LUKA 15

Slaqsoó bee/ír aa qwat

(Mat 18:12-14)

1Ohomuusér koódi sleémeero nee tlakuuse Yesu kuna i daqáy as kuwa iiárií qaasi. 2Múk Farisayo nee intsaahhatuusér hara'ayár Mose tay qununuú/ ta kaahi, «Heewí mis tlakuusér dahi'iimis, slám nee inooín i al/ayiná'.» 3Yesu giri slaqsaywí báy,

4«Barnaxes heé wák baraá tla/angwhunge bee/ángw tsiiru gu kón, bee/ír wák bira qwát, adór i laqi a adoomá? Aqo bee/ángw mibeeraá gwaleél nee gwaleél gun geexáy baraá qawo, iri tláy, tidá' aa qwat gari leelehhtuú áy, ay dír ngi slay. 5Qoomár birnga sláy, gari gawaá sum'iiwós i qaas iri qwalalaa/. 6Qoomár bira dó i hardáh mulqeerós gari ateet nee inslaawaywose, iri ooi, ‹Qwalalaa/aré' dinkwa nee aníng, asma bee/ir'eé' tidá' aa qwat aga sláw.› 7Án a kah, gawaá dooriiwo sleeme ta adoorír qwalalaa/ as heé wák oo tlakusmo oo aa hhu'u'un, ta múk mibeeraá gwaleél nee gwaleele oo gan'amuú koóm, oo hhu'u'uungw gu sla'aaká.»

Slaqsoó shilingmoó aa qwaar

8«Laqaá barnaxes /ameenír wák i shiliíngír mibángw koón, oo wák bira qwaár, adór i laq a adoomá? Aqo tsaa'asi gan dá/, do' gway fíts, shilingmoodá' guri leelehhít ay dír nguy sleer. 9Qoomár burngwa sleér, mulqeerós gari atét nee inslaawaywose. Giri beer, ‹Qwalala/aré' dinkwa nee aníng, asma shilingmooeé' kudá' aa qwaar ugwa sláw.› 10Án a kah, tam malaykér Mungú sleeme i adoodár qwalaalá/ as heé wák oo tlakusmo oo aa hhu'u'un.»

Slaqsoó garmoó aa qwaar

11Aluuwo Yesu iri oó', «Heeko wák i deer oo daaqoó tsár gu koóm. 12Garmaadá' niiná baabuúwós guna báy, ‹Baabá, baraá muruuwoge kudá' aníng wa hariím qasiisang.› Muruuwós kudií kon guri inooín i qasmiís. 13Deelór niina iwa waaráhh, garmaadá' niiná muruuwós guri dinkwaárií qaás sleémeero, iri aa'aá káy baraá yaamaá saawá'. Amoodae muruuwós guri hhitaatín ar luhaá gana'a'aaká.

14«Qoomár muruuwós sleémeero nguwa faák, giyér ur nay tleér baraá yaamuudae, inós sleeme iri waasl'amuút. 15Iri tláy ay amór heeko yaamuudá'. Heedaádá' guri baraá qaymoorós i huúw, baynu ngiwa /aymiisi. 16Garmaadá' qafoodá' baynu i /ayiya' giri slaá' ngiwa qwarkós ar tsaeemisi, asma heé gwa gaárí haniis i kaahh. 17Ala qoomár inós tiwa baraá muunaáwósí aldakuút, iri oó', ‹Sagadiyuusér dír doó baabuúeé' wa gadiyuus a magá', ar gwaeemaá gixaw, nee án qwari i baraaká' wa gaamiis. 18Aníng a tláw, amór baabuúeé', nee nguri baw, Baabá, án aga tlakweés geeraá Munguhe nee geeraawoge. 19A hariimaaká daxta tiwa garmaawók ar ateetin. Harafaaráng amór sagadiyuuseerók.› 20Aluuwo iri tláy, iri kií/ amór baabuúwós.

«Ala qoomár iwa amorqá' saáw i kahhi, kuri ár nee baabuúwós, guri gurtláy. Baabá iri amoorós i ta'aaín, guri slaqwtós i óh, guri ma'aás. 21Garma iri oó', ‹Baabá, án aga tlakweés geeraá Munguhe nee geeraawoge, a hariimaaká daxta tiwa garmaawók ar ateetin.› 22Ala baabá lawaaleerós gari báy, ‹Inqwaarír hhoo' huwaare' ar gaanslaay, tsiitisaak, dakós mungáy qaasaak, ya'a' ya/atáy dahaasaak. 23Awuú aa wahhaar huwaare', ku gasá'. Atén daqaní a /ayiimaán tay qwalaala/aán. 24Asma garmaaeé' kwí geeraawo aa gwaá', nee hám naa waasleé/, geeraawo aa qwaár, daxta ugwa slawaán.› Bara/ kuri iimu/ún.

25«Garmaadá' úr i baraá qaymór i dirii'. Niwa kií/ amór dó i alé, iwa tseewúy, afór daa'aangw nee neeto gana axaás. 26Sagadiyusmoó wák guri ateét guri yaahaás, ‹Kaangwí a milá?› 27Guri báy, ‹Hhiyaawók naa hardáh, nee baabuúwók gwa awuudá' wahhaár i gaás, asma nguwa malé sláy iwa slafi.›

28«Garmaadá' iri buúhh, dahamaá baraá do' giri sií'. Aluuwo baabá nay baraá dó wa ti'iít, gway harhheehhe'emisuú áy. 29Ala baabuúwós guri báy, ‹Ga/aaweek, án kuúng una sagadiyumamiís kureeriiká' sleémeero, nee qoomár hara'ayaarók ngiwa waaqaá' i káhh. Ala tam deelmoó leei oo naa aní hanís i kaahh, niwa qwalaala/aan nee mulqer'eé'. 30Ala garmaawók kwí niwa hardáh, oo muruuwók gwa faak dinkwa nee /ameenár tsaatuuse, ugwa awuudá' wahhaár i gás.› 31Aluuwo baabá iri oó', ‹Garmaaeé', án nee kuúng a dinkwa umuú deelooro, nee gár án niqo kooma a tók. 32Ala tawa qwalaala/aan nee tawa bara/aan i hariín, asma hhiyaawók kwí geeraawo aa gwaá', hám naa waasleé/, geeraawo aa qwaár, daxta ugwa slawaán.› »

Currently Selected:

LUKA 15: IRQW

Highlight

Copy