LUKA 16

Saayusmoó inkihhimu wásl

1Aluuwo Yesu eeharuuserós gari báy, «Daqaarmooko i deer oo daqaari'iimarós gaa heekoó i saayin. Heedaádá' kuna dirós i sakwasleemuút ta kaahi, ‹I daqaari'iimarók hhititín.› 2Guri ateét guri báy, ‹Kaangwí muu i kaahi daanduuwoge a umós? Xáda, faarór muruueé' sleémeero diirí laqaamang. Asma kuúng a sangw kumitaká gadiyeésinge.› 3Aluuwo heedaádá' iri baraá muunaáwósí oó', ‹Adór ni laaq a adoomá? Asma daqaarmooeé' kwí i hingeemiis baraá gadiyeérose. Doosla a aslawká. Firooro a muruumiít. 4Hám daxta an fuqriím, as kahhó' bira hingeés gadiyeede, múk hatlá' iwa ilaaoohi.›

5«Aluuwo iinuusér daqaarmoowós gana ateét. Iri oó' dír kuduú geera, ‹Gár aakooeé' uwa iinuusi a milá?› 6Iinusmoodá' iri oó', ‹Dahhaaroó tsiiru oo di/tá seituúni.› Guri báy, ‹Slambaree/irók taataahheek, mibeeraá kooán gooimeek ar gaanslaay.› 7Oo hatlá' guri báy, ‹Kuúng gár tuwa iinuusi?› Iri oó' katatoó tsiiru oo angaáno. Guri báy, ‹Slambaree/irók taataahheek, mibeeraá dakaát gooimeek.›

8«Saayusmoodá' inkihhimu wásl taa daqaari'iimár i saayín, kuri xirfayeés nee daqaarmoowós, asma fuqurangwdá' aa tleéhh. Asma múk baraá yaamuuká' ta fuqurángw kón baraá slafingw'ine, ta mukduú baraá gwa/aateemaawo.

9«Án a kah, daqaari'iimár baraá yaamu ar gadiyuusaak as mulqe kawa sleera'. Daqaari'iima bira fák, mulqeedá' daqaní nu ilaót baraá hotaá kureerisleeme. 10Heé inkihhimuú koóm baraá gár niinawe, tam baraá gár ure sleeme i inkihhimuú kón. Nee heé inkihhimuú koomaaká baraá gár niinawe, tam baraá gár ure sleeme i inkihhimuú konká. 11Gawaá adoorihe, kuungá' bar inkihhimuú koonda'aaká baraá daqaari'iimarír baraá yaamuukae, daqaari'iima tidár ló' heé ngi dirhúng i saayiím a heemá? 12Bar inkihhimuú koonda'aaká baraá daqaari'iimár heé hatlae, toohúng heé ngi haniís a heemá?

13«Heé daqaarér tsár i lawaali'iitaro ga asláw i kaahh. Asma kooko gu aahh, kuqá' gway slaa', laqaá nee kooko ti oohiyá', kuqá' gway waaqaqaa'. Mungú nee daqaari'iima i lawaali'iitaro i aleesleera'aaká.»

/Ayma'aá hatlá' awa Yesu aa káh

(Mat 11:12-13; 5:31-32; Marko 10:11-12)

14Mukduú Farisayo tidá' Yesu aa oó' sleémeero ngiwa axaasiyé', kuna niqín, asma inooín tawa kudá' peésár sla'á' ló'wa ale. 15Yesu giri báy, «Kuungá' ti geehhooatimisá' dír geeraá muko, tawa kudá' hota ganaa'á'. Ala Mungú munerhúng ga xuu'. Muruudá' muu i gaárí xui, ala dír geeraá Munguhe an kudá' buhhtamís.

16«Hara'ayár Mose nee gooír aaruuse ina kumamít ay qoomár Yohánedá' Baatimaamiís niwa hardáh. Ala iimír qoomaadae Ya/abtór hho' ar waawuti'iimár Mungú kay alki/iít, nee muu tin kilooín dahamiis ar /uuru baraá waawuti'iimarihe. 17Ala ka inslaahh doori nee yaamu niwa waarahhiya', ala i ya/aandaaká tam gooír niina adór afkú laqwa baraá hara'ayár Mosewo kawa hingeesi.»

18«Umuúqo heewo oo hareerós gaa guus, iri harér hatlá' duúx, aa fuquús. Nee bar hee /ameenír hhawaatuuwós aa guús nga duúx, aa fuquús.»

Heé daqaarmo nee Lasaro

19Yesu iri oó', «Heeko wák i deer, oo daqaarmo. Inqwaruú i tsitatiiti a inqwaruú sirda/atén, nee taa tleéhh ar kitaánír hhohho'. Nee umuú deelooro muruú /aymár hhó' gun /aa/aay. 20Narkutmooko ta bay Lasaro kun afkú do'ós i haahuuw, i inkahha'aá yaariír kón. 21Inós muruú /aymaadá' gawaá meésár daqaarmoó wa paáhh, gun ilatleerumamiis nguwa /ayi. Sleeme seeaawe gun i burumburimaamít, gun inkahhi'i naatsatsiín.

22«Narkutmoodá' iri gwaá', malayke guri húp ay dír geeraá Abrahamu. Daqaarmoodá' iri gwaá' sleeme, kway foól. 23Iwa slahhahhai didár múk aa qaátl wa ale, ina gáwtí qaytsiít, Abrahamu gway amorqá' saáw i ár, Lasaro i geeraawós i dirii'. 24Daqaarmoodá' iri tseé' amór Abrahamu iwa kaahi, ‹Baabá Abrahamu, án gurtlawáng. Lasaro ya/aaweek ma'aay ngi tikiisi ar diitsarós, tsifrangw'eé' ngu tse'eesi, asma baraakae asla i ló'wa slahh'eemís.›

25«Abrahamu iri oó', ‹Garmaaeé', inslaweek adór kuúng muruú hhó' baraá yaamuwo kura sleér oo slafíngw baraá yaamu, ala Lasaro gár aa sláy a liitlakwe. Daxta inós hamí i diirí, ku gurkwa/amis, kuúng tu slahh'emiis. 26Slamí baraá tla/ángw atén nee kuungae, wa/ángw aa tsar'eet i deer, as múk gayuurén kwí waarahhmuú amoosíng munguwa aleesláy, laqaá muksíng oo gayuuhúng mindiwa gayuurén i waaraáhh.› 27Daqaarmo iri oó', ‹Bar adoosíng ala, baabá án kuúng u firiím, Lasaro ya/aaweek amór doó baabuúeé'. 28Asma hhaee'eé' awa kooán i dayá', ngi gurbu'utá ay, asma inooín mindiwa hardihiyé' diirí slahh'amuú koom.›

29«Abrahamu iri oó', ‹Mose nee aaruuse i dayá'. Tidá' inooín ta kaahi ka iiárií qaasi.› 30Iri oó', ‹Aasla'áy baabá Abrahamu, asma heé naa didár múk aa qaátl wa kii/, birnga i daqáy, ta hhu'u'ún.› 31Abrahamu iri oó', ‹Mose nee aaruuse birka iiárií qaasiiká, tam heé naa baraá múk aa qaátl wa waaslee/ gurbu'uto gi aleeslayká.› »

Currently Selected:

LUKA 16: IRQW

Highlight

Copy