós, ku otá'.»

49Siiwadár kilae Yuda niri hardáh dír Yesu, iri oó', «Intsaahhatusámo laawaay!» Guri ma'aás.

50Yesu iri oó', «Mulqámo, tidá' nisa hardát tleehheek.»

Mukdá' ngwa oohár ay niri hardáh, Yesu kuri hara /akuút, kuri óh. 51Nee heeko wák oo nee Yesu ti koomá', paángarós gari óh, gari duúx baraá qawáy wa ale, lawaalmoó kaahamusmoó úr oo Mungú guri iia tsaát. 52Yesu iri oó', «Paángarók ki/iseek baraá qawaay, asma mukdá' slaáqw ar paangadu, ta qwaar ar paangadu. 53Kuúng ka xu', aníng Baabuúeé' u aleeslawaakáhe firooro, as slawá mibaá nee tsár ngi ba/a awa malayke, ngiwa haniisi hamír kilá'? 54Ala án adoorí bara tleéhh, adór Gooi ir bo/ a adoomá, tí kah muruuwí gár kuwa hariím aqo in tleehharuut.»

55Siiwadár kilae Yesu boo/aay guri báy, «Ahaá baré ina i haratleeré' ar paangadu nee guhhuli'i, adór múk fisusmoó oohár áw. Umuúqo baalaaro aníng a baraá Doó Mungú wa iwaawiít niwa intsaahhatimaamis, ala kuungá' i uhahinda'aaká. 56Ala tí sleémeero in tleehharút as gooír aaruuse iwa bo/.»

Eeharuuseerós sleémeero guri geexeér, iri góp.

Yesu i dír doó kwasleema

(Marko 14:53-65; Luka 22:54-55, 63-71; Yoh 18:13-14, 19-24)

57Yesu kuri óh, kway huúw amór doó kaahamusmoó úr oo Mungú kudá' ta bay Kayafa. Diirí an dír intsaahhatuusér hara'ayár Mose nee bariise i burumburít. 58Petro iri amorqá' saáwá magegeamiít iri eeharaarín ay dír afeenír doó kaahamusmoó úr oo Mungú. Iri dáh baraá do', iri iwiít dinkwa nee sagadiyuusér do'dá', as alhhe'eesaydá' nguwa ari. 59Kaahamuusér uren ar Mungú nee múk doó kwasleema sleémeero lamabu'úngw lama kuri leelehhiít daanduú Yesuwo as kuwa gaasi. 60Ala lamabu'úngw taa sláy i kaahh, tam lamabu'uusér yaariir ar lama naa ti'iti. Aluuwo múk tsár niri hardáh, 61tari káh, «Heewí ina oó', ‹Án do'wí oo Doó Mungú fee/aro u aleesláw nee nguri tleéhh deelo tám.› »

62Kaahamusmoó úr oo Mungú iri sihhiít, Yesu guri báy, «Masa xaslít? Mukwí gár daanduuwoge i kaahi a umós?» 63Ala Yesu aa ilawatsiiká. Kaahamusmoó úr oo Mungú Yesu guri báy, «Án kuúng u baw, lo'o huweek ar Munguúdá' slaáf. Atén ti ádbeer kuúng barnaxes aqo Kristo, Garmoó Mungú.»

64Yesu iri oó', «Kuúng aga ó'. Ala án a kah, iimír hamí Garmoó Hee u aandá' aa iwiít dákw doó /iyáy oo kudá' aleesleemuú koóm, nee nay kii/ ar huunkoó doori.»

65Kaahamusmoó úr oo Mungú inqwaruuwós guri feehhamiís, iri oó', «I Mungú /ooslislín. Gár lamabu'úngw hatlá' ngus ala leelehhiitaan a milá? Qaytsité', /ooslisliingós kwí hám ugwa axasé'. 66Xáy, kuungá' ma katá'?»

Tari oó', «Gár iwa harin a gaasa.»

67Kuri gitsee/a i nitsimiít, kuri tuu'uút ar kundi'i. Nee bahh'alé nguri tlaaqarma' muxiyé', 68tari káh, «Aá Krísto, atén i ooang, heé kuúng ugwa muux a heemá?»

Petro Yesu nguwa satlaánk

(Marko 14:66-72; Luka 22:56-62; Yoh 18:15-18, 25-27)

69Qoomár Petro iwa baraá afeenidá' wa iwiwiiti sagadiyuso'orká wák guna i daqeér, guri beér, «Kuúng a heé wák baraá mukdá' nee Yesú Galilaya ti alkooma'a.»

70Petro iri dír geeraá muu sleémeero wa tlaánk, iri oó', «Gár kiíng ta kat án a xuaaká.» 71Petro iwa tsee/ií ti'iít, iwa dír afkú dó' i hardáh, dasír hatlá' guri aán. Dasiidá' mukko didaádí dirií' guri beér, «Heewí toomák i dinkwa nee Yesú Nasareti.»

72Petro iri malé tlaánk ar lo'o, iri oó', «Án heesíng u xuaaká.»

73Deelór niiná iwa gwá', mukdaádá' naa baraadí hardah Petro kuri i daqáy, kuri báy, «Ar ló', kuúng a heé wák dir'ine. Asma tam axweesanaywók sleeme kuúng u laqaaqán.»

74Petro lo'o gari huúw iri oó', «Án heesíng burqo xuú' ni gwaá'.»

Siiwadár kilae konkomo iri uú'. 75Petro /aymuudá' Yesu aa oó' guri insláy, kudá' iwa káh, «Konkomo iwa uui, án kuúng iga sagaáwa tám wa satlank.» Petro iri tsee/ií ti'iít, iri ló'wa /aa/amín.

Currently Selected:

MATAYO 26: IRQW

Highlight

Copy