TLEHHMA'AÁ YA/ABUUSE 5

Anania nee Safira

1Ala heeko wák umuuwós ta babay Anania, nee hareerós Safira, muruuín kudá' sleémeero ta kon kuri weeriís. 2Ala Anania nee hareerós tari al'axweés peésaadá' kawa bahh lu/i nee tidá' aa met gari huúw dír geeraá ya/abuuse. 3Petro iri oó', «Ananía, ahaá, Neetlaangw muunaáwók musungwa hatsiís, tam Qeeruú hhoohhoó' oo Mungú kuri lamtá beér, nee hariímadá' taa sleér yaamu kiwa weerís kari bahh ilá/. 4Ahaá, qoomár iwa baraá dabaawók i diri' a togekáhe? Nee qoomár weerisaro kawa hhe'és, i baraá aleesleemuuwogekáhe? Ahaá, adór /aymuuwí pa/aangw ngura sláy baraá muunaáwoge a adoomá? Heé kuúng taa al/ák a heewooká, ala a Mungú.» 5Anania /aymi'iiká' ngiwa axaás, iri yaamií huú', iri gwaá'. Muu sleémeero oo adoodá' gaa axaamiis, daér yaariir guri eér. 6Daaqaay iri tláy, Anania kuri qaás baraá inqwaarír /awaak, kuri tsee/áy gagaár, kuri foolár áy.

7Alaá deelór hhawaaká iwa gwá', harér Anania niri hardát. Inós kaangwí aa tleehharuut daanduú hhawaatuuwose gu xu'uká. 8Petro gari yaahaás, gari báy, «Hariímadá' taa sleeré' dír yaamuudá' taa weerisi'i a tíhe?»

Inós iri ó', «Eeít.»

9Petro iri oó', «Kiíng nee hhawaatuuwók Qeeruú Aako adór al/aymaaro kura qitlé' a adoomá? Qaytsiít mukdá' aakoowók gwa foolár áy hanoos i dír afkú do'. Nee hám kiíng sleeme ti tsee/áy huuw.» 10Hamtidár kilá' iri hú' dír ya'aá Petro, iri gwá'. Daaqaydá' niwa dáh, naxés kawa ár aa gwá', kari gagaár tsee/áy alé, kari foól dinkwa nee hhawaatuuwós. 11Haratlintaauuse daér yaariir gari eér, nee múk hatlá' sleémeero oo axweesanaywí gwa axamiis.

Layu nee muruú waa/oo/amór koóm

12Ya/abuuse layu nee muruú yaariír oo waa/oo/amór koóm guna tlehhít baraá tla/ángw muko, nee mukdá' aa haratlintii' sleémeero tana burumburimiít baraá matla/ángw Solomon. 13Ala dír mukdá' aa haratlinti'iikahe heé aa qiitl i kaahh iwa haragwaai dír haratlintauuse, ala a haratlintauuse kana xirfayeemiís. 14Múk Aako gwa haratlintii' iri ló'wa tlaáhh, hhawaate nee /ameenaaro. 15Tam tiqtuuse sleeme kari huwahuúw ar falo nee ar hhafeeto afaá loohír i ale, as geehhaantamoó Petro ngiwa slay qoomár inós bir waaraahh. 16Muu sleémeero kudá' baraá gixsadaá bihhaá Yerusalemúr i tsewen, tari burumburiít, tiqtuuser'ín kingiri huwahuúw, nee múk neetlaame aa eér, tiqtuuseedá' sleémeero kari hungu/umiís.

Ya/abuuse kawa slahh'eemiís

17Aluuwo kaahamusmoó úr oo Mungú nee mukdá' nee inós ti alkoomá', kuduú bartá múk Sadukayo tari sihhiít, gur'e giri ohiín, 18ya/abuuse kari ohín, kari dahaás baraá doó tseegamo. 19Ala malaykamoó Aako xweeraawo afér doó tseegamo gari gweér, giri tsee/ií duúx, giri báy, 20«Tlawsé', sihhiité' baraá Doó Mungú, muu ádbawaak kángw axweesanaywí sleémeero oo slafiingo.» 21Inooín axweesanaywí axaasaro kuwa hhe'eés, tari tláy matlaatlér boo/e, tari baraá Doó Mungú wa intsaahhatimís.

Kaahamusmoó úr oo Mungú niri hardáh dinkwa nee mukós. Múk doó kwasleema nee bariise sleémeero nee múk Israeliwo, kuri burumbuúr, muu kuri ya/aáw baraá doó tseegamo as mukdá' kunguwa huwi. 22Sagadiyuuseedá' taa ya/aáw tawa hardáh baraá doó tseegamo, naxés mukdá' taa tsegiít kwa ariiká, kaangw kuri ooár áy. 23Tari oó', «Tawa hardahaán, doó tseegamo i tseegamór i dirii', nee askaári i afkú dó' wa sihhimít, ala afkú do' kuwa gweeraán, heé taa baraá dóí awaán i kaahh.» 24Xuumusmoó úr oo Doó Mungú nee kaahamuusér uren ar Mungú kaangwí kuwa axaás, xure giri eér, as ya/abuuseerí aa baraá doó tseegamór wa ti'it. Tari oó', «Adoorí a adoomá daqaní?» 25Siiwadár kilá' heeko wák nay hardáh, iri oó', «Mukdaádá' /isá' taa baraá doó tseegamór i dahasé', haandá' baraá Doó Mungú, ta múk intsaahhatimis.» 26Xuumusmoodá' úr nee xuumuusér hatlae tari tláy, ya/abuuseedá' kingiri huúw, ala ar /uuruuwooká, asma inooín ta múk da'ayumiit, as mikiwa tlaquút ar tlaa/e.

27Kingay huúw kiri qaás tla/ángw múk kwasleema. Kaahamusmoó úr oo Mungú giri yaahaás, iri oó', 28«Atén kuungá' naa ló'wa hara'ayiimániíke niwa kaahaan kuungá' ma intsaahhatimisara' ar umuuwí. Ala hám qaytsité', intsaahhatimisuuhúng Yerusalemu gaa dalaá/, nee kuungá' tseerér heehúng kudá' ngi gawaarén i huwtá wa sla'á'.»

29Petro nee ya/abuuse tari oó', «Gár atén tiwa hariím a Mungú un iialooeemisaán ta múk aleesleemuú kooma. 30Munguú baabi'iirén Yesu guna waaslee/atís, kudá' kuungá' taa gasé' ar loohír kikiár gawaá msalaába. 31Mungú heewí guri xirfayeés ar dakós oo doó /iyáy, as tawa heé úr nee ba/amusmo, as múk Israeli nguwa hhu'u'úngw i huwi nee hingeemisuú tlakweema nguwa slaya'. 32Nee atén a lamabu'uusér muruuwí, dinkwa nee Qeeruú hhoohhoó', kudá' Mungú aa haniís dír mukdá' sleémeero inós gu iialooeemiís.»

33Inooín adoorí kawa axaás, mune giri farkiín, kiri tsu/utár wa slaá'. 34Ala heeko wák, oo Farisayo, umuuwós ta bay Gamalieli, slám inós a intsaahhatusmoó hara'ayár Mose, a heé ta ilaiwawa/i nee muu sleémeero. Inós ina sihhiít dír tla/ángw múk kwasleema, hara'aya gari oó' as ya/abuuse kawa tsee/áy duuxi qoomár niinawe. 35Heewí iri oó', «Aá múk Israeli, gár ta mukwí tleehhamór wa sla'a' ala alqaytsitaak. 36Asma deelór hhaawaaká ar aa waarahhi, heeko ina ti'iít, umuuwós ta bay Teuda. Inós ngiwa xui, inós a heé ló'wa úr, nee múk tsiirér tsiyáhh guri eehár. Looaytleér inós kuri gaás, nee mukdá' sleémeero inós gwa eehar iri diya/aát, iri qwaár. 37Alaá heewihe heeko hatlá' ta bay Yuda, heé Galilaya, nina hardáh. Deeloodá' a tidá' umér muu kawa gooii'in. Heewí múk yaariír guri amoorós i uuruúx. Inós iwa gwaá', mukdá' sleémeero inós gwa eehar iri diya/aát sleeme. 38Gawaá adoorihe aníng kuungá' nun baw, ma gaanslimaara' daanduú muksinge. Muksíng geemawaak, asma kaangwí laqaá gadiyeérí barnaxes ar dákw hee, i hhitirút. 39Ala barnaxes amór i dahh a amór Mungú, hhitimaro a aleesleera'aaká. As adoorí kuungá' mutunduwa tsaáhh tawa adór múk nee Mungú slaqwá'.»

Axweesanaywós kuri ya/án. 40Ya/abuuse kari ateét, kari muúx, kari hara'ayín matawa axweés ar umuú Yesu. Kiri geemáy, tari tláy. 41Ya/abuuseedá' iri ti'ít baraá do'duú kwasleemaro, ta qwalalaa/ asma kiwa harafaár tawa múk hariím mureekeemisuwo as daanduú Yesu. 42Nee umuúqo daqto baraá Doó Munguhe, nee dír maray'ine, axweesantá Mungú kaa mayká intsaahhatimisuwo, nee alki/ituú Ya/abtór hho' ar Yesu adór inós tar Kristo.

Currently Selected:

TLEHHMA'AÁ YA/ABUUSE 5: IRQW

Highlight

Copy