LUKA 14

Yesu heé tiqtír sibaara nguwa hungu/uús

1Looarka wake Yesu ina /aymár áy dír doó heeko úr oo múk Farisayo, baalaadá' a deelór Sabaáto. Muu gu hara gigidín. 2Heeko tiqtír sibaara iri dír geeraá Yesu i hardáh. 3Yesu intsaahhatuusér hara'ayár Mose nee múk Farisayo giri báy, «Hungu/umisuú muu ku hhoóe deelór Sabaátoro, laqaá ku hhooeeká?»

4Ala inooín tana xaslimiít. Yesu heedaádá' guri taataáhh, guri hungu/uús, guri báy, «Quútl.» 5Aluuwo Yesu inooín giri báy, «Barnaxes hee na/aywós,#14:5 Na/aywós: Baraá gooír Yunaniro gár taa gooín a daqwaay. laqaá awuuwós aa /eét baraá hhalaangw, hee i deéro tla/angwhunge oo gu duuxaaká hamtidár kilae, deelór Sabaátoro?»

6Inooín axweesantí kaa mu/aywatsiiká.

Ninaaweemis nee dahi'imis

7Qoomár Yesu adór mukdá' taa dahi'ís ir kiteeraá hhó' tsawdiiti ngiwa tsaáhh, giri slaqsaywí báy, 8«Qoomár kuungá' burtunda dahi'ís nee heé duuxuuxuúm, kiteeraá hho' awa taa i iwita' mi tsawdiitara'. Wane, múk ta ak ilaiwawa/i ta kuungane i deer oo ta daamaran. 9Heedá' do' loó' kuungá' naa dahi'is tsaraawo, birna hardáh nuri bay, ‹Kiteeriisíng geexawaak, mukwí ngi i iwiiti.› Daqaní kuungá' tawa iwtanángw eera' amór kiteeraá waaqa'atiitá', ka slasla/aar. 10Bar dahi'isa aga sleér, iwtanángw áw amór waaqa'atiit. Daqaní heé do' loó' birna hardáh, iri ooi, ‹Mulqumooeé', qwaláng amoorír geera.› Daqaní kuúng turi tsaahh nee mukduú hatlá' adór tar heé ta ilaiwawa/i. 11Asma heé ti ureemiís, ku niinawees. Nee kudá' ti niinaweemiís, ku urees.»

12Yesu heedaádá' gwa dír do'ós i dahi'is sleeme guri báy, «Muruú /aymaarók bura tléhh oo tlaatla/aangw, laqaá oo tsiindo, mulqeerók ma ateetaar, laqaá hhaeewók, laqaá mar'eefoowók, laqaá inslaawaywók oo daqaare, as inooín baalár hatlae muwa dahi'isiyé' as tuwa bui. 13Ala qoomár muruú /ayma bura tléhh, narkuute na ateeteek, nee taqooraay, nee múk tiqtír sol'omit, nee taampu. 14Kuúng daqaní amohhooa a sleér, asma kuká' gár ur buiya' i káhh. Bu'utuuwók a bál waasle/uú múk gan'amuú koóm.»

Slaqsoó muruú /aymár úr

(Mat 22:1-10)

15Heeko wák aa dír muruú /aymárí iwiit, adoodá' ngiwa axaás, Yésú guri báy, «Heé amohhoó' a kudá' iwiít dír muruú /ayma baraá waawuti'iimár Munguhe.»

16Aluuwo Yesu heedaádá' guri báy, «Heeko wák i deer oo muruú /aymár úr gwa tleehh, múk yaariír guri iigu'uús. 17Qoomár muruú /ayma iwa xeér, lawaalmoowós guri ya/aáw, dír mukdá' taa iigu'uús, nguwa bay, ‹Qwalaasaré', asma mura' sleémeero daxta kwaa amohhe'eés.› 18Ala sleémeero nina si'iyé', umuúqo heewo ar gu ila/aam gay oó'. Oo geera iri oó', ‹Aníng qaymo aga tlaáxw, ala gár tiwa hariím an qaytsuú áw. Na'ás, án gurtlawáng.› 19Kooko iri oó', ‹Aníng awér mibaangw ar doosla aga tlaáxw, hám daxta a iiartá áw, na'ás, gurtlawáng.› 20Oo hatlá' iri malé oó', ‹Aníng aga duuxuúm, daxta adoorihe án daqeemu ngu aslawká.›

21«Lawaalmoodá' iri kií/, kaangwí guri oó' dír aakoowós. Aakooduú do' loó' adoodá' ngiwa axaás, iri ló' wa buúhh, lawaalmoowós guri báy, ‹Tláw ar gaanslaay baraá luhuudaá uren awa baraá gixsa, nee baraá tsirxadaá gixsa, narkuute huwang nee taqooraay nee taampu nee múk tiqtír sol'omit.› 22Lawaalmoodá' iri oó', ‹Aáko, tisíng sleémeero naa kát aa tleehharút, tam hamí do' aa hatsiiká.› 23Aakoodá' iri oó', ‹Tláw, ti'iít tsee/áy alé ay baraá luhuudaá uren nee baraá irwadu, muu harhhehhe'eemisang iwa baraá dó' i dahi, as dooeé' iwa hatsi. 24Asma án a kah, baraá mukdá' taa iigu'uusi oo naa daqaykahe, hee i kaahh oo muruú /aymar'eé' gu tsaáq.› »

Eehartá Yesu adór kar gawít

(Mat 10:37-38)

25Qoomár boo/oó yaariír nee Yesu tiwa alkona', Yesu inooín giri i warqáy giri báy, 26«Hee barnaxes naa hardáh amor'eé', bar baabuúwós gwaa aahhiiká, nee aayoorós nee hareerós nee na/iiwós, nee hhaaeewós, nee slám inós kilós birta aahhiiká, i eeharusmooeé' tleehhitiiká. 27Hee barnaxes msalaábarós gaa gagaariiká, nee naa aluueé' wa eeharinká, i eeharusmooeé' tleehhitiiká.

28«Bar heé wák baraá tla/angwhunge doó úr oo gáwtí tleér gu tleehhamór wa slaa', a in ala iwiítiíke, as hariímár bu'uut ngiwa faari, áx hariímár bu'uut i deéro? 29Ala do' tlehhemuuwo burngwa iimu/ún, nee aluuwo gway harslaaqaat alhhe'eesaro, mukdá' sleémeero oo adoodá' gaa ar, inós kun waqasén tari ooi, 30‹Heewí do' tlehhemko guna iimu/ún, ala alhhe'eesaro hám gwa harslaaqaát.›

31«Laqaá waawutmoó wák barnaxes i slaqwarár eemuú slaa' amór waawutmoó hatlá', aqo in ala iwiítiíke, tiri ala alqaytsiit áx inós nee múk kumér mibaangw ka aleesláya tawa slaqwi nee waawutmooduú hatlá' oo múk kumér mibeeri tsár koóm. 32Barnaxes ngaa ár slaqwara ga aleeslayká, muu gun ya/aaw as wayda nguwa firin dír waawutmoodá' amorqá' wa hi'iít, dír ir amorqá' saáwí kahhi. 33Gawaá adoorihe baraá tla/angwhunge heé eeharusmooeé' tleehhiít i kaahh, barnaxes muruuwós kudá' sleémeero i kon gwa geexayká.»

Diwtá maamahhaaká

(Mat 5:13; Marko 9:50)

34«Diwi ka hhoo'. Ala diwi maamahhaywós bira faák, gár ki qaasi a milá ar iwa maamahh? 35Hhape ga sangw gaa wa bu'uká tam ufuú xwaansláy. Aqo kan kwaahh tsee/aá tawór i alé. Heé iaá axamis gi koóm, i axaasi.»

Currently Selected:

LUKA 14: IRQW

Highlight

Copy