Mk 9

1E nde a nga kate fe be na: Ma bele fo'o ane ma jô mia na, e bôt be tele vana ba, bevo'o y'été ba ye bo teke wu, akekui be tameya yen ane Ejôé Zambe ja so a ngu.

Yésus a veñesan a faé ane éfufup

(Mt 17:1-9; Lk 9:28-36)

2E mvuse melu mesaman, e nde Yésus a nyoñe Pierre baa Yakob a Yôanes, a kee ve be étam avie, e beta nkôle yôp. Ane a nga mane tyendé nyôl e mise mab été. 3Mengômesane mé me nga ngemban a bo angôndô éfumulu, avale woseman éziñ ya *si nyô a se ngul ya bo na éndelé é fum nalé. 4Ane Elie baa Môze be nga yené be mis, baa be Yésus be la'ane minlañ. 5E nde Pierre a nga nyoñ nkobô a jô Yésus na: A Rabbi, e ne mvaé na bi tabe vana. Nlôñane bibem bilaa, wô jia, Môze jia, Elie ke jia. 6A nji ke fo'o yem e jôm a jô, amu be mbe be fô'ôba'an a woñ. 7E nde *nkut ô nga zu buti be yôp. Ane *tyiñ é nga so e *nkut été na: Nyuna a ne mone wom ma dañe nye'e, vô'ôla'an nye. 8Atemetem na, éyoñ be nga ke ba fombô mbôma'ane, be teke fe beta yene môt éziñ mfe, ve Yésus étam baa be nye. 9Eyoñ be nga siliki be susuk e nkôle si, e nde a nga ve be abendé na, be bo te kañete môt éziñ e mam ba te yen, ve akekui éyoñ Mone Môt a wômôya, a so'o miñwuan. 10E nde be nga ba'ale abendé te, ve ba ke ba silan e zañe jab bebien-bebien jôm é ne na, e wômô a so miñwuan.

Nsili beyé'é ajô Elie

(Mt 17:10-13)

11Ane beyé'é be nga sili Yésus nsili a jô na: Amu jé Beyeme-bekalate ba jô na Elie a yiane taté so' 12E nde a nga yalane be a jô na: Elie a yiane fo'o taté so a kôme mam mese. Ve amu jé e ne ntilan ajô Mone Môt na, a ye bi mintaé abui a tôban ébiasé' 13Ajô te ma kate mia na Elie a soya, ane be nga bo nye aval ese be nga kômbô, aval ane e ne ntilan ajô dé.

Yésus a vaa mongô mbia nsisim

(Mt 17:14-21; Lk 9:37-43)

14Eyoñe be zuya koone beyé'é bevok, e nde be nga yen étua abui bizu'u bi bôt, be too be mbôma'ane, a Beyeme-bekalate, baa be be be sañeta'an. 15Eyoñe nkunda bôt ôse wu ô yemelaneya nye avôl-avô, ane angônda woñ a nga taté bi be, be bumu ñhe mimbi a ke wubane nye. 16E nde a nga sili be na: Jé mia be be mia sañetan' 17Ane môte wua ya ékoone bôt jina a nga nyoñe nkobô, nye na: A Ñye'ele, ma te zuu mona fame wome nyuna be wo, a bili nsisime mvuk. 18E vôm ase nsisime ôte wo bi nye, wo dum nye e si, avul e nga kui nye anyu, a nga wôté mesôñ, a mane yemele. Me jôya beyé'é bôé na be titane nsisime ôte, ve be teke'e ngu. 19Ane Yésus a nga yalane be a jô na: A mvoñe bôt é ne teke mbunane nyuna, ntaa vé ma ye tabe a mia, ntaa vé ma ye jibi mia? za'ane me nye bebé vana! 20E nde be nga zuu nye mongô. Ayene *nsisim ô nga yene Yésus, été été, ane ô nga bo mongô na a kpwemetan. Ane a nga ku e si a nga ke a bi'iti, avul ve kui nye anyu. 21E nde Yésus a zu sili ésaa na: Eyoñ évé jame te e nga taté nye? Ane a nga yalane na: Aso mongô. 22Biyoñ abui, *nsisim wo wua nye, nge sa e nduan, wôna e mendim, na ô wôé nye. Ajô te, nge ô ne fo'o ngule ya bo jam éziñ, volô'ô bia, ko bia éngôngo. 23Ane Yésus a nga jô nye na: Nge ô ne ngule ya bo a! ke mame mese me ne ngule ya boban e be môt a bili mbunan. 24Eté été, ane ésaa mongô a nga yôtan a jô na: Ma buni, volô'ô ma e vôm: Me ngenan te buni. 25Ayene Yésus a nga yene na jama bôt a nga mane tôkan vôm ate, e nde a nga bame mbia *nsisim a jô'ô na: A nsisime mvuk a ndok, ma ma jô wo na: Kôlô'ô be nye, ô bo teke beta nyiin e be nye! 26Ane *nsisim ô nga bôé ñyôn a minkpwemetan, a vam atan. E nde mongô a nga bo ane mbim, bôte bese be nga jô na: Ke a wuya! 27Ane Yésus a nga bi nye e wo, a bete nye e si, ane a nga tebe tetele. 28Abulan a nga bulan e *nda jé, ane beyé'é bé be nga sili nye, baa be nye be to étam na: Amu jé, bi bia te kate titane mbia nsisime ate' 29Ane a nga yalane be na: Mvoñ minsisim éte é se ngul ya kôlô a *zen éziñ fe, fo'o ve a meye'elan.

Yésus a beta kate foé awu dé a ñwômane wé

(Mt 17:22-23; Lk 9:43-45)

30Nkôlan ya valé ane be nga tyii e Galilé, ve da Yésus teke kômbô na môt éziñ *a yem nalé.

31Ane ñhe a nga ke a ye'ele beyé'é bé, a jô'ô be na: Ba ye koñe Mone Môt, na bôt be bi nye. Ba ye wôé nye. Ve da, éyoñ a wuya, e mvuse *môs mila a ye wômô. 32Mfa'a wop, be nji ke tu'a wôk ajô te, ve da be ko woñe ya sili nye minsili.

Za nye a dañ'

(Mt 18:1-5; Lk 9:46-48)

33Ane be nga ke e Kapernawum. Eyoñ a nto e *nda été, e nde a sili be na: Jé mia te zu mia sañetan e zenezen' 34Ane be nga ku bivô, amu be mbe be sañeta'an e zenezen na be yem za nye a dañ' 35Atabe a nga tabe e si, ane a nga loone Beyé'é awôm a bebaé, a jô be na: Nge môt éziñ a kômbô bo môt ôsu, a bo'o ntebe mvus ya bôte bese, a mbo bisaé asu bôte bese. 36E nde ñhe a nyoñ mone mongô a tele nye e zañe bôt ane a nga be'e nye e mo yôb a jô na: 37E môt a ye nyoñe ôyôme mongô wua avale di e jôé dam, mamiene le a nyoñ. E nde fe môt a nyoñe ma, sake ma a nyoñ, a nyoñe Nyô a nga lôme ma.

E môt a nji bo e ngame yat, a ne ngame jangan

(Lk 9:49-50)

38Yôanes a nga jô nye na: A Ñye'ele, bia te yene môt éziñ a tita'an mimbia minsisim e jôé dôé, e nde bia te jeñe *zen ya kame nye na a bo teke bo de, amu a nji zu a tôñe bia e nsamba wongan. 39Ane Yésus a nga jô na: Te kamane nye, amu na teke môt éziñ a bo étua jam e jôé dam, a ne ji'a beta kobô ma *abé été été. 40E nde ñhe, e nyô a nji tebe bia e ngame yat, nye a ne ngam jangan. 41Ajô te, e môt ase a ye nyuu mia ékpwase mendim amu na mi ne bôt be Krist, ma kate mia bebela na, a se ngul ya jañele ma'ane mé.

Meleb ajô nkolan ôbak a bibu'a biangan

(Mt 18:6-9; Lk 17:1-2)

42E môt ase a ye dutu wua ya ayôme bongô da buni ma dina na a ku *abé été, jam da dañ mvaé mfa'a wé e ne na, be fañe nye ako'o nnen ba ko'o de bidi *tyiñ, a wua nye e mañ été. 43Ajô te, nge wo wôé éziñ wo tindi wo e nsem, tyi'i wô. E ne *mvo'é na ô ke nyiin ényiñ, étune wo, alôte na ô ke nduane kom ô bili mo mebaé, 44e vôme nsoñ wob ô ne te wu, nduan ke te dim. 45Nge abo dôé éziñ e nde da dutu wo na ô ku, seme de; e ne wo mvaé na ô nyiin ényiñ été étun abo, alôte na ba wua wo ébé nduane kom ô bili mebo mebaé, 46e vôme nsoñ wob ô ne te wu, nduane ke te dim. 47A nge dise dôé éziñ e nde da dutu wo na ô kolé a ku *abé été, fôndé'é de. E ne wo mvaé na ô ke nyiin *ayoñe Zambe a dise da, alôte na be ke wua wo ébé nduane kom ô bili mise mebaé, 48e vôme nsoñ wob ô ne te wu, a nduan ke te dim. 49Amu na môt ase a ye wôk ésôbôk nku e nduan été. 50Nku ô ne mbamba jôm. Ve da, nge nku ô mane same *zam, mia ye beta ve wô *zam a za jômô? Biane nku e be miabebien été, taba'ane fe *mvo'é wua a nyô mbok.

Currently Selected:

Mk 9: BDCB

Highlight

Copy