LUKA 13

Hhu'u'uumé'

1Qoomaadár kilae mukko nina hardáh, kángw mukko Galilaya guri dír Yesú ii oó', adór Pilato ngura tsuú/ qoomár inooín tawa hikwaá ilahhooár ta tsu/i dír Mungú, tam tseerer'ín nee tidár hikwa tiri aleedók. 2Yesu giri báy, «Mukduú Galilaya oo taa adoosír tsuú/ kuungá' ka xua' an ak múk tlákwe ta múk Galilaya kuduú hatlá' sleémeerowo? 3Aasla'áy, án a kah, ala kuungá' bar hhu'u'uunda'aaká, a qwadá' adoosír kilár alé. 4Laqaá mukdá' mibaá nee dakaát, kudá' doó gáwtí tleér aa i huú', giri tsuú/, dír Siloamuwo, kuungá' ka xua', mukdá' an ak múk tlákwe ta kuduú hatlá' sleémeero oo Yerusalemúrí diriia? 5Aasla'áy, án a kah, ala kuungá' bar hhu'u'uunda'aaká, a qwadá' adoodár kilár alé.»

Slaqsoó /aantsír mamaá koomaaká

6Aluuwo Yesu giri slaqsaywí báy, «Heeko wák i xa'anoó /aantsír kón, oo taa dahaás baraá qaymoorós ar sabiíbu. Ina tláy iri mamaá leelehhtuú áy gawaadá', ala gaa slayká. 7Aluuwo heedaádá' qaymoodár sabiíbu ga amohhe'emamiís guri báy, ‹Ga/aaweek, kureeriiká' tamaawo nin mamaá leelehhtuú aa'áw gawaá /aantsírí aleeró, ala gár ni slaaslaw i káhh. /Aantsírí tsateek. Gár yaamu ngihar tawo hhitiin a milá?› 8Ala heé qaymoodár sabiíbu ga amohhe'emamiís iri oó', ‹Aáko, kurkihe malé maweek. Án a kakaanuús nee a xawií qaás. 9Bar mamu ngaa laqwál aluuwo, ka hhoo'. Ala bar ngaa laqwaliká, daqaní ka tsát.› »

Yesu /ameeni ngiwa hungu/uús deelór Sabaátoro

10Bál deelór Sabaátoro Yesu ina baraá doó saaliíngwá intsaahhatimís. 11Nee /ameenirka didaádae i deer ar neetlaamér aa eér. Inós neetlaameedá' iimír ngiwa eér kureeri a mibaá nee dakaát. Neetlaameedá' gari qwambatisa hhe'és, slám inós gan'aasaro ti aleesleeraaká. 12Yesu ngiwa ár, gari ateét kari báy, «Aáyo, kiíng aga hungú/ baraá slahh'amaayeerók tisinge.» 13Yesu dabaawós giri gawaá /ameenidá' i qaás. Inós hamtidár kilae iri ganá', Mungú guri xirfayeemís.

14Heedaádaá úr oo doó saaliingw iri buúhh, asma adoodá' Yesu /ameenidá' ngiwa hungu/uús deelór Sabaátoro, boo/aydá' guri báy, «Deelo lahhoó' i deer ar gadiyeé. Hardaharé' deeloodá' lahhooe, kuungá' tunduwa hungu/uumisi, ala a bál deelór Sabaátorooká.»

15Ala Aako heedá' úr oo doó saaliingw guri báy, «Kuungaá hhaahhafuúse. Umuúqo heewo dirhunge deelór Sabaátoro awuuwós laqaá daqwaywós gu duúxiíke baraá matla/aango as nguwa wahaasár ay. 16Ala /ameenirír xwaylár Abrahamu, inós Neetlaangw gana slahh'eemiís kureeri mibaá nee dakaát, ala inós i hariíndaáke kawa hungu/uusi baraá slahh'amuuwihe bál deelór Sabaátoro.» 17Qoomár iwa axweesi, kudá' sleémeero inós ngu tlaampa'amisá' kiri mureekeés. Ala boo/aay sleémeero iri qwalalaá/ asma muruuduú waa/oo/amo sleémeero Yesu aa tleéhh.

Slaqsoó ilmoó haradaáli

(Mat 13:31-32; Marko 4:30-32)

18Gawaá adoorihe Yesu iri oó', «Waawuti'iimár Mungú gár kara slaqamís a milá? Laqaá aníng gár ngir alqoomees a milá? 19Gár kara slaqamís a ilmoó xa'anooko ta bay haradaáli. Hee guna dahaás baraá qaymoorós. Niri ti'iít, iri xa'anoó úr tleehhiít, tsir/o maray'ín giri gawaá haleemiiwós i tlehhít.»

Slaqsoó gár ta mikaátérár sluuftimiisi

(Mat 13:33)

20Yesu iri malé oó', «Waawuti'iimár Mungú gár ngir alqoomees a milá? 21A slaqás nee gár ta mikaáteérár sluuftimiisi, ar /ameeni aa qás baraá puuruú har afi qoomoó deebedaá tsár, tam puuruúdá' sleémeero iri sluúf.»

Afkú iiraákw

(Mat 7:13-14, 21-23)

22Yesu ina waaraáhh ar baraá gixsadu nee aya, iri hara loohi intsaahhatimís qoomár iwa aaiiwós kay Yerusalemu. 23Heeko wák Yesu guna yaahaás, «Aáko, múk ba/ám ku niináwe?»

Yesu inooín giri báy, 24«Ilakaaharu tleehhaak tawa data' ar afkú iiraákw. Asma án a kah, awa yaariir dahmu ngu leelehhiyá', ala ngu aleeslay'aaká. 25Qoomár heé do' loó' bira tláy, afkú do' burngwa tseék, kuungá' tari sihhitá' tsee/aá wa ale tawa ateetiinda' tawa kata', ‹Aáko, do' gweereek.› Nee kuungá' nuri bay, ‹Amór ta dahha' aníng a xuaaká.› 26Kuungá' kuri beera', ‹Ana al/ayiimaán nee ana alwahamaán dinkwa nee kuúng, nee kuúng an intsaahhatimaamís baraá yaamuurén wa ale.› 27Ala inós kuungá' nuri bay, ‹Amór ta dahha' aníng a xuaaká. Quutlé' dir'eene kuungaásingá' sleémeero awa tlakuuse.› 28Qoomár Abrahamu nee Isaka nee Yakobo nee aaruuse sleémeero bira aandé' baraá waawuti'iimár Mungú i alé, nee kuungá' tunduri tsee/áy kwaahh, qoomaadae kuungá' tari /aa/amiindá', tari /atlaá /agá'. 29Aluuwo muu nin hardah oo da/aáw daáhh nee /uwawo, nee oo /iikú daáhh nee basko, nee inooín tari iwiit dír muruú /ayma baraá waawuti'iimár Munguhe. 30Ga/aawaak baraá kuká' alaá har'a, ta bahh geerií waaraahh. Nee baraá kudá' geeraá har'a, ta bahh alhhe'eesáy kii/.»

Sla'aarír Yesu daanduú gixsár Yerusalemuro

(Mat 23:37-39)

31Siiwadár kilae Yesu kuri i daqáy nee múk Farisayo, kuri báy, «Quútl diirihe, asma Herode i kuúng gaasár wa slaa'.»

32Yesu giri báy, «Tlawsé', intsangwdá' ku beera', ‹Iia qaaseek, laarí nee matlo aníng a neetlaamér duxuúm, nee tiqtuuse ngiwa hungu/umiis. Ala bál tám gadiyér'eé' a boo/eés.› 33Slám laarí nee matlo nee balooqawo gár án iwa hariím an kumiít aaiieene, asma i ya/aandaaká aarusmo kuwa dír hatlá' i gaasi, aqo har baraá Yerusalemu.

34«Yerusalému, Yerusalému, kiíngadá' aaruusér tsu/a/iim, nee kudá' tinda amoorók ya/aáw kiwa tlaqwaqut ar tlaa/e. A sagaáwa magá' án mukók nguwa burumburtá wa slaa', adoodár koonki tsiioorós ngir burumburariin baraá hhaampi'iiwós, ala kuungá' aga ya/aandi'iiká. 35Qaytsité', Mungú doohúng gwa geexáy. Án a kah, aníng i baloó aanda'aaká daxta ay dír ti oa', ‹Kudá' hardáh ar umuú Aako kwa tsuúq.› »

Currently Selected:

LUKA 13: IRQW

Highlight

Copy