TLEHHMA'AÁ YA/ABUUSE 4

Petro nee Yohane dír geeraá kwasleema

1Qoomár Petro nee Yohane tawa dír múkwí axweesi, kaahamuusér Mungú, nee geeraharusmoó xuumuusér Doó Mungú, nee múk Sadukayo tari didaádií hardáh. 2Tari ló'wa buúhh, asma muu kuwa intsaahhatimís nee kángw waasle/uú Yesu kuwa alki/iít. 3Petro nee Yohane kiri ohín, kiri dahaás baraá doó tseegamo ay matlaatle, asma siiwadá' a tsiindo. 4Ala baraá mukdá' axweesantadá' gaa axaasi awa yaariir ngay haratlinti'iyé', nee hhawaate a har afi qoomoó kume kooán.

5Matlaatleero looa niwa tleér, geeraharuuse nee bariise nee intsaahhatuusér hara'ayár Mosewo tari burumburiít baraá Yerusalemu, 6dinkwa nee kaahamusmoó úr oo Mungú kudá' ta bay Anasi, nee Kayafa sleeme, nee Yohane nee Aleksanda nee muu sleémeero kudá' doó kaahamusmoó úr oo Mungú hoót. 7Petro nee Yohane kiri tla/angw'ín i sihhitís, kiri yaahamiís, kiri báy, «Kuungá' muruuwí /uuruú kur tlehhita' a /uuruú heemá, nee ar umuú heemá?»

8Petro i haats Qeeruú hhoohhoó' oo Munguhe, iri oó', «Kuungaásingaá geeraharuusér muu nee bariise, 9laarí atén ti yaahamiis daanduú tlehhmuú hhoó', kudá' taa tleéhh dír heedaáda' taa hungu/uús, tawa kaahi /uuruú ira hunguú/ a /uuruú heemá. 10Ala dír kuungá' sleémeero i xu'utit nee dír múk Israeliwo adór heewí dír geerahúng wa sihhmiít ar slaqwa hhooa gár ira hunguú/ tar umuú Yesu Kristo oo Nasareti, kudá' kuungá' taa kikié', nee Mungú guri baraá gi'ií wa waasle/atís. 11Inós an

tlaa/adá' taa sií' nee kuungaásingaá qwatsiiruuse,

ala laatí an tlaa/adá' ur ar do' ir gawduy.

12Asma ba/ama i káhh dír heé hatlae, slám umuú hatlá' i kaahh baraaká' yaamuwo oo taa múk i haniís, oo atén tar ba/aman.»

13Mukdaádá' urén oo doó kwasleema pihh'uumár Petro nee Yohane kawa ár, nee kawa tsaáhh tawa múk aa soomuusiiká, tari waa/oó/. Kari tsaáhh adór mukwí nee Yesu tar dinkwa. 14Qoomár heedaádá' taa hungu/uús kuwa ár, iwa bihhaá ín Petro wa sihhimiiti inooín gár ta ooi iri qwát. 15Kiri ádbáy tawa tsee/ií ti'iiti baraá doó kwasleemaro, as inooín kilooín tawa axweesi. 16Tari oó', «Adór mukwí ku laqaan a adoomá? Asma ka geehhoo' muu sleémeero oo baraaká' Yerusalemúr hoót, layuuká' inooín taa tlehhiít kaa xuú', nee atén tlaankuwo i aleeslawanaaká. 17Ala /aymi'iiká' mindiwa xu'utitiyé' dír muko, nee inooín in iigahhaataán as mindiwa malé axweesiyé' dír muko ar umuuwí.»

18Petro nee Yohane kiri ateét, kiri hara'ayín matawa axweés, laqaá matawa baloó intsaahhatimís ar umuú Yesu. 19Ala Petro nee Yohane tari oó', «A hariimáro dír geeraá Munguhe, kuungá' nuwa iiárií qaasaan ta Munguhe, kangwsíng kuungá' kiloohúng tsataak. 20Asma atén muruudá' taa araán nee kudá' taa axaasaán, kuwa mawaan axweesanto u aleeslawanaaká.» 21Alaá kiwa malé iigahhaata hhe'eés, kiri gweér asma pa/aangw kwa ariiká oo kiwa sakwasleemuuti as muu. Asma muu sleémeero Mungú guna xirfayeemiís as tidá' sleémeero aa tleehharut. 22Asma heedaádá' taa muruú xuawaslén i tleéhh, kudá' taa hungu/uús, kureeriiwós mibeeraá tsiyahhe naa waarahhiyé'.

Haratlintaauuse pihh'uuma ngiwa firiín

23Qoomár Petro nee Yohane kiwa gweér, tari tláy amór muk'ín, kángw muruudá' sleémeero kaa báy nee kaahamuusér uren ar Mungú nee bariiseero, kuri alki/iít. 24Adoorí kawa axaás, Mungú kuri firín ar muunuú wák, tari oó', «Aáko, kuúng a Mungú, kuúng an kudá' doori nee yaamu nee tlawto iga tlehh, nee umuúqo gár dawa. 25Kuúng ana axwés ar Qeeruú hhoohhoó' oo Mungú ar afkú baabuúrén, sagadiyusmoowók Daudi, tawa kát,

‹Ahaá, asma milá xoordu mis tsimahhuusiyá'?

Nee slám muu mis muruú tlákw aldakuut?

26Waawituú baraakaá yaamu taa amohhe'eés,

nee slám geeraharuuse aa burumburít

as daanduú Aako nee Kristowós.›

27Asma tí a ló', Herode nee Pontio Pilato, nee múk xoordu nee múk Israeli, tana baraá gixsárí burumburiít, as sagadiyusmoowók Kudá' hhoohhoó', Yesu, kudá' kuúng taa iimbalaáx ar di/i. 28As kawa tleehhi tidá' kuúng taa slá' nee taa tsabiín kawa tlehh ar /uuruuwók, iimír iimu/uungo iwa bo/. 29Ala Aáko, ham daxta de'e tlaquuín ga/aaweek, nee sagadiyuuseerók aleesleemu ti hanis as axweesantók kawa axweesi ar pihh'uuma sleémeero. 30Dakók tleeseek iwa hungu/umiisi, nee layu nee muruú xuawaslén nguwa tlehhiiti ar umuú sagadiyusmoowók Kudá' hhoohhoó', Yesu.»

31Mungú firooro kuwa hhe'eés, didaádá' tay burumburiít iri daaraxát, sleémeero tari haáts Qeeruú hhoohhoó' oo Munguhe. Axweesantá Mungú kari alki/iít ar pihh'uuma.

Dinku'uuma

32Nee mukdá' aa haratlintii', muner'ín nee inslaway'ín tari wákleelí. Tam heé aa oo', «Gaarí a te'eé', ar aníng kilooeé',» i kaahh, asma muruuín sleémeero a alqaati. 33Ya/abuuse kángw waasle/uú Yesu guri lamabu'uún ar /uuru, nee Mungú tsuuqaá yaariir giri haniís dír muu sleémeero. 34Ala mukdá' aa haratlintii'i, heé aa gaa slaa' i kaahh. Asma mukdá' sleémeero oo yaamaá koóm, laqaá maraay, muruuín kudá' kuna weerimiís, hariímaadá' tinda sláy baraá weerimisuwo kingiri huúw, 35kari qaás dír geeraá ya/abuuse. Peésaadá' kari qasmiís ar hariímadá' hee aa slaá'.

36Nee Yosefu kudá' ya/abuuse aa beér Barnaba (gídaabárós a heé gurkwa/asa ga xuú'), inós a heé tlahhoó Laáwi, nee yaamaá i dahhi a yaamaá Kipro. 37Inós qaymo ga kón, gari weeriís, peésaadá' ngari huúw, gari qaás dír geeraá ya/abuuse.

Currently Selected:

TLEHHMA'AÁ YA/ABUUSE 4: IRQW

Highlight

Copy