TLEHHMA'AÁ YA/ABUUSE 3

Heé taqoormo kuwa hungu/uús

1Looarka wake Petro nee Yohane tana tsa/án amór Doó Mungú qoomár looár gwaleél siiwadár saaliingw. 2Heeko taqoormo iimír kuwa laqwaali kuri afkú Doó Mungú i áy, afkú do'dá' ta bay oo Hhoohhoó'. Heewí umuúqo deelooro kun gagaraarín didií ale, as ilahhooa ngiwa firirin dír mukdá' baraá Doó Mungú i daráh. 3Heewí Petro nee Yohane ngiwa ár tawa darahi baraá Doó Mungú, giri firín ilahhooaro. 4Petro nee Yohane kuri ilií duxún, tari oó', «Amoorén i qaytsitang.» 5Inós giri ilií duxún, gari haraxuú' gaa ngiwa dir'ín wa slay. 6Ala Petro iri oó', «Aníng peésa a koomaaká, laqaá sahaábu, ala tidá' aníng ni koom an tidá' ni haniis. Ar umuú Yesu Kristo oo Nasareti, sihhiít, tláw.» 7Dákw doó /iyáy guri óh, guri sihhitís. Hamtidár kilae tsa/a'aá ya'aawós niri kwa/iyé' nee diqoó ya'aawose. 8Heedaádá' niri yaamuú wa /akuút ar gaanslaay, iri sihhiít, iri hi'imiít. Tari aldáh baraá Doó Mungú nee Petro nee Yohane, iri hi'iimiít iri ni/ín, Mungú guri diidi'iimiís. 9Muu sleémeero heedaádá' guri ár adór ira hi'imiít, nee Mungú kuri diidi'iimiís. 10Kuri tsaáhh tawa heedaádá' ilahhooár firaariím, kudá' ta qamaamin dír Afkú do'dá' ta bay oo Hhoohhoó'. Tari ló'wa waa/oó/, tari da'ayuút as kangwdá' aa tleehharuut.

Alki/ituú Petro baraá Doó Munguhe

11Heedaádá' taa hungu/uús, tari al dinku'uús nee Petro nee Yohane. Muu sleémeero giri i burumburiít didár islangwdá' ta bay islángw Solomon, muu iri ló' wa waa/oo/amín. 12Qoomár Petro adoorí ngiwa ár, mukdá' guri báy, «Aá múk Israeli, tlehhmuuwí mus waa/oo/amiindá'? Asma milá atén mista tawó ilaá i duxuundé', baré kwaáo' a atén heewí una hungu/uusaán ar /uureemoorén, laqaá ar hhooeemaarén. 13Munguú Abrahamu nee oo Isaka nee oo Yakobo, Mungú baabi'iirén, sagadiyusmoowós Yesu guna xirfayeés, ala kuungá' sagadiyusmoowí kuri saki/é', kuri geeraá Pilató wa sié', qoomár Pilato iwa inós gweerár wa slai. 14Ala kuungá' Kudá' hhoohhoó', nee gan'amuú koóm kuri sié'. Nee kudá' aa tsu/uut kuri firiindé' kuwa gweeri. 15Kudá' úr oo slafiingw kuri gasé', ala Mungú guri waasle/atís baraá múk aa qaátl wa ale, nee atén a lamabu'uusér waasle/uuwí. 16Heewí kuungá' ta ga/eera' nee oo ta xua', heé inós gwa /uurií haniis a Yesu, asma haratlintaao. Heewí kuri hungu/uús ar /uuruú haratlintaaoorí amór Yésú daahh, adoorí kuungá' sleémeero kur ga/eera'.

17«Ala hám daxta, hhaee'eé', aníng a xuú' adór tidá' kara tlehhé' as xuawaslerhúng, adoodá' geeraharuuserhúng aa tléhh sleeme. 18Ar tlehhmuuwihe Mungú adoodá' aa geerií axweés ar loohír aaruuseerós sleémeero, tidá' iwa káh, Kristowós gár kuwa hariím a kun slahh'eemiís. 19Gawaá adoorihe kuungá' hhu'u'uumé', nee ki/é' amór Mungú, as tlakweemaahúng kiwa fiitsi. As kahhó' qooma niwa hardat ar Aako nuwa qwal/asi dír geeraawose, 20nee Kristo Yesu nguwa ya/aawi, kudá' taa iimír aáng wa amohhe'eés as kuungá'. 21Kristo Yesu an kudá' aa gawaá doorí kii/, ay dír qoomaadá' i xeer, ar mura' sleémeero kuwa /abeemií ki/isi, adoodá' Mungú ngira qaroó oó' ar loohír aaruuseerós ar hhohho'. 22Asma Mose ina oó', ‹Aako Munguúhúng aarusmoó adór aníng ngu baraá tla/angwhúng wa sláy. Ala muruudá' sleémeero ni kuungá' bay na iiárií qaasaak. 23Umuúqo heewo oo aarusmoowí gu iiárií qaasaaká, ku qwaarees.› 24Nee aaruuse sleémeero iimír aarusmo Samueli, nee kudá' sleémeero aluuwós nga hariye', inooín kángw qoomaarí nguna alki/iitiyé' sleeme. 25Kuungá' a na/aá aaruuse, nee slám a na/aá alqadoodá' Mungú aa qaroó alqadín dír baabi'iihúng, tidá' aa oó' dír Abrahamu iwa kaahi, ‹Baraá xwaylaroge xoordu sleémeero awa baraá yaamu ki tsuuq.› 26Qoomár Mungú sagadiyusmoowós kwí nguwa hhe'eés waasle/atisaro, nguri amorhúngí geerií ya/aáw, as umuúqo heewo tlakweema ngiwa may as tsuuqaawós.»

Currently Selected:

TLEHHMA'AÁ YA/ABUUSE 3: IRQW

Highlight

Copy