TLEHHMA'AÁ YA/ABUUSE 2

Qeeruú hhoohhoó' oo Mungú niwa hardáh

1Bál deelór Pentekoste iwa xeér, mukdá' haratlintii' sleémeero ta dír wák i dirii'. 2Naxés fur'ár dooraá daahh niri gaanslár hardát, a adór bambaaór fukukuu' ar /uuru. Fur'adá' do'dá' inooín i dirii'iya' guri hatsís sleémeero. 3Tsángw asla niri ti'iít, tiri partliít, iri dír umuúqo heéwí iwiwiít, oo dir'ín tidá' i dirií'. 4Sleémeero kiri hatsiís Qeeruú hhoohhoó' oo Munguhe. Tari axweés ar tsifrír dimbadimbé, adoodá' Qeeru ngira aleesleemuú i haniís ilawatsto.

5Baraá gixsár Yerusalemuwo múk Yahudi i deer oo Mungú gwa haratlintii', múk amór yaamaá dimbadimbé daraáhh awa baraakaá' yaamu. 6Afoodá' kawa axaás, múk yaariír iri burumburiít, tari ló'wa da'ayuút, asma umuúqo heewo mukdá' guna axamiís iwa axweesi ar tsifrirós ar kilá'. 7Sleémeero tari da'ayuút tari waa/oo/amín tari oó', «Ahaá, mukwí sleémeero axweés a múk Galilayarookáhe? 8Ahaá, baré umuúqo heewo bura iiárií qaasaán, in axwees ar tsifrirén ar kilá'? 9Atén a múk Parti nee oo Medi, nee oo Elami, nee múk Mesopotamiár wa hoót, múk Yudea nee Kapadokia, nee Ponto nee Asia, 10nee múk Frigiár daáhh nee Pamfilia, oo Misri nee oo Libya, múk inslaawoó bihhaá Kirene, nee dahaayér yaamaá Romár daahh, 11múk Yahudi, nee múk hatlá' oo diínír Yahudi gaa eehar, múk Krete nee múk yaamaá Ma/arabu. Adoorí a adoomá kiwa axamiisaan tlehhma'aá waa/oo/amo awa Mungú kiwa axweesi ar tsifrirén.» 12Tari waa/oo/amín, tari amoqwaqwadín sleémeero, tiri kilooín babayé', «Kángw adór kwí kureeriiwo a milá?»

13Muu bahh'alé tari niqimís tawa kaahi, «Difaáír /aben gaa oonitimís.»

Alki/ituú Petro deelór Pentekosteero

14Petro iri sihhiít dinkwa nee ya/abuuseedá' mibaá nee wak, iri tseé' ar afór ur iri oó', «Kuungá' múk Yahudi, nee kuungaásingaá sleémeero baraaká' Yerusalemúr hootá', axweesanay'eé' kwí iiárií qaasaak. /Aymuuwí xuaak, 15mukwí aa oonimiitiiká adoosíng kuungá' kar kata', asma qoomaarí a looár tám ar matlaatle. 16Ala kaangwí a kudá' aarusmo Yoeli aa axweés baraá kitaábuuwose iwa oó',

17‹Mungú ina oó',

Adoorí an adoodá' ni tleehh

bál deelór alhhe'eesaywo,

aníng muu sleémeero un Qeeruueé' i haniís,

daaqayhúng nee dasuuhúng tari aariirín,

masoombarhúng iigu'utu guri aán,

nee bariiserhúng iri tlatitiín.

18Ala deeloodae án Qeeruueé' u haniís

sleeme dír sagadiyuuser'eé' ar hhawaate nee ar /ameena,

nee inooín tari aarirín.

19Aníng muruú waa/oo/amór koóm ngu gawaá doorí wa laqaám,

nee baraaká' yaamuwo layu ngiri laqaám,

tseere nee asla, nee ququamó.

20Tsee/amá iri giiw,

nee slahhaangw iri tseere tleehhiit,

dír deelór Aako,

tidá' ak ur nee ar xiríf nira xeeriiká.

21Nee umuúqo heewo oo umuú Aako gwa ateeti ku ba/amis.›

22«Kuungá' múk Israeli, axweesanaywí iiárií qaasaak, Yesu, heé yaamaá Nasareti, Mungú nguna dirhúng i laqaqán ar loohír muruú xuawaslén, nee layu nee muruú waa/oo/amór koóm. Muruuwí Mungú guna tleéhh ar dákw Yesu tla/angwhúng wa ale, adoodá' kuungá' kar xua'. 23Heewí kunguna haniís dirhúng, adór Mungú baraá xu'utirose ngira qoomeés iimír iimu/úngw wa ale. Kuungá' kuri kikié' ar dabaá múk tlákw, kuri gasé'. 24Ala Mungú guri gweér baraá slahha'amaayér gwa'araaro, guri waasle/atís, asma gwa'ara ar /uuruuwose gwa aleesleeriiká ilaa/aro. 25Asma Daudi kangós gwa oó', iwa kaahi,

‹Án Aako una ar'a'ár daqisleém dír geeraaeé',

asma inós i bartá dakw'eé' oo doó /iyáy,

as aníng mitiwa dingitís.

26Gawaá adoorihe muunaáeé' iri qwalalaá/,

aníng niri baraá/,

slám niri hoót ar harahhifo.

27Asma kuúng qeeruueé' u baraá gi'ií meeraaká,

laqaá Heewók oo hhoohhoó' u meeraaká iwa hhitiruuti.

28Loohír amór slafíngw kaw nga aníng i xu'utís.

Aníng a haáts qwal/uwo,

asma kuúng a dir'eé' dirí'.› »

29«Hhaee'eé', án iiárií qaasaré', /ayma'aá niina ngi dirhúng i oó' ar pihh'uuma, kángw baabuúrén kudá' úr Daudi. Inós ina gwaá', kuri foól, nee /aantarós i diirír ayaarén i dirí' tam ay laarí. 30Slám inós a aarusmo, nee lo'oodá' Mungú aa /aáy inós ga xuu', tidá' kah, ‹Baraá xwaylaroge heé wák u waawutmoó wa qaás.› 31Inós kángw waasle/uú Kristo guna ár ar baraá aaru'uuma, guri alki/iít iri oó',

‹Qeeruuwós gu baraá gi'ií mayká,

nee tam slaqwtós aa hhitirutiká.›

32Yésuuwí kuna waasle/atís nee Mungú, nee atén sleémeero a lamabu'uusér waasle/uuwós. 33Gawaá adoorihe kuri xirfayeés, guri tsa/aás ay dákw /iyáy oo Mungú, nee al'axweesantadár Qeeruú hhoohhoó' oo Mungú gari dír Baabá wa ilaaóh. Nee nguri amooréní haniís. Nee hám an kaangwí kuungá' ta ga/eera' nee ta axamisa'. 34Asma Daudi inósuú kilá' aa tsa/aniká gawaá doori, ala inósuú kilá' ina oó',

‹Aako Aakooeé' guna báy,

bihhaá dakw'eé' oo doó /iyáy nay iwiiteek,

35ay dír wakuuseerók ngay gawaá dabaawók i qaas.› »

36«Gawaá adoorihe kuungá' múk Israeli, kángw kilá' wa xuaak, adór Yésuuwí kuungá' taa kikié' Mungú ngura qaás tawa Aako nee Kristo.»

37/Aymi'iiká' kiwa axaamiís, muner'ín kari kwatiít ló'wa ale, Petro nee ya/abuusér hatlá' kay yaahamiís tari oó', «Hhaeerén atén adór ta laqaan?»

38Petro iri oó', «Hhu'u'uumé', tundu baatimiisi ar umuú Yesu Kristo, as tlakweemaahúng kiwa gurtlay, nee daqaní kuungá' Qeeruú hhoohhoó' oo Mungú u sleerá'. 39Asma al'axweesantí a toohúng, nee ar na/iihúng, nee ar muu sleémeero oo sawén, kudá' sleémeero Aakoó Munguúrén i ateeti as nguwa i hardihiya'.»

40Petro giri ló'wa lamabu'ún ar /ayma'aá hatlá' awa yaariir, nee giri gurbu'ún iri oó', «Tundu ba/amisi dír qartír múk tlakwe.» 41Nee mukdá' axweesantadá' gaa haratlintii', kuri baatimiís, múk baldá' aa doogin a har afi qoomoó kume tám. 42Tari kumiít baraá intsaahhasár ya/abuusér wa ale, nee baraá dinkwár kríshaanáy, nee tam baraá muruú /aymár Aakoowo sleeme, nee baraá firooro.

Hotaá haratlintaauuse

43Umuúqo heewo dae guri eér, asma muruú xuawaslén oo yaariír nee layu kiri tleehhiít nee ya/abuuse. 44Mukdá' sleémeero aa haratlintii' tari dír wák wa hoót, muruuín sleémeero a dinkwa. 45Daqaari'iimar'ín kari weeramiís, nee muruuín kudá' i kon'a kuri qasmiís dír umuúqo heewo ar hariímadá' qoom. 46Umuúqo deelooro tari baraá Doó Mungú i dogiitiyé' ar muunuú wák. Muruú /aymár Aako kuna /aáy dír umuúqo dó' wa ale, muruú /aymar'ín kuri /aáy ar qwala/, nee ar muunuú /awaák. 47Mungú kuri sluufmiís, nee muu sleémeero kuri sla'atimís, Nee umuúqo baalaaro Aako faarór mukós kudá' ba/aa/ám gana dogiít.

Currently Selected:

TLEHHMA'AÁ YA/ABUUSE 2: IRQW

Highlight

Copy