TLEHHMA'AÁ YA/ABUUSE 1

Al'axweesantá Qeeruú hhoohhoó' oo Mungú kuwa haniisi

1Kitaábuuduú geera nguna gooiím dír kuúng Teofilo, gawaá daanduú muruudá' sleémeero Yesu aa tleéhh nee aa intsaahhatimís iimír iimu/uungo, 2ay qoomaadá' inós kuwa ar tláy gawaá doori. Qoomaadae inós ya/abuuseerós tidá' aa tsawaár gana hara'ayiiyín ar /uuruú Qeeruú hhoohhoó' oo Mungú. 3Alaá gwa'araarose inós tina laqaqán dír ya/abuuse deelo mibeeri tsiyáhh ar layaá dimbadimbé, adór inós ir slaáf. Nee kángw waawuti'iimár Mungú guri axweés. 4Tam qoomár inós nee ya/abuuse tiwa doogiyé', giri hara'ayín, iri oó', «Ma ti'iitara' baraá Yerusalemuwo, ala al'axweesantá Baabá na daamaak, tidá' taa dir'eé' wa axasé'. 5Asma Yohane ina baatimiís ar ma'aay, ala kuungá' tundu baatimiis ar Qeeruú hhoohhoó' oo Mungú alaá deeloorí niina aa meti.»

Yesu kuwa gawaá doorií ar tláy

(Marko 16:19-20; Luka 24:50-53)

6Qoomár tawa burumburiít, ya/abuuse Yesu guri yaahás guri beér, «Qoomaarí a tidá' múk Israeli kuwa waawuti'iimar'ín i ki/ísa?»

7Iri oó', «Siiwadá' nee qoomaadá' Baabá aa qaás baraá aleesleemuuwose a gadiyérhungeeká kawa xua'. 8Ala kuungá' /uuru u sleerá' bál Qeeruú hhoohhoó' oo Mungú burna i hardáh. Nee kuungá' aníng iri lamabu'uundá' baraaká' Yerusalemuro, nee baraá Yudea sleémeero, nee Samaria, tam ay alhhe'eesoó yaamu.» 9Axweesanaywí ooaro nguwa hhe'eés, qoomár inooín kuwa ga/ay, inós kurir gáwtí tláy, huunki guri ilaaót dír ilaaín wa ale.

10Qoomár Yesu iwa gáwtí tláy, muu ilaaín giri kiririhhín gawaá doori. Múk tsár iri bihhaíní sihhiít oo inqwar /awák. 11Mukdá' iri oó', «Aá múk Galilaya, asma milá mas sihhimitá' tawa dooraá ga/eerá'? Yésuuwí gawaá doori tsa/a/ám ni kii/, ar adoosíng kura aandé' iwa tsa/a/an gawaá doori.»

Heé taa daanduú Yuda wa tsawaár

12Aluuwo ya/abuuse niri gawaá tloomár Seituúnír wa awét, tidá' bihhaá Yerusalemúrí tseew, tari kií/ ay Yerusalemu, tloomadá' saweemaawo a har qoomoó hi'iitanór deelór Sabaáto. 13Tari dáh baraá do', tari tsa/án gawaá qoroófa, amoodá' geeraawo tawa iwiwiít. Inooín a kuká': Petro nee Yohane, nee Yakobo nee Andrea, nee Filipo nee Tomas, nee Bartolomayo nee Matayo, nee Yakobó Alfayo nee Simonudá' yaamuuwós aleeslaáqw,#1:13 Simonudá' yaamuuwós aleeslaáqw: Gídaabá, inós a heé wák oo yaamuuwós aleeslaáqw dír múk Romár wa ale, kudá' yaamuuín ngi sawaawuti'ii'imá'. nee Yuduú Yakobo. 14Mukwí sleémeero ina hoót ar muunuú wák baraá firooro, dinkwa nee /ameena sleeme, nee Maria aayór Yesu, nee hha'aá Yesu.

15Looarka wake Petro iri sihhiít dír tla/ángw hhae. Faaror'ín a tsiiruú wák nee mibeeraá tsár. Iri oó', 16«Hháe, Gooi gár kawa hariím aqo in bó/, tidá' Qeeruú hhoohhoó' oo Mungú aáng ira axweés ar afkú Daudi, daanduú Yudawo. Inós an kudá' múk Yésú oohár áw gwa geerahaar. 17Inós geeraawo nee atén a dinkwa, asma inós sleeme kuna tsawaár as gadiyeérí atén ta tleehhaan kawa al tleehhaan nee inós.»

18Heewí qaymo gari tlaáxw ar peésár aa sláy ar tlehhmuudá' tlaákw. Iri huú' ar hu'umaá tlakw. Iri pu/uút, waqatuuwós sleémeero iri tsee/ií ti'iít. 19Kaangwí muu sleémeero oo Yerusalemu guri xuú', tam qaymoodá' kari báy Hakeldama tsifrir'ine. Gídaabárós a «Qaymór tseere».

20«Asma kaa gooín baraá kitaábuú Wara'amto,

‹Hotaangós i tawó iwiiti.

Slám heé baraadá' wa hoót miwa deeruút.›

Slám kaa gooín,

‹Gadiyeédá' i tlehhahhiti heé hatlá' ngi oohi.›

21«Gawaá adoorihe múk nee atén aga al hotaatimaan i deer, deelo sleémeero qoomár Yesu iwa ayaarén i dirii'i, tam ay bál iwa ayaarén wa tláy, 22iimír qoomaadár baatimisuú Yohane, ay bál Yesu kuwa dirén wa ar tláy, kuwa tsa/aás gawaá doori. I hariín heé wák iwa lamabu'usmoó waasle/uuwós tleehhiiti dinkwa nee atén.»

23Múk tsár kuri qaás, Yosefu kudá' ta bay Barsaba, nee umuuwós oo tsár a Yusto, nee Matiya. 24Mungú kuri firín, tari oó', «Aáko, kuúng munér muu sleémeero a xú', dír mukwí tsare heé kuúng taa tsawát laqaamang, 25asma pa/aangwí nguwa oohi nee gadiyeérír ya/abusi'iima, tí Yuda aa dakuús, iri amoorós i tláy.» 26Tsawdo kari tleéhh. Matiya kuri tsawaár, nee kuri harafaár tawa heé wák dír ya/abuuseedá' mibaá nee tsare.

Currently Selected:

TLEHHMA'AÁ YA/ABUUSE 1: IRQW

Highlight

Copy