TLEHHMA'AÁ YA/ABUUSE 6

Alee/isuuse faanqw

1Deeloodae faarór eeharuuse iri doogigiín. Múk Yahudi oo tsifrír Yunanír axweés, iri qununuú/ daanduú múk Ebraniaro, asma kwaeelii'ín kaa gunqaareés muruú /aymaadá' umuú baalaaro ta qasmiisi. 2Ya/abuuseedá' mibaá nee tsár eeharuusér hatlá' sleémeero kari ateét, kiri báy, «I hariindaaká atén axweesantá Mungú kawa mawaan alki/ituuwo, tari dír qasmisuú wa iwiwiitaán. 3Hhaeerén gimsé', múk faanqw tsawaaraak tla/angwhunge, oo ta hhooár i xua', nee oo taa hatsiís Qeeruú hhoohhoó' oo Munguhe nee sagalooa, as kiwa qaasaan baraá gadiyeérí. 4Atén tari kumiitaán gadiyér firooro nee alki/ituú axweesantá Munguhe.»

5Boo/aydá' sleémeero /aymuuwí kuri ya/án. Stefano kuri tsawaár, heé haratlintaaór wa haáts nee Qeeruú hhoohhoó' oo Munguhe, nee Filipo, nee Prokoro, nee Nikanori, nee Timoni, nee Parmena, nee Nikolao, kudá' aa ba/an oo yaamaá Antiokia. 6Mukwi kuri sihhitís geeraá ya/abuuse, kuri aleefirín, kuri dabaaínií qaás.

7Axweesantá Mungú iri tsiyayaxát, nee faarór eeharuuse iri ló'wa doogigiín baraá Yerusalemuwo. Kaahamuusér Mungú ar yaariir iri haratlintí'.

Stefano kuwa óh

8Stefano i haats /uuruú Munguhe nee aleesleemuuwo, muruú waa/oo/amo guna tlehhiít, nee laydaá uren baraá tla/ángw muko. 9Mukko i deer, oo ta bay múk doó saaliingw oo tinda gweér baraá lawaali'iimaro nee oo múk Kirene, nee oo múk Aleksandria nee oo mukdá' oo Kilikia nee Asia. Mukuú doó saaliingwí bahh'alé iri daqáy amór Stefano, as tiwa tlaampaa'amisiya' nee inós. 10Ala kwa aleeslayká arba/ato as sagalooarí nee Qeeruuwí baraawós wa axweés. 11Mukko kuri sluúk as tawa ooi, «Heewí ugwa axaasaán, i Munguú /ooslislín nee axweesanoó Mosewo.» 12Mukdá' muu guri tlaahhírí qaás nee bariiseero, nee intsaahhatuusér hara'ayár Mosewo. Stefano kuri óh, kuri huúw baraá doó kwasleema. 13Lamabu'uusér lama kari sihhitís ar aa o', «Heewí diirí hhoohhoo', nee hara'ayár Mosewo, /ooslisliingo gi baloó maamayká. 14Asma aga axaasaán i kaahi, ‹Yesu Nasareti diirí ga hhitín nee uunuudá' Mose naa atén i hara'ayín gi warqees.› » 15Mukdá' sleémeero aa iwiit dír kwasleema, Stefano kuri ilií duxún. Gitsee/awós kiwa ár, naxés a adór gitsee/aá malaykamo.

Currently Selected:

TLEHHMA'AÁ YA/ABUUSE 6: IRQW

Highlight

Copy